ප්රභූ පන්තිය කියල එකක් දැන් නෑ.. ඒගොල්ලො හරි සුන්දර මිනිස්සු..- කළණ ගුණසේකර විවාහයෙන් පසු
තම විවාහය මුල්කර ගනිමින් සමාජ මාධ්ය ඔස්සේ එල්ල වන දේශපාලනික හා පෞද්ගලික විවේචන සම්බන්ධයෙන් ජනප්රිය රංගන ශිල්පී කලණ ගුණසේකර අන්තර්ජාල නාලිකාවක් (Wanesa TV) සමඟ පැවති සාකච්ඡාවකදී දීර්ඝ වශයෙන් අදහස් පළ කර තිබේ.
ගායන ශිල්පිනී රුචිනි විජේසුන්දර සමඟ යුගදිවියට එළඹීමත් සමඟ, කලණ ගුණසේකර ‘ධනවාදී හෝ ප්රභූ පවුලක් සමඟ සම්බන්ධ වෙමින් අරගලය පාවා දුන්නේ යැයි’ ඇතැම් පාර්ශ්ව නඟන චෝදනා ඔහු තරයේ ප්රතික්ෂේප කළේය.
මිනිසුන් විවාහ වන්නේ දේශපාලන න්යායපත්ර මත නොව දෙදෙනෙකු අතර ඇතිවන ආදරය සහ අවබෝධය මත බව ඔහු එහිදී අවධාරණය කළේය.
"දැන් සමාජයේ ප්රභූ පන්තියක් හෝ රදල පන්තියක් කියලා එකක් නෑ. ඒ මතවාද අද වන විට අවසන්. රුචිනිගේ පවුලේ ඉන්නේ ඉතාමත් සරල, සුහදශීලී සුන්දර මිනිස්සු. ඇත්ත නොදැන පිටත සිටින මිනිසුන් තමයි විවිධ ලේබල් අලවමින් මේ ප්රශ්න මවාගන්නේ," යැයි කලණ සඳහන් කළේය.
හිටපු ජනාධිපති රනිල් වික්රමසිංහ මහතා තම මංගල උත්සවයට සහභාගී වීම පිළිබඳව මතුවූ ආන්දෝලනයට පිළිතුරු දෙමින් හෙතෙම කියා සිටියේ, එතුමා පැමිණියේ දේශපාලන චරිතයක් ලෙස නොව රුචිනිගේ ඥාතියෙකු ලෙස බවයි.
"දේශපාලන මතවාද කුමක් වුවත්, එකම මේසයක වාඩිවී සුහදව කතාබහ කිරීමට තරම් මානසික සංවරයක් සහ දියුණු දේශපාලන සංස්කෘතියක් සමාජය තුළ තිබිය යුතුයි. අපි එකිනෙකා මරාගත යුතු නෑ. රනිල් වික්රමසිංහ මහතාත් අප සමඟ ඉතාම සුහදව කතාබහ කළා. මගේ මංගල්යයේදී කිසිදු දේශපාලනඥයෙකු සාක්ෂියට අත්සන් තැබුවේ නැහැ. අත්සන් කළේ අපේ ක්ෂේත්රයේ ප්රවීණයන් වන ලක්ෂ්මන් මෙන්ඩිස් සහ එඩ්වඩ් ජයකොඩි යන කලාකරුවන් දෙපළයි."
විවාහයෙන් අනතුරුව සමාජ මාධ්ය ජාලාවල රුචිනි විජේසුන්දරගේ ශරීර ස්වභාවය ඉලක්ක කර ගනිමින් සිදුවූ ‘Body Shaming’ සහ සයිබර් ප්රහාර පිළිබඳව ද කලණ දැඩි අප්රසාදය පළ කළේය.
"තවත් කෙනෙකුගේ රූපය හෝ හැඩය විවේචනය කරමින් නින්දිත වචන භාවිත කරන මිනිසුන් පෙන්වන්නේ තමන්ගේම හදවතේ ඇති අවලස්සනකමයි. කාන්තාවකට එවැනි ප්රහාර එල්ල කරන විට, ඇය වෙනුවෙන් පෙනී සිටි විශාල පිරිසක් සමාජයේ සිටීම ගැන මම සතුටු වෙනවා. මට රුචිනි කියන්නේ හරිම සුන්දර, ආදරණීය වගේම ශක්තිමත් ගැහැනියක්," යැයි ඔහු පැවසීය.
සමාජ මාධ්ය ඔස්සේ ප්රචාරය වන ආකාරයේ මන්දිර හෝ අතිවිශාල දෑවැද්දක් තමන්ට ලැබී නොමැති බවත්, තමන් දෙදෙනා සාමාන්ය පරිදි කුලී නිවසක ජීවත් වෙමින් ඉදිරි කලා කටයුතු වෙනුවෙන් කැපවී සිටින බවත් කලණ ගුණසේකර වැඩිදුරටත් සඳහන් කළේය.
-lankacnews
