ඩොලර් 260,000ක සුඛෝපභෝගී රථ 2ක් රටින් පිටකිරීම වළක්වමින් BOI සමාගමකට අභියාචනාධිකරණයෙන් තහනම් නියෝගයක්!

කැනඩා සමාගමක් සමඟ ඇති වූ ආරවුලක් මුල්කරගනිමින්, ශ්‍රී ලංකා ආයෝජන මණ්ඩලයේ (BOI) ලියාපදිංචි සමාගමක් භාරයේ ඇති සුඛෝපභෝගී මෝටර් රථ දෙකක් රටින් පිටකිරීම, විකිණීම හෝ වෙනස්කම් කිරීම වළක්වමින් අභියාචනාධිකරණය විසින් අතුරු තහනම් නියෝගයක් නිකුත් කර ඇත.

අගෝස්තු 07 වැනිදා ආර්. ගුරුසිංහ සහ ඒ. ප්‍රේමශංකර් යන විනිසුරු මඬුල්ල විසින් මෙම නියෝගය නිකුත් කර ඇත්තේ, කැනඩාවේ පිහිටි ‘ඇට්ලැන්ටික් ඔටෝ පර්ෆෝමන්ස්’ (Atlantic Auto Performance Ltd.) සමාගම විසින් හදිසි සහ සුවිශේෂී කරුණු යටතේ ඉදිරිපත් කළ පෙත්සමක් සලකා බැලීමෙන් අනතුරුවය.

ඇමෙරිකානු සහ අනෙකුත් ඉහළ පෙළේ සුඛෝපභෝගී වාහන අන්තර්ජාතික වෙළඳපොළට අපනයනය කරන ඇට්ලැන්ටික් ඔටෝ සමාගම, වම්පස පැදවුම (Left-hand drive) දකුණුපස පැදවුම (Right-hand drive) බවට පරිවර්තනය කිරීම සඳහා ශ්‍රී ලංකාවේ මෙම BOI සමාගම වෙත වාහන එවා තිබේ.

පෙත්සමට අනුව, මෙම ආරවුල හටගෙන ඇත්තේ ඇමරිකානු ඩොලර් 260,000 ක් (රුපියල් මිලියන 78 කට අධික) පමණ වටිනා ‘2024 Lincoln Navigator L Black Label’ වර්ගයේ සුඛෝපභෝගී මෝටර් රථ දෙකක් සම්බන්ධයෙනි.

අත්තිකාරම් මුදලක් ගෙවීමෙන් පසුව මෙම වාහන ශ්‍රී ලංකාවට එවූ බවත්, ඉතිරි මුදල කොළඹ වරායෙන් වාහන නිදහස් කර ගැනීමට පෙර ගෙවීමට එකඟ වී තිබූ බවත් පෙත්සම්කාර සමාගම චෝදනා කරයි.

කෙසේවෙතත්, තම අනුමැතියකින් තොරව සහ හිඟ මුදල් ගෙවීමකින් තොරව වංචනික ලෙස මෙම වාහන නිදහස් කරගෙන පරිවර්තනය කර ඇති බවට ඇට්ලැන්ටික් ඔටෝ සමාගම චෝදනා කරයි.

අදාළ වාහන BOI සමාගමක් භාරයේ පවතින බැවින් සහ BOI නීතිය යටතේ පහළ අධිකරණයකට වාරණ නියෝගයක් නිකුත් කිරීමට සීමා පවතින බැවින් තමන් අභියාචනාධිකරණය හමුවට පැමිණි බව පෙත්සම්කරුවෝ පැවසූහ.

යම් ප්‍රමාදයක් සිදුවුවහොත් මෙම වාහන ශ්‍රී ලංකාවෙන් පිටත වෙනත් රටකට යැවීමට ඉඩ ඇති බවත්, සමාගමේ ප්‍රධාන විධායක නිලධාරියා සහ අධ්‍යක්ෂවරයකු ශ්‍රී ලංකාවට පැමිණ සිටින බැවින් වාහන අතුරුදහන් වීමේ ක්ෂණික තර්ජනයක් පවතින බවත් නීතිඥවරු අධිකරණයට පෙන්වාදුන්හ.

ඉදිරිපත් වූ කරුණු සලකා බැලූ අභියාචනාධිකරණය, වගඋත්තරකරුවන්ට නොතීසි නිකුත් කළ අතර 2026 අගෝස්තු 19 වනදා දක්වා බලපැවැත්වෙන පරිදි මෙම අතුරු තහනම් නියෝගය නිකුත් කළේය.

මෙම නියෝගය මගින් අදාළ මෝටර් රථ දෙක වෙනත් ස්ථානයකට ගෙනයෑම, අපනයනය කිරීම, නැව්ගත කිරීම, ප්‍රවාහනය කිරීම, විකිණීම, පැවරීම හෝ ඒවායේ අයිතිය වෙනස් කිරීම වගඋත්තරකාර සමාගමට සහ ඊට සම්බන්ධ පාර්ශවයන්ට තහනම් කර ඇත.

තවද එම වාහන ගැලවීම, කොටස් වෙනස් කිරීම හෝ එහි අමතර කොටස් ඉවත් කිරීම ද අධිකරණය විසින් සම්පූර්ණයෙන්ම තහනම් කර තිබේ.

පෙත්සම්කාර ඇට්ලැන්ටික් ඔටෝ සමාගම වෙනුවෙන් චනුක ඒකනායකගේ උපදෙස් මත ජ්‍යෙෂ්ඨ නීතිඥ නිෂාන් සිඩ්නි ප්‍රේමතිරත්න සමඟ සෂීන් අර්සකුලරත්න, ෂෙනාලි දියස් සහ සිදත් ගජනායක යන නීතිඥ මණ්ඩලය පෙනීසිටියහ.