හිටපු පොලිස්පති මරණය ගැන පොලිසියෙන් නිවේදනයක්... සිය දිවි නසා ගැනීමක්ද, ඝාතනයක්ද නොකියයි

ශ්‍රී ලංකා පොලිසියේ 35 වන පොලිස්පතිවරයා ලෙස කටයුතු කළ සී.ඩී. වික්‍රමරත්න මහතා අද (17) උදෑසන සිදුවූ වෙඩි වැදීමකින් ජීවිතක්ෂයට පත්ව ඇති බව පොලිස් මාධ්‍ය කොට්ඨාසය නිවේදනය කරයි.

මාලඹේ පොලිස් වසමේ පරාක්‍රම පාර, තලහේන ප්‍රදේශයේ පිහිටි ඒ මහතාගේ පෞද්ගලික නිවසේදී මෙම වෙඩි වැදීම සිදුව ඇති අතර වෙඩි වැදීමෙන් බරපතළ තුවාල ලැබූ වික්‍රමරත්න මහතා වහාම නැගෙනහිර කොළඹ ශික්ෂණ රෝහලට ඇතුළත් කර ඇති අතර, එහිදී ප්‍රතිකාර ලබමින් සිටියදී ඒ මහතා මියගොස් ඇති බව නිවේදනයේ දැක්වෙයි.

සිද්ධිය සම්බන්ධයෙන් මාලඹේ පොලිස් ස්ථානය සහ බස්නාහිර පළාත් දකුණු දිසාව අපරාධ කොට්ඨාසය මගින් පුළුල් විමර්ශන ආරම්භ කර ඇත.

මියගිය හිටපු පොලිස්පතිවරයාගේ දේහය පිළිබඳ පශ්චාත් මරණ පරීක්ෂණය නැගෙනහිර කොළඹ ශික්ෂණ රෝහලේදී පැවැත්වීමට නියමිතය.

මියයන විට 63 වන වියේ පසු වූ සී.ඩී. වික්‍රමරත්න මහතා 2020 නොවැම්බර් මස 27 වනදා සිට 2023 නොවැම්බර් මස 23 වනදා දක්වා මෙරට 35 වන පොලිස්පතිවරයා ලෙස රාජකාරි කළේය.

මෙය ඝාතනයක්ද සිය දිවි නසා ගැනීමක්ද යයි  මෙතෙක් නිල ප්‍රකාශයක් සිදු කර නොමැති අතර විමර්ශන කටයුතු තවදුරටත් ක්‍රියාත්මකය.