මන්ත්‍රීවරුන්ගේ අල්මාරි ඇතුළු සියල්ල චෙක් කරයි.. පාර්ලිමේන්තුවට විශේෂ ආරක්ෂාවක්!

වියට්නාම ජනාධිපති ටෝ ලාම් හෙට (08) පාර්ලිමේන්තුව ඇමතීමට නියමිතව ඇති බැවින් මෙම රාජ්‍ය තාන්ත්‍රික අවස්ථාව වෙනුවෙන් පාර්ලිමේන්තු සංකීර්ණය තුළ සහ ඒ අවට විශේෂ ආරක්ෂක විධිවිධාන රැසක් ක්‍රියාත්මක කරන බව කථානායකවරයා අද (07) පාර්ලිමේන්තුවට දැනුම් දුන්නේය.

මන්ත්‍රීවරුන්ගේ විවේක කාමර, ඇඳුම් අල්මාරි ඇතුළු සමස්ත ගොඩනැගිලි සංකීර්ණයම විශේෂ ආරක්ෂක අංශ විසින් පරීක්ෂා කරනු ලබන අතර හෙට උදෑසන වනවිට හඳුනාගත් අධි ආරක්ෂිත කලාපයන් නැවත පරීක්ෂාවට ලක් කිරීමට නියමිත බව කතානායකවරයා සඳහන් කරයි.

ඒ අනුව විශේෂ ආරක්ෂක සැලැස්ම යටතේ අද දින සිටම පාර්ලිමේන්තු ගොඩනැගිල්ල දැඩි පරීක්ෂාවට ලක් කරන බව කතානායකවරයා සඳහන් කරයි.

ආරක්ෂක හේතූන් මත හෙට දින පාර්ලිමේන්තුවට පැමිණීමේදී හැකි තාක් දුරට පෞද්ගලික රියදුරෙකු සමඟ පැමිණෙන ලෙසත් අමුත්තන් කැටුව පැමිණීමෙන් වළකින ලෙසත් සියලුම මන්ත්‍රීවරුන්ගෙන් කතානායකවරයා ඉල්ලා ඇත.

තමන් විසින්ම රථය පදවාගෙන එන මන්ත්‍රීවරුන් වෙනුවෙන් විශේෂ සේවාවක් ක්‍රියාත්මක වන බවත් වාහනය පිවිසුම් දොරටුව අසලදී පාර්ලිමේන්තු රියදුරු සේවයට භාරදිය හැකි බවත් ඔවුන් එම වාහන නියමිත රථගාල්වල ගාල් කළ යුතු බවද කතානායකවරයා සඳහන් කරයි.

හෙට දින පාර්ලිමේන්තු මහජන ගැලරිය සාමාන්‍ය ජනතාව සඳහා විවෘත නොවන අතර එය විශේෂ ආරාධිත අමුත්තන් සඳහා පමණක් වෙන් කර ඇති බවත් යම් මන්ත්‍රීවරයෙකු සමඟ ආරාධිත අමුත්තෙකු පැමිණෙන්නේ නම්, ජයන්තිපුර පිවිසුමේදී සිය ආරාධනා පත්‍රය සහ අනන්‍යතාවය තහවුරු කළ යුතු බවද කතානායකවරයා සඳහන් කරයි.

මේ පුවත තව අයට බලන්න