සනත් කුමානායක ඇමරිකා තානාපතිකමට.. ජනාධිපති ලේකම්කමට පැලවත්තේ හිතෛෂියෙක්.. මහින්ද සමරසිංහට ලොකු තනතුරකට..

ඇමරිකා එක්සත් ජනපදයේ ශ්‍රී ලංකා තානාපතිවරයා ලෙස කටයුතු කරන මහින්ද සමරසිංහ මහතා සිය ධුර කාලය අවසන් කර එළඹෙන ජූලි මාසයේදී මෙරටට පැමිණීමට නියමිත බව 'ඩේලි මිරර්' පුවත්පත වාර්තා කරයි. ඒ අනුව, වොෂින්ටන් නුවර නව තානාපතිවරයා ලෙස ජනාධිපති ලේකම්, ආචාර්ය නන්දික සනත් කුමාරනායක මහතා පත් කිරීමට බොහෝ දුරට ඉඩ ඇති බව දැනගන්නට ඇත.

විදේශ කටයුතු අමාත්‍යාංශය හෝ ජනාධිපති කාර්යාලය විසින් මේ දක්වා මෙම පත්වීම සම්බන්ධයෙන් අවසන් තීරණයක් ගෙන නොමැති වුවද, ජනතා විමුක්ති පෙරමුණේ පැලවත්ත මූලස්ථානයේ මෑතකදී ඇති වූ උණුසුම් තත්ත්වයකින් පසුව ජනාධිපති ලේකම් ධුරයෙන් ඉල්ලා අස්වන ලෙස ආචාර්ය නන්දික මහතාට දැනුම් දී ඇති බව විශ්වාසකටයුතු ආරංචි මාර්ග සඳහන් කරයි. එහිදී ජවිපෙ ජ්‍යෙෂ්ඨ සාමාජිකයින් පිරිසක් එම ධුරය සඳහා වඩාත් සුදුසු අපේක්ෂකයෙකු පත් කරන ලෙස ඉල්ලා ඇති බව පැවසේ.

සංවර්ධන ආර්ථික විද්‍යාව පිළිබඳ ආචාර්ය උපාධියක් හිමි ආචාර්ය නන්දික සනත් කුමාරනායක මහතා, ඉහළ අධ්‍යාපන සුදුසුකම් සපිරූ නිලධාරියෙකි. ඔහු 1997 වසරේදී ශ්‍රී ලංකා රේගුවේ සහකාර රේගු අධිකාරීවරයෙකු ලෙස රාජ්‍ය පරිපාලන සේවයට එක් විය.

ජනාධිපති අනුර කුමාර දිසානායක මහතාගේ සමීපතමයෙකු වන ඔහුව, 2024 වසරේ ජනාධිපතිවරණය ජයග්‍රහණය කිරීමෙන් පසු ජනාධිපති ලේකම් ධුරය සඳහා තෝරාගනු ලැබුවේ ද ජනාධිපතිවරයා විසිනි.

කෙසේ වෙතත්, ජවිපෙ කඳවුර තුළ මෑතකදී ඇති වූ මතභේද සහ පැලවත්ත මූලස්ථානයේ ඇති වූ නොසන්සුන්තා හේතුවෙන්, පක්ෂයේ සක්‍රීය ආධාරකරුවෙකු වන ප්‍රභාත් චන්ද්‍රකීර්ති මහතා නව ජනාධිපති ලේකම්වරයා ලෙස පත් කිරීමට එක්තරා කණ්ඩායමක් යෝජනා කර ඇතැයි වාර්තාවේ සදහන්ය.

ප්‍රභාත් චන්ද්‍රකීර්ති මහතා ශ්‍රී ලංකා පරිපාලන සේවයේ විශේෂ ශ්‍රේණියේ නිලධාරියෙකු වන අතර, පසුගිය පෙබරවාරි මාසයේදී උසස්වීම් ලබා දැනට ජනාධිපති දිසානායක මහතාගේ කාර්ය මණ්ඩල ප්‍රධානී ලෙස කටයුතු කරයි. ඔහු මීට පෙර අත්‍යවශ්‍ය සේවා කොමසාරිස් ජනරාල්වරයා ලෙස ද සේවය කර ඇත.

ඉහත සඳහන් කළ පරිදි පත්වීම් සිදුවුවහොත්, මහින්ද සමරසිංහ මහතා සිය ධුර කාලය අවසන් කර එළඹෙන ජූලි මාසයේදී දිවයිනට පැමිණීමෙන් පසු, ආචාර්ය නන්දික මහතා ඇමරිකා එක්සත් ජනපදයේ ශ්‍රී ලංකා තානාපතිවරයා ලෙස වොෂින්ටන් බලා පිටත්ව යනු ඇත.

ඇමරිකාව සමඟ වෙළඳ සබඳතා වර්ධනය කර ගැනීම පිළිබඳ සාකච්ඡා අඛණ්ඩව සිදුවෙමින් පවතින පසුබිමක, ට්‍රම්ප් පරිපාලනය සමඟ කටයුතු කිරීම සඳහා ආචාර්ය නන්දික මහතාට මෙම ධුරය භාර ගැනීමට සිදුවන්නේ ඉතා තීරණාත්මක වකවානුවකදීය.

මේ අතර, මහින්ද සමරසිංහ මහතා දේශපාලන ක්ෂේත්‍රය තුළ ලබා ඇති පුළුල් අත්දැකීම් සහ විදේශ සබඳතා සැලකිල්ලට ගනිමින්, ඔහු ජූලි මාසයේදී මෙරටට පැමිණි පසු ජාතික ජන බලවේග රජයේ ප්‍රධාන උපදේශක භූමිකාවක් ඉටු කිරීමට ඉඩ ඇති බව ද දේශපාලන ආරංචි මාර්ග වැඩිදුරටත් සඳහන් කරයි.