ඇමති කෙනෙකුට ගැලපෙන්න ඉන්න ඔ්නෑ.. අලුත් ගෙදරක නවීන භාණඩ තියෙන්න ඔ්නෑ.. ඒවා ප‍්‍රශ්ණ කරන්නේ කුහකයන්..- ලාල් කාන්ත (Video)

මෑතකදී සමාජ මාධ්‍ය හා ප්‍රධාන පෙළේ මාධ්‍ය ජාලයන්හි දැඩි කතාබහට ලක්වූ සිය නව නිවස සහ එහි පවතින සුඛෝපභෝගී උපකරණ සම්බන්ධයෙන් කෘෂිකර්ම, ඉඩම්, වාරිමාර්ග සහ පශු සම්පත් අමාත්‍ය ලාල් කාන්ත මහතා විශේෂ අනාවරණයක් සිදු කර තිබේ 

ලාල් කාන්ත මහතා පවසන පරිදි, ඔහු මෙම නිවස ඉදිකිරීම සඳහා පර්චස් 7ක සහ පර්චස් 6ක බිම් කොටස් දෙකක් මිලදී ගෙන ඇත.

මෙම ඉඩම් මිලදී ගැනීම සඳහා අවශ්‍ය මුදල් සපයාගෙන ඇත්තේ මාතලේ හන්දිය ප්‍රදේශයේ නුවර පාර අසල තිබූ, ගරා වැටෙමින් පැවති සිය පවුලේ දේපළ විකුණා දැමීමෙනි.

2024 වසරේ අගභාගයේදී ඔහු මෙම නව නිවසේ පදිංචියට ගොස් ඇති අතර, එහි පැවැත්වූ දානමය පින්කමක දර්ශන මාධ්‍යයට නිකුත් වීමත් සමඟ නිවස පිළිබඳ කතාබහක් නිර්මාණය විය.

නිවස ඉදිකිරීමට සහ නඩත්තු කිරීමට අවශ්‍ය ආදායම් මාර්ග සම්බන්ධයෙන් අමාත්‍යවරයා කරුණු කිහිපයක් අවධාරණය කරයි.

තමා වසර 40කට ආසන්න කාලයක් දේශපාලනයේ නිරත වෙමින් උපයාගත් ලොකුම වත්කම වන්නේ "සමාජ ප්‍රාග්ධනය" බව ඔහු පවසයි.

අවශ්‍යතාවයක් වුවහොත් තමා හඳුනන හිතවතුන් සිය දෙනෙකුගෙන් රුපියල් ලක්ෂ පහ බැගින් වුවද කෙටි කලක් තුළ සොයා ගැනීමේ හැකියාව පවතින බව ඔහු සඳහන් කරයි.

නිවස ඉදිකිරීම සඳහා රජයේ බදු මුදල් හෝ පක්ෂයේ අරමුදල් කිසිසේත්ම යොදා නොගත් බව ඔහු සහතික වෙයි. පක්ෂයේ මුදල් සමඟ තමා කිසිවිටකත් ගනුදෙනු නොකරන බවත්, ඒවා පක්ෂයේ නිසි පටිපාටියකට අනුව පාලනය වන බවත් ඔහු පවසයි.

අතීතයේදී තමා පූර්ණකාලීනව දේශපාලනයේ යෙදෙන විට නිවස නඩත්තු වූයේ සිය බිරිඳගේ ආදායමෙන් බවත් ඔහු මෙහිදී සිහිපත් කරයි.

සමාජ මාධ්‍ය හරහා දැඩි අවධානයට ලක්වූ නිවසේ ඇති පියානෝව වසර 15ක් පමණ පැරණි එකක් බව අමාත්‍යවරයා හෙළි කරයි. එය සිය දියණිය කුඩා කාලයේ සිට සංගීත කටයුතු ඉගෙනීම සඳහා භාවිත කළ එකක් මිස අලුතින් මිලදී ගත් සුඛෝපභෝගී භාණ්ඩයක් නොවන බව ඔහු පෙන්වා දෙයි. 

එමෙන්ම නවීන නිවසක සෝෆා සෙටියක් වැනි ගෘහ භාණ්ඩ තිබීම මැජික් එකක් නොවන බවත්, එවැනි දේ ප්‍රශ්න කිරීම සමාජයේ පවතින හුදෙක් කුහකකමක් බවත් ඔහු පවසයි.

සමාජවාදියෙකු වූ පමණින් සැමදාම දුෂ්කර ජීවිතයක් ගත කළ යුතු බව තමා විශ්වාස නොකරන බව අමාත්‍යවරයා පවසයි.

අතීතයේදී මර්දනකාරී යුගවල හෝ සන්නද්ධ අරගල පැවති කාලවලදී තිබූ ජීවන රටාව වර්තමානයට අදාළ නොවන බව ඔහුගේ මතයයි.

තමා දැන් අමාත්‍යවරයෙකු ලෙස කටයුතු කරන බැවින්, එම තනතුරට ගැලපෙන පරිදි ඇඳුම් පැළඳුම් හා ජීවන රටාව වෙනස් කරගත යුතු බවත්, එසේ නොමැති වුවහොත් එය එක්තරා ආකාරයක "නිකායක්" වැනි පසුගාමී තත්ත්වයක් වනු ඇති බවත් ඔහු පවසයි.

අමාත්‍ය ලාල් කාන්ත මහතාගේ පැහැදිලි කිරීම අනුව, ඔහුගේ නිවස සහ වත්කම් වසර ගණනාවක දේශපාලන ජීවිතය තුළ ගොඩනගාගත් සබඳතා සහ පාරම්පරික දේපළ විකිණීමෙන් උපයාගත් මුදල්වල ප්‍රතිඵලයකි.

සමාජවාදය යනු සැමට හොඳින් ජීවත් වීමට මඟ සැලසීම මිස දුප්පත්කම බෙදා ගැනීම නොවන බව ඔහු අවධාරණය කරයි