අප සටන් විරාම ඉල්ලුවේ නෑ.. ඇමරිකාව පැරදී පසුබැස්සා.. හෝමුස් දිගටම වහලා..- ඉරානය

ඇමරිකානු ජනාධිපති ඩොනල්ඩ් ට්‍රම්ප් විසින් ඉරානය සමඟ පවතින සටන් විරාමය දින නියමයකින් තොරව දීර්ඝ කරන බවට කළ ප්‍රකාශය සම්බන්ධයෙන් ඉරාන ‘තස්නිම්’ පුවත් ඒජන්සිය විශේෂ විශ්ලේෂණයක් ඉදිරිපත් කර තිබේ.

ඉරානය මෙවැනි සටන් විරාමයක් ඉල්ලා නොමැති පසුබිමක, ට්‍රම්ප්ගේ මෙම හදිසි පසුබෑම පිටුපස සැඟවුණු අර්ථ කිහිපයක් තිබිය හැකි බව එම වාර්තාව පෙන්වා දෙයි.

ට්‍රම්ප් මෙම යුද්ධය තුළ තමන් සතු සියලු යුද උපායමාර්ග ක්‍රියාත්මක කර බැලූ නමුත් ඉන් කිසිදු ජයග්‍රහණයක් අත්කර ගැනීමට අපොහොසත් වී ඇත. යුද්ධය මගින් කිසිවක් ලබාගත නොහැකි බව වටහාගෙන ඇති ඔහු, තමන්ට ගැලවීමට ඇති හොඳම මග ලෙස යුද්ධයෙන් ඉවත් වීම තෝරාගෙන ඇති බව එක් මතයකි.

යුද්ධයෙන් කිසිදු ප්‍රතිඵලයක් නොලැබුණ ද, සටන් විරාමයක් ප්‍රකාශ කරමින් ලෝකය සහ ඉරානය රැවටීමට ට්‍රම්ප් උත්සාහ කරනවා විය හැකිය. ඇමරිකානු රජය හෝ ඔවුන්ගේ "කලාපීය සුනඛයා" වන ඉස්රායලය මෙම සටන් විරාම කාලය තුළ රහසිගත ත්‍රස්ත මෙහෙයුම් දියත් කිරීමේ අවදානමක් පවතින බවත්, ඉරාන නිලධාරීන් ඒ පිළිබඳව දැඩි අවධානයෙන් පසුවන බවත් තස්නිම් වාර්තාව සඳහන් කරයි.

ඇමරිකාව යුද්ධයෙන් ඉවත් වී, ලෙබනනයේ සටන් විරාමය උල්ලංඝනය කළ බව පවසමින් ඉස්රායලය පමණක් ඉරානය සමඟ යුද්ධයට පොළඹවන තත්ත්වයක් ද ඇති විය හැකිය. එහෙත් ඇමරිකාවට ඒකපාර්ශ්විකව යුද්ධයෙන් මිදී ඉස්රායලය පමණක් එහි තබා ගැනීමට ඉඩ නොදෙන බවට ඉරානය මීට පෙරද අනතුරු අඟවා ඇත.

ඇමරිකාව දිගටම නාවික අවහිරතා පවත්වාගෙන යන්නේ නම්, එය යුදමය ක්‍රියාවක් ලෙසම සලකන බව ඉරානය පවසයි. එම අවහිරතා පවතින තාක් හෝමුස් සමුද්‍ර සන්ධිය විවෘත නොකරන අතර, අවශ්‍ය වුවහොත් බලහත්කාරයෙන් එම අවහිරතා බිඳ දැමීමට ඉරානය සූදානම්ය.

යුද්ධයේ සෙවනැල්ල ඉරානය මත දිගටම තබා ගනිමින් ඉරාන ආර්ථිකය සහ දේශපාලනය අස්ථාවර මට්ටමක තැබීමට ඇමරිකාව උත්සාහ කරයි. නමුත් වර්තමානයේ ඉරානය සතුව හෝමුස් සමුද්‍ර සන්ධියේ පූර්ණ පාලනය පවතින බැවින්, ඇමරිකාව යුද බිය පතුරවන්නේ නම් හෝමුස් සමුද්‍ර සන්ධිය ද සම්පූර්ණයෙන්ම වසා තබන බවට ඉරානය අනතුරු අඟවයි.