උතුරු කොරියාවේ න්‍යෂ්ටික අවි නිෂ්පාදනය සීඝ්‍රයෙන් ඉහළට.. නව යුරේනියම් පිරිපහදු මධ්‍යස්ථානයක්..

උතුරු කොරියාව සිය න්‍යෂ්ටික අවි නිෂ්පාදන ධාරිතාවය "ඉතා බරපතල" මට්ටමකින් ඉහළ නංවා ඇති බව ජාත්‍යන්තර පරමාණුක බලශක්ති ඒජන්සියේ (IAEA) ප්‍රධානී රෆායෙල් ග්‍රොසි මහතා බදාදා ප්‍රකාශ කළේය. එරට ප්‍රධාන න්‍යෂ්ටික සංකීර්ණය වන යොන්ග්බියොන් හි ක්‍රියාකාරකම් සීඝ්‍රයෙන් ඉහළ ගොස් ඇති බවත්, යුරේනියම් සපෝෂණය කිරීම සඳහා නව පහසුකම් එක්කර ඇති බවත් ඔහු පෙන්වා දෙයි.

දකුණු කොරියාවේ සෝල් නුවරදී පැවැති මාධ්‍ය හමුවකට එක්වෙමින් ග්‍රොසි මහතා සඳහන් කළේ, මෙගාවොට් පහක ධාරිතාවයකින් යුත් ප්‍රතික්‍රියාකාරකය, සැහැල්ලු ජල ප්‍රතික්‍රියාකාරකය සහ ප්ලූටෝනියම් නිස්සාරණය කරන ඒකකය යන සියල්ලේම මෙහෙයුම් කටයුතු වේගවත් වී ඇති බවයි.

උතුරු කොරියාව සතුව මේ වන විට න්‍යෂ්ටික යුධ හිස් දුසිම් කිහිපයක් පවතින බවට ඇස්තමේන්තු කර ඇත. යොන්ග්බියොන් සංකීර්ණයේ දැනට පවතින යුරේනියම් සපෝෂණ ශාලාවලට සමාන නව ගොඩනැගිල්ලක් ඉදිකර ඇති බවත්, එහි බාහිර පෙනුම විශ්ලේෂණය කිරීමේදී යුරේනියම් පිරිපහදු කිරීමේ ධාරිතාව සැලකිය යුතු ලෙස පුළුල් කර ඇති බව පෙනී යන බවත් IAEA ප්‍රධානී අනාවරණය කළේය.

ඇමරිකාව පදනම් කරගත් උපායමාර්ගික හා ජාත්‍යන්තර අධ්‍යයන මධ්‍යස්ථානය ද චන්ද්‍රිකා ඡායාරූප ඇසුරින් මෙම තත්ත්වය තහවුරු කර ඇත. අවි නිෂ්පාදනය සඳහා යොදාගත හැකි මට්ටමට යුරේනියම් සපෝෂණය කිරීමේ හැකියාව ඇති නව කර්මාන්ත ශාලාවක ඉදිකිරීම් අවසන්ව ඇති බව ඔවුන් පෙන්වා දෙයි.

රුසියානු තාක්ෂණය උතුරු කොරියාවේ න්‍යෂ්ටික අවි වැඩසටහන සඳහා භාවිත වන බවට මෙතෙක් සාක්ෂි හමුවී නොමැති බවත්, දෙරට අතර ඇති කරගත් ගිවිසුම් සිවිල් න්‍යෂ්ටික ව්‍යාපෘතිවලට පමණක් සීමා වී ඇති බව පෙනී යන බවත් ග්‍රොසි මහතා වැඩිදුරටත් පැවසීය.

මේ අතර, දකුණු කොරියාව න්‍යෂ්ටික බලයෙන් ක්‍රියාත්මක වන සබ්මැරීන නිෂ්පාදනය කිරීමට ගෙන ඇති තීරණය පිළිබඳව ද රෆායෙල් ග්‍රොසි මහතා අදහස් දැක්වීය. පසුගිය නොවැම්බර් මාසයේදී දකුණු කොරියානු ජනාධිපති ලී ජේ මියුන්ග් සහ ඇමරිකානු ජනාධිපති ඩොනල්ඩ් ට්‍රම්ප් අතර ඇති වූ එකඟතාවය මත ඇමරිකාව මෙම ව්‍යාපෘතියට අනුමැතිය ලබා දී ඇත.

න්‍යෂ්ටික සබ්මැරීනවල ඉන්ධන දීර්ඝ කාලයක් පරීක්ෂාවට ලක් නොවන බැවින්, එම ද්‍රව්‍ය අවි නිෂ්පාදනය සඳහා යොදා නොගන්නා බවට සහතිකයක් අවශ්‍ය බවත්, ඒ පිළිබඳව IAEA සමඟ සමීපව කටයුතු කරන ලෙසත් ඔහු සෝල් පාලනයට ආරාධනා කළේය.

න්‍යෂ්ටික අවි කරා ගමන් කිරීම කිසිදු රටක ආරක්ෂාව වැඩි නොකරන බවත්, එය හුදෙක් අවි තරඟයක් නිර්මාණය වීමට පමණක් හේතු වන බවත් පවසමින් ග්‍රොසි මහතා සිය කතාව අවසන් කළේය.