ලෝකයේ මහා යුද්දය සුදානම්.. තව පැය 48කින් ඉරානය අපායට...

ඇමෙරිකානු ජනාධිපති ඩොනල්ඩ් ට්‍රම්ප් විසින් ඉරානය වෙත දැඩි අනතුරු ඇඟවීමක් කරමින් ප්‍රකාශ කර ඇත්තේ, දෙරට අතර පවතින අර්බුදකාරී තත්ත්වය සමනය කර ගැනීමට හෝ හෝමුස් සමුද්‍ර සන්ධිය විවෘත කිරීමට ඉතිරිව ඇත්තේ තවත් පැය 48ක් පමණක් බවයි.

මෙම කාලසීමාව තුළ එකඟතාවයකට නොපැමිණියහොත් ඉරානයට දරුණු විපාකවලට මුහුණ දීමට සිදුවනු ඇතැයි ඔහු පවසා තිබේ.

පසුගිය මාර්තු 26 වැනිදා ජනාධිපති ට්‍රම්ප් විසින් ඉරානයට දින 10ක සහන කාලයක් ලබා දුන්නේ නව ගිවිසුමකට එළඹීමට හෝ හෝමුස් සමුද්‍ර සන්ධිය විවෘත කිරීමටයි.

එම කාලසීමාව එළඹෙන අප්‍රේල් 6 වැනිදායින් අවසන් වීමට නියමිතය.

"කාලය වේගයෙන් ගෙවී යමින් පවතී. ඔවුන් මතට අපායේ දොරටු විවෘත වීමට පෙර තවත් ඉතිරිව ඇත්තේ පැය 48ක් පමණයි" යනුවෙන් ට්‍රම්ප් සිය 'Truth Social' සමාජ මාධ්‍ය ගිණුමෙහි සටහනක් තබමින් ප්‍රකාශ කර ඇත.

ෆොක්ස් නිව්ස් නාලිකාව සමඟ අදහස් දක්වමින් ජනාධිපතිවරයා ප්‍රකාශ කළේ, ඉරානය විසින් ඉල්ලා සිටි පරිදි ප්‍රහාර එල්ල කිරීමේ කාලය දින 7ක සිට 10 දක්වා දීර්ඝ කළ බවයි.

කෙසේ වෙතත්, නියමිත කාලය තුළ ඉරානය අවශ්‍ය පියවර නොගතහොත් එරට විදුලි බලාගාර ඇතුළු බලශක්ති යටිතල පහසුකම් ඉලක්ක කර ප්‍රහාර එල්ල කරන බවට ඔහු තර්ජනය කර තිබේ.

ඇමෙරිකාව ඉදිරිපත් කර ඇති යෝජනා "ඒකපාර්ශ්වික සහ අසාධාරණ" බව පවසමින් ඉරානය ඒවා ප්‍රතික්ෂේප කර ඇත.

මේ අතර ඉරාන පාර්ලිමේන්තු කථානායකවරයා විසින් ද දකුණු අරාබි අර්ධද්වීපයේ පිහිටි තීරණාත්මක 'බාබ් එල්-මැන්ඩෙබ්' සමුද්‍ර සන්ධිය සම්බන්ධයෙන් වක්‍ර අනතුරු ඇඟවීමක් කර තිබේ.

ලෝක වෙළඳාමෙන් සැලකිය යුතු ප්‍රමාණයක් සිදුවන මෙම මුහුදු මාර්ගයේ ආරක්ෂාව පිළිබඳව ඔහු ප්‍රශ්න කර ඇත.

සිවිල් වැසියන් පරිහරණය කරන බලශක්ති පද්ධති වෙත ප්‍රහාර එල්ල කිරීම යුද අපරාධයක් ලෙස සැලකිය හැකි බව විදේශීය විශේෂඥයන් පෙන්වා දී තිබේ.

කලාපය තුළ පවතින මෙම උණුසුම්කාරී තත්ත්වය හේතුවෙන් ගෝලීය සැපයුම් දාමයන්ට මෙන්ම ඉන්ධන මිලට ද දැඩි බලපෑමක් එල්ල වීමේ අවදානමක් මතුව ඇත