ජ’පුර රෝහලේ ජනාධිපති කාමරය සාමාන්‍ය රෝගීන්ට දිනකට හැත්තෑදහසකට ගාස්තු නියම කරයි

ශ්‍රී ජයවර්ධනපුර රෝහලේ ජනාධිපතිවරයාගේ ප්‍රයෝජනය සඳහා වෙන්කර තිබූ විශේෂිත සුඛෝපභෝගී කාමරය, දෛනික රුපියල් 70,000ක ගාස්තුවකට සාමාන්‍ය රෝගීන් සඳහා ලබාදීමට යෝජනා කර ඇත.

මේ සඳහා වන යෝජනාව රෝහල් අධ්‍යක්ෂ මණ්ඩලයේ අනුමැතිය සඳහා දැනටමත් ඉදිරිපත් කර ඇති බව රෝහල් ආරංචි මාර්ග සඳහන් කරයි.

ජනාධිපති අනුර කුමාර දිසානායක මහතා විසින් පසුගියදා බලධාරීන්ට ලබාදුන් උපදෙස් පරිදි මෙම පියවර ගෙන තිබේ.

තවදුරටත් එම කාමරය ජනාධිපතිවරයා සඳහා වෙන් කර තැබීම වෙනුවට, එය රෝගී සත්කාරක සේවා සඳහා විවෘත කරන ලෙස ජනාධිපතිවරයා උපදෙස් දී ඇත.

සම්පූර්ණ වායුසමනය කළ මෙම විශේෂ මැදිරිය සියලු පහසුකම්වලින් සමන්විත වන අතර, එය රෝහලේ පවතින සෙසු සාමාන්‍ය කාමරවලට වඩා තුන් ගුණයකින් පමණ විශාලත්වයෙන් යුක්ත වීම විශේෂත්වයකි.

මේ පුවත තව අයට බලන්න