හෝමුස් ජය ෂුවර් නෑ.. ඇමරිකාව තවත් අඩියක් පස්සට.. රුසියානු තෙල් මිලදී ගැනීමට අමෙරිකාවෙන් රටවලට අවසර..

ඉරානය සමඟ පවතින යුදමය වාතාවරණය හේතුවෙන් ලෝක වෙළඳපොළේ ඉහළ යන ඉන්ධන මිල පාලනය කිරීමේ අරමුණින්, දැනට මුහුදේ පවතින රුසියානු තෙල් නැව් සඳහා පනවා තිබූ සම්බාධක තාවකාලිකව ඉවත් කිරීමට ට්‍රම්ප් පරිපාලනය බ්‍රහස්පතින්දා පියවර ගත්තේය.

එක්සත් ජනපද භාණ්ඩාගාර දෙපාර්තමේන්තුව විසින් නිකුත් කරන ලද මෙම නිදහස් කිරීම් ලබන අප්‍රේල් 11 වනදා දක්වා බලපැවැත්වේ. ඉරාන ගැටුම හේතුවෙන් බොරතෙල් බැරලයක මිල ඩොලර් 100 සීමාවට ආසන්න වී ඇති අතර, රුසියානු තෙල් වෙළඳපොළට මුදා හැරීම හරහා බොරතෙල් බැරල් මිලියන සිය ගණනක් අලුතින් එක්වනු ඇතැයි භාණ්ඩාගාර ලේකම් ස්කොට් බෙස්න්ට් ඇස්තමේන්තු කරයි.

යුක්රේන ආක්‍රමණය හේතුවෙන් 2022 වසරේ සිට රුසියාවට එරෙහිව පනවා තිබූ දැඩි ආර්ථික සම්බාධක හමුවේ ගත් මෙම තීරණය ඇමරිකානු විදේශ ප්‍රතිපත්තියේ සුවිශේෂී හැරවුම් ලක්ෂයකි. මීට පෙර රුසියානු තෙල් මිල සීමා කිරීමට සහ ඔවුන්ගේ රහසිගත නෞකා මර්දනය කිරීමට ඇමරිකාව ප්‍රමුඛ G7 රටවල් කටයුතු කර තිබුණි.

භාණ්ඩාගාර ලේකම්වරයා සඳහන් කළේ මෙමගින් රුසියාවට යම් මූල්‍ය වාසියක් අත්වීම "අවාසනාවන්ත" තත්ත්වයක් වුවද, එය ඉතා කෙටි කාලීන පියවරක් පමණක් බවයි. "මෙම පියවර අදාළ වන්නේ දැනටමත් ප්‍රවාහනය වෙමින් පවතින තෙල් සඳහා පමණයි. රුසියානු රජයට ඉන් විශාල මූල්‍ය ලාභයක් නොලැබෙනු ඇතැයි අපි විශ්වාස කරනවා," යැයි ඔහු වැඩිදුරටත් පැවසීය.

කෙසේ වෙතත්, ඉහළ යන ඉන්ධන මිල හමුවේ ට්‍රම්ප් රජය ගත් මෙම තීරණය ප්‍රධාන පෙළේ ඩිමොක්‍රටික් සෙනෙට් සභිකයන්ගේ දැඩි දෝෂදර්ශනයට ලක්ව ඇත. ට්‍රම්ප් ජනාධිපතිවරයා විසින්ම ඇති කරගත් යුද්ධයක ආර්ථික පීඩනය සමනය කිරීමට මෙලෙස රුසියාවට සහන දීම වැරදි පූර්වාදර්ශයක් බව ඔවුන් පෙන්වා දෙයි.

විදේශ සබඳතා පිළිබඳ කවුන්සිලයේ ජ්‍යෙෂ්ඨ සාමාජික එඩ්වඩ් ෆිෂ්මන් පවසන්නේ මෙමගින් රුසියාව මත එල්ල කර තිබූ විශාල පීඩනයක් එකවරම ඉවත් වී ඇති බවයි. තවද, මෙම පියවර හරහා ඉන්ධන මිල සැලකිය යුතු ලෙස අඩු නොවනු ඇති බවත්, මෙය රුසියානු තෙල් සම්බාධක පද්ධතිය බිඳ වැටීමේ ආරම්භය විය හැකි බවත් ඔහු අනතුරු අඟවයි.

ඉරානයට එරෙහිව ඇමරිකාව ගෙන යන ක්‍රියාමාර්ග පිළිබඳව දැනටමත් සැකයෙන් පසුවන යුරෝපීය රටවල් සහ ඇමරිකාව අතර පවතින බෙදීම, රුසියාවට සහන සැලසීමේ මෙම නව තීරණයත් සමඟ තවදුරටත් උග්‍ර වනු ඇතැයි දේශපාලන විශ්ලේෂකයෝ පවසති.

-lankacnews