තුන්වන ලෝක යුද්දය ඇරඹේවි...- රුසියාව..

ඇමෙරිකානු ජනාධිපති ඩොනල්ඩ් ට්‍රම්ප් විසින් ක්‍රියාත්මක කරනු ලබන පාලන තන්ත්‍ර වෙනස් කිරීමේ මෙහෙයුම් හේතුවෙන් තුන්වන ලෝක යුද්ධයක් ආරම්භ වීමේ අවදානමක් පවතින බව රුසියාවේ හිටපු ජනාධිපති සහ වත්මන් ආරක්ෂක කවුන්සිලයේ නියෝජ්‍ය සභාපති දිමිත්‍රි මෙඩ්විඩෙව් අනතුරු අඟවයි.

TASS පුවත් සේවය සමඟ පැවති සම්මුඛ සාකච්ඡාවකදී ඔහු කියා සිටියේ, තාක්ෂණික වශයෙන් තුන්වන ලෝක යුද්ධය තවමත් ආරම්භ වී නොමැති වුවද, ට්‍රම්ප්ගේ මෙම උමතු ගමන් මග හේතුවෙන් ඕනෑම මොහොතක එවැනි ගැටුමක් ඇවිලී යා හැකි බවයි.

ඉරාන උත්තරීතර නායක අයතුල්ලා අලි කමේනි ඝාතනය කිරීම ට්‍රම්ප් අතින් සිදුවූ “බරපතල වැරැද්දක්” බවත්, එමගින් සමස්ත ඇමෙරිකානුවන්ගේ ජීවිත අවදානමට ලක් කර ඇති බවත් ඔහු පෙන්වා දුන්නේය.

මෙඩ්විඩෙව්ට අනුව, මෙම ප්‍රහාරය ලෝක ආධිපත්‍යය පවත්වාගෙන යාම සඳහා ඇමෙරිකාව සහ එහි මිත්‍ර රටවල් දියත් කරන පුළුල් යුද්ධයක කොටසකි.

කමේනිගේ අභාවයෙන් පසු ඉරානය සිය න්‍යෂ්ටික අවි නිපදවීමේ උත්සාහයන් තෙගුණයකින් වැඩි කරනු ඇති බවට ද ඔහු අනාවැකි පළ කළේය.

රුසියාවට ද මෙවැනිම ප්‍රහාරයක් එල්ල වීමේ අවදානමක් පවතීද යන්න පිළිබඳව අදහස් දක්වමින් මෙඩ්විඩෙව් සඳහන් කළේ, රුසියාවට එරෙහිව එවැනි පියවරක් නොගැනීමට ඇති එකම සහතිකය “න්‍යෂ්ටික යුද්ධයක පිරිවැය පිළිබඳව ඇමෙරිකාව රුසියාවට දක්වන බිය” පමණක් බවයි.

කෙසේ වෙතත්, ඉරානය මෙම පසුබෑමෙන් නැවත නැගී සිටිනු ඇති බවත්, ඇමෙරිකානු ක්‍රියාකලාපය නිසා ඉරාන සමාජය තවදුරටත් ඒකාබද්ධ වී ඇති බවත් ඔහු වැඩිදුරටත් ප්‍රකාශ කළේය