ඉන්දියාවේ සහාය ඇතිව කරන ඩිජිටල් හැඳුනුම්පත් ව්‍යාපෘතිය ලබන සප්ටම්බරයට පෙර පටන් ගනී!

ඉන්දීය රජයේ රුපියල් බිලියන 10.4ක ප්‍රදානයක සහාය ඇතිව ක්‍රියාත්මක වීමට නියමිත මෙරට ඩිජිටල් යටිතල පහසුකම් නවීකරණය කිරීමේ ප්‍රධාන වැඩසටහනක් වන ශ්‍රී ලංකා අනන්‍ය ඩිජිටල් හැඳුනුම්පත් ව්‍යාපෘතිය 2026 තුන්වැනි කාර්තුව වන විට දියත් කිරීමට නියමිතය.

මෙම පද්ධතිය ඉන්දියාවේ මොඩියුලර් විවෘත-මූලාශ්‍ර අනන්‍යතා වේදිකාව (MOSIP) මත ගොඩනගා ඇති අතර එය පිලිපීනය සහ ඉතියෝපියාව වැනි රටවල ද භාවිත වන විවෘත-මූලාශ්‍ර රාමුවකි.

ශ්‍රී ලංකා අනන්‍ය ඩිජිටල් හැඳුනුම්පත් ව්‍යාපෘතිය යටතේ අද්විතීය අනන්‍යතාවක් ලබා දීම සඳහා මුහුණේ, ඇඟිලි සලකුණු සහ අක්ෂි ස්කෑන් දත්ත ඇතුළු ජෛවමිතික දත්ත ඇතුළත් කරනු ඇත.

එය ‘e-Locker’ ලෙස හඳුන්වන ජංගම යෙදුමක් ඇතුළත් ඩිජිටල්-පළමු සේවා සැපයීම ද සක්‍රීය කරනු ඇත.

ආරම්භක සැකසුම සඳහා ඉන්දියානු සමාගම් පහක් (Infosys, TCS, Protean, RailTel සහ BEL) සමඟ කෙටි ලැයිස්තුගත කර ඇති ඉන්දියානු විශේෂඥතාවයෙන් සහාය ලැබෙන අතර, පද්ධතිය කළමනාකරණය කර ක්‍රියාත්මක කරනු ලබන්නේ දේශීය ශ්‍රී ලාංකික සේවා සපයන්නකු (MSP) විසින් බව පුද්ගලයන් ලියාපදිංචි කිරීමේ දෙපාර්තමේන්තුව සඳහන් කරයි.

දත්ත ශ්‍රී ලංකා රජයේ පාලනය යටතේ පවතිනු ඇති බවත්, මාස්ටර් සිස්ටම්ස් ඉන්ටග්‍රේටර් (MSI) සඳහා වන ටෙන්ඩර් ක්‍රියාවලිය ක්‍රියාත්මක වෙමින් පවතින බවත්, 2026 මුල් භාගය වන විට අවසාන කොන්ත්‍රාත් ප්‍රදානය අපේක්ෂා කරන බවත් එම දෙපාර්තමේන්තු ආරංචි මාර්ග පැවසීය.

2030 ඉලක්ක කරගත් ශ්‍රී ලංකාවේ ඩිජිටල් ආර්ථිකය සඳහා මෙම ව්‍යාපෘතිය පදනම් අංගයක් ලෙස සළකනු ලබන අතර, පවතින විද්‍යුත් ජාතික හැඳුනුම්පත, ජෛවමිතික සහ ජනවිකාස දත්ත ඒකාබද්ධ කිරීම ඇතුළත් වේ.

4G/5G ආවරණය පුළුල් කිරීම සහ තාක්ෂණික අපනයන ප්‍රවර්ධනය කිරීම සඳහා ‘අතථ්‍ය(Virtual) විශේෂ ආර්ථික කලාප’ හඳුන්වාදීම රටේ ඩිජිටල් ආර්ථික භූ දර්ශනය සංවර්ධනය කිරීමේ අනෙකුත් ප්‍රධාන වැඩසටහන් අතර විය.

DataReportal දත්ත වාර්තාකරණය පිළිබඳ ගෝලීය ඩිජිටල් වාර්තාවට අනුව 2025 අවසානය වන විට ශ්‍රී ලංකාවේ මිලියන 13.9ක් පමණ පුද්ගලයන් අන්තර්ජාලය භාවිත කරමින් සිටි අතර එය මුළු ජනගහනයෙන් දළ වශයෙන් සියයට 59.7ක අනුපාතයක් නියෝජනය කරයි.

මිලියන 9ක් පමණ ක්‍රියාකාරී සමාජ මාධ්‍ය පරිශීලකයන්සමග ෆේස්බුක් ප්‍රමුඛ වේදිකාව ලෙස පවතින බව අනාවරණය වී ඇත.