අයවැය පැරදුනාට ජනවරම එහෙමමයි.. දිගටම නගරාධිපති මමයි..- ව‍්‍රායි

කොළඹ මහා නගර සභාවේ අයවැය පළමු වර කියවීමේදී පරාජයට පත් වුවද, සැලසුම් කළ සංවර්ධන ව්‍යාපෘති සහ මහජන සේවාවන් කිසිදු බාධාවකින් තොරව ඉදිරියට ගෙනයන බව නගරාධිපතිනිය ප්‍රකාශ කරයි.

පළමු වර කියවීමේදී එල්ල වූ මෙම පසුබෑම නොතකා, අයවැය දෙවන වර කියවීම සඳහා ඉදිරිපත් කරන බවත්, එහිදී අවශ්‍ය වන්නේ නම් සංශෝධන සිදු කිරීමට අවස්ථාව පවතින බවත් නගරාධිපතිනී ව්රායි කැලී බැල්තසාර් සඳහන් කළාය.

මෙම අයවැය ලේඛනය විපක්ෂ සභිකයන් ද ඇතුළුව පුළුල් උපදේශන සහ සහභාගිත්ව ක්‍රියාවලියක් ඔස්සේ ඉතා විනිවිදභාවයකින් යුතුව සකස් කරන ලද්දකි. 

කෙසේ වෙතත්, පළමු වර කියවීමේදී එය සම්මත කර ගැනීමට අවශ්‍ය ඡන්ද සංඛ්‍යාව හිමි නොවීය. 

මෙම තත්ත්වය දේශපාලන අරමුණු මත පදනම් වූවක් මිස, අයවැයේ අන්තර්ගතය සම්බන්ධයෙන් වූ ප්‍රතික්ෂේප කිරීමක් නොවන බව නගරාධිපතිනිය අවධාරණය කළාය.

නගරාධිපතිනිය වැඩිදුරටත් පෙන්වා දුන්නේ සිය ජනවරම නොවෙනස්ව පවතින බවයි. 

ලබන සති දෙක ඇතුළත අයවැය බලාත්මක කිරීමට අපේක්ෂා කරන අතර, එමඟින් කොළඹ නගරයේ සංවර්ධන කටයුතු සහ නගර සභා සේවාවන් බාධාවකින් තොරව පවත්වාගෙන යාමට හැකි වනු ඇත.

තම පරිපාලනයේ ප්‍රමුඛතම වගකීම වන්නේ කොළඹ නගරයේ පදිංචිකරුවන්ගේ අවශ්‍යතා සපුරාලීම සහ අඛණ්ඩව කාර්යක්ෂම සේවාවක් සැපයීම බව ඇය යළිත් තහවුරු කළාය.

පවතින පළාත් පාලන නීති රීතිවලට අනුව, නගර සභාවක අයවැය ලේඛනයක් පරාජයට පත් වුවද, නගරාධිපතිවරයෙකුට වසර දෙකක් දක්වා සිය ධුරයේ රැඳී සිටිමින් පරිපාලන කටයුතු මෙහෙයවීමට නීතිමය අවකාශය හිමි වේ.