''2028 අපට තීරණාත්මකයි'' - විපක්ෂ නායකවරයා ඉන්දීය පුවත් සේවයක් හා සම්මුඛ සාකච්ඡාවේදී කියයි

2028 වසරේදී 2022 වසරේ ආර්ථික අර්බුදයේ පුනරාගමනයක් සිදු නොවීමට නම් වේගවත් ආර්ථික වර්ධනයක් මෙන්ම අපනයන මූලික වර්ධනයක් පැවතිය යුතු බව විපක්ෂ නායක සජිත් ප්‍රේමදාස පවසනවා.

සිය ඉන්දීය සංචාරය අතරතුර විපක්ෂ නායකවරයා එරට ප්‍රවෘත්ති සේවාවක් සමග පැවැති සම්මුඛ සාකච්ඡාවකදී පැවසුවේ, එම අවශ්‍ය ඉලක්ක රජය විසින් සාක්ෂාත් කර නොගන්නා බව පෙනීයන බවයි.

13 වැනි ආණ්ඩුක්‍රම ව්‍යවස්ථා සංශෝධනය අනාගතයේදී ක්‍රියාත්මක වේවිද, නැතහොත් වචනයට පමණක් සීමා වේවිද?

''සෑම විටම අපගේ ස්ථාවරය වූයේ, අපි 13 වැනි සංශෝධනය ක්‍රියාත්මක කරන බවයි. එය අපේ රටේ පළාත් නවයම ආවරණය කරනවා. අපගේ ස්ථාවරය ගැන අනුමාන කිරීමට අවශ්‍යතාවක් නැහැ.13 වැනි සංශෝධනය ක්‍රියාත්මක කිරීම ගැන අපගේ ස්ථාවරය ඉතාමත් පැහැදිලියි.''

මේ මස අගදී ඒකාබද්ධ විපක්ෂ විරෝධතාවක් සැලසුම් කර තිබෙනවා, නමුත් ඔබේ පක්ෂය එයට සහභාගී වන්නේ නැහැ. ඊට විශේෂිත හේතුවක් තිබෙනවාද?

''ක්‍රියාශීලී විපක්ෂයක් ලෙස අපි ජනතාව වෙනුවෙන් පෙනී සිටිනවා. ජනතාවගේ අයිතිවාසිකම්, මනුෂ්‍ය අයිතිවාසිකම් පුළුල් අර්ථයෙන් තහවුරු කරනවා. ජනතාව සාමාන්‍ය දේශපාලනයට එකඟ වෙන්නේ නැහැ. ඒ නිසා අවසානයේදී, දේශපාලන ධුරාවලියට වඩා ජනතාවගේ අවශ්‍යතා සැපිරීමට හැකි වන පරිදි ජාතික ප්‍රතිපත්ති සකස් කිරීම ජනතාවගේ කැමැත්තයි. එම අරමුණු සාක්ෂාත් කර ගැනීම සඳහා අපි අපගේම දේශපාලන උපායමාර්ග අනුව කටයුතු කරනවා.''

දේශපාලනඥයන් විදේශ රටකදී දේශීය දේශපාලනය ගැන කතා කිරීමට අකමැති බව මම දන්නවා. නමුත් ආණ්ඩුව මැතිවරණයේදී ලබා දුන් ප්‍රධාන පොරොන්දු ඉටු කිරීමට හැකි වී තිබෙනවා කියා ඔබ සිතනවාද?

2028 වන විට ජාත්‍යන්තර ණය හිමියන්ට ආපසු ගෙවිය යුතු මුදල් ගෙවීමට හැකි වේවි කියා ඔබ බලාපොරොත්තු වෙනවාද?

''පැහැදිලිවම මට කියන්න පුළුවන්, කරන ලද ප්‍රකාශ සහ සිදුවෙමින් පවතින ක්‍රියාමාර්ග අතර විෂමතාවක් තිබෙනවා. 2028 අපට තීරණාත්මකයි . ඒ වන විට අපගේ විදේශ ණය බැඳීම් මහා පරිමාණයෙන් ඉටු කිරීමට සිදුවෙනවා. එය කිරීමට නම්, අපට වේගවත් ආර්ථික වර්ධනයක්, වඩා හොඳ විදේශ විනිමය සංචිතයක්, අපනයන මූලික වර්ධනයක් සහ අපනයන මූලිකවූ ආදායමේ විශාල දියුණුවක් තිබිය යුතුයි. අපගේ විදේශ ප්‍රේෂණ ඉතා ඉහළ මට්ටමක පවතින බව සහතික කළ යුතුයි. වඩාතම වැදගත් දෙය නම්, අපට මහා පරිමාණ විදේශ සෘජු ආයෝජන තිබිය යුතුයි. එම සියලු අංශවලින්, අප අවශ්‍ය ඉලක්ක සාක්ෂාත් කර නොගන්නා බව පෙනෙනවා. අපි ගමන් කරන්නේ හරිම හෙමින්. 2028 යනු 2022 පුනරාගමනයක් නොවිය යුතුයි. ඒ නිසා එවැනි සමාජ බිඳවැටීමක් නැවත සිදු නොවන බව සහතික කිරීමටනම් අප සියලු දෙනාම රටක් ලෙස එක්සත් විය යුතුයි. නමුත් එය ඉතා අභියෝගාත්මකයි. බාධකවලින් පිරී තිබෙන ගමනක්. දැඩි සහ, නිවැරදි ප්‍රවේශයක් සමඟ සත්‍යවාදී සංවර්ධන ප්‍රතිපත්තියක් අපට තිබිය යුතුයි.''

ඩොනල්ඩ් ට්‍රම්ප්ගේ තීරුබදු ඔබේ රටට බලපා තිබෙනවාද? ඔබ ඒ ගැන කනස්සල්ලෙන්ද?

''අපගේ වෙළඳාම විවිධාංගීකරණය කර නොතිබීම අපට ඇති ගැටලුවක්. ඒ නිසා රටක් ලෙස අපි අපනයන වෙළඳපොළ විවිධාංගීකරණ ප්‍රතිපත්තිය ප්‍රවර්ධනය කළ යුතුයි. එක්සත් ජනපද පරිපාලනය සමඟ නිර්මාණාත්මකව සහ ඵලදායී ආකාරයෙන් කටයුතු කිරීමෙන් මෙම තීරුබදු අනුපාත 20% ට පහළ මට්ටමකට ගෙන ඒමට කටයුතු කළ යුතුයි.''