කජ්ජා ඝාතනයට කිසිඳු දේශපාලකයෙකුගේ මැදිහත්වීමක් සිදුව ඇතැයි හෙලිව නෑ..

බස්නාහිර පළාතේ උතුරු අපරාධ කොට්ඨාසය මගින් රඳවාගෙන ප්‍රශ්න කරන අවස්ථාවේ දී, බැකෝ සමන් නමැත්තා වැදගත් කරුණු කිහිපයක් හෙළි කර ඇත.

ඔහුගේ ප්‍රකාශ අනුව, කජ්ජා ඝාතනය කිරීමේ වගකීම මුලින් භාරගැනීමට තවත් අපරාධකරුවන් කණ්ඩායමක් සූදානමින් සිටිය ද, එහිදී කජ්ජාගේ දරු දෙදෙනා ද මියයාම නිසා ඔවුන් එම වගකීම භාර ගැනීමෙන් වැළකී ඇත.

තමන් විසින් කජ්ජා ඝාතනයට හේතු වූයේ, තමාගේ මත්ද්‍රව්‍ය ජාලය පිළිබඳ තොරතුරු හෙළිකිරීම බව ද සැකකරු බැකෝ සමන් පවසා තිබේ.

තවද, තමන්ට එල්ල වී ඇති චෝදනාවලින් මිදීම සඳහා ඔහු කජ්ජාගේ බිරිඳගේ බැංකු ගිණුමකට රුපියල් ලක්ෂ තුන හමාරක මුදලක් තැන්පත් කළ බව පිළිගෙන ඇත.

මෙයින් අපේක්ෂා කළේ කජ්ජාගේ පවුලේ සාමාජිකයන් සමඟ සබඳතා ගොඩනගා ගැනීමට බව ද ඔහු විමර්ශන නිලධාරීන්ට පවසා තිබේ.

කෙසේ වෙතත්, කජ්ජාගේ දරුවන් දෙදෙනා මරා දැමීමට තමාට කිසිසේත්ම අදහසක් නොතිබූ බවට බැකෝ සමන් එහිදී අවධාරණය කර ඇතැයි වාර්තා වේ.

මේ අතර, සම්පත් මනම්පේරි නමැති සැකකරු ද විමර්ශන නිලධාරීන් හමුවේ ප්‍රකාශයක් කරමින් කියා සිටියේ, කජ්ජා ඝාතනය ගැන තමා කිසිවක් දැන නොසිටි බව ය. පොලිසිය සඳහන් කළේ, ඔහු බැකෝ සමන්ගේ උපදෙස් මත ඝාතනයක් සඳහා ගිනිඅවි සැපයුව ද, ඒවා භාවිත කරන්නේ කජ්ජාව මරා දැමීමට බව නොදැන සිටි බව සැකකරු පැවසූ බවයි.

සම්පත් මනම්පේරිගේ මෙම ප්‍රකාශ තහවුරු කර ගැනීම සඳහා තවදුරටත් පරීක්ෂණ සිදුකරන බව පොලිසිය ප්‍රකාශ කළේය. ඊට සමගාමීව, කජ්ජා ඝාතනය සිදු වූ කාලසීමාවට අදාළව සම්පත් මනම්පේරිගේ දුරකථන දත්ත වාර්තාවක් ලබා ගැනීමට ද බස්නාහිර උතුර අපරාධ කොට්ඨාසය පියවර ගෙන තිබේ.

කෙසේ නමුත්, කජ්ජා ඝාතනය හා සම්බන්ධව මේ වන විට කිසිදු දේශපාලන මැදිහත්වීමක් සිදුව ඇති බවට කරුණු හෙළි වී නොමැති බව වාර්තා වේ.