තවත් BYD වාහන 1000ක් රේගුවෙන් රදවාගනී.. මෙවර Atto, Atto2, Atto3, Dolphin ඇතුලත්…

මෝටර් රථවල එන්ජින් ධාරිතාව ප්‍රකාශ කිරීම සම්බන්ධයෙන් පැන නැගී ඇති මතභේදයක් හේතුවෙන් චීනයේ නිෂ්පාදිත BYD සන්නාමයේ විදුලි රථ 1,000ක් පමණ ශ්‍රී ලංකා රේගුව විසින් යළිත් වරක් අත්අඩංගුවට ගෙන ඇත. වාහන සඳහා බදු ගණනය කරනු ලබන්නේ මෙම එන්ජින් ධාරිතාව මත බැවින්, ප්‍රකාශිත ධාරිතාව සහ සත්‍ය ධාරිතාව අතර වෙනස්කම් සම්බන්ධයෙන් රේගුව මේ වන විට පරීක්ෂණ පවත්වයි.

මෙම අත්අඩංගුවට ගැනීම සිදුවන්නේ, මීට පෙර අත්අඩංගුවට ගත් BYD විදුලි රථ 1,000ක පළමු තොගය, නීතිමය කටයුතු අවසන් වන තෙක් බැංකු ඇපකරයක් ලබා දීමෙන් පසුව ආනයනකරු විසින් නිදහස් කරගත් පසුබිමකය.

නව අත්අඩංගුවට ගැනීම සම්බන්ධයෙන් අදහස් දැක්වූ රේගු නිලධාරියෙක් “මෙවර අත්අඩංගුවට ගත්තේ Atto 3 මාදිලිය පමණක් නොවේ. Atto 1, Atto 2, සහ Dolphin මාදිලි ද මෙයට ඇතුළත්,” යනුවෙන් ප්‍රකාශ කළේය.

පළමු අත්අඩංගුවට ගැනීම සිදුවූයේ Atto 3 වර්ගයේ වාහන සඳහාය. එම වාහන 100 kW මෝටරයක් සහිත බව ප්‍රකාශ කර තිබුණ ද, ඒවා සාමාන්‍යයෙන් 150 kW මෝටරයක් සමඟ නිෂ්පාදනය වන බවට ලද පැමිණිල්ලක් මත මෙම පරීක්ෂණය ආරම්භ විය. 100 kW මෝටර් වාහනයක් සඳහා රුපියල් මිලියන 2.4ක බදු අය වන අතර, 150 kW වාහනයක් සඳහා එම මුදල රුපියල් මිලියන 5.4ක් දක්වා ඉහළ යයි.

මෙවර අත්අඩංගුවට ගැනීම්වලට 150 kW පමණක් නොව, ඊට අඩු ධාරිතා සහිත මෝටර් රථ ද ඇතුළත් බවට වාර්තා වේ. සමහර වාහන 49 kW ලෙස ප්‍රකාශ කර තිබුණ ද, ඒවායේ සත්‍ය ධාරිතාව 70 kW විය හැකි බවට සැක කෙරේ. නවතම අත්අඩංගුවට ගැනීම්වලට අනුව, Atto 1 කාණ්ඩයේ වාහන 200ක්, Atto 2 කාණ්ඩයේ 100ක්, Atto 3 කාණ්ඩයේ 450ක් සහ Dolphin කාණ්ඩයේ 250ක් ඇතුළත් වන බවට තවත් ආරංචි මාර්ගයක් තහවුරු කරයි.

තම සමාගම විසින් නීතිමය කටයුතු අවසන් වන තෙක් අමතර බදු ගෙවීමට වගකීම භාර ගනිමින්, පළමු වාහන තොගය බැංකු ඇපකරයක් මත නිදහස් කර ගත් බව JKCG Auto සමාගම සඳහන් කරයි. ඔවුන් බලධාරීන් සමඟ මෙම ගැටලුව නිරාකරණය කර ගැනීමට සාකච්ඡා කරමින් සිටින බවත්, නවතම වාහන තොගය ද ඉක්මනින් නිදහස් කර ගෙන පාරිභෝගිකයන්ට ලබා දීමට අපේක්ෂා කරන බවත් සමාගමේ ප්‍රකාශකයෙක් පැවසීය.

වාහනවල සත්‍ය ධාරිතාව තහවුරු කර ගැනීම සඳහා ශ්‍රී ලංකා බලධාරීන් විසින් BYD වාහන හයක් දේශීය මෙන්ම ජාත්‍යන්තරව පරීක්ෂා කිරීම සඳහා යොමු කර තිබේ.

සාම්ප්‍රදායික ඉන්ධන වාහනවලදී එකම මාදිලියේ විවිධ එන්ජින් ධාරිතා සහිත වාහන (උදා: 1300cc, 1500cc, 1800cc) තිබීම සාමාන්‍ය දෙයකි. නමුත්, විදුලි රථවල ක්‍රියාකාරිත්වය වඩාත් සංකීර්ණ වන අතර, එහිදී මෝටර (මෘදුකාංග මගින් සීමා කරන ලද), ඉලෙක්ට්‍රොනික් පාලන ඒකක (ECUs), සහ බැටරි කළමනාකරණ පද්ධති ආදිය විශේෂිත රිය පැදවීමේ ලක්ෂණ ලබා දීම සඳහා ක්‍රියා කරයි.

සෙසු විදුලි රථ නිෂ්පාදකයන් ද මේ ආකාරයෙන්ම නිෂ්පාදකයා විසින් වර්ගීකරණය කරන ලද මෝටර් සහිත මාදිලි විදේශීය හා දේශීය වෙළෙඳපොළවල අලෙවි කරනු ලබයි. මෙම කාරණය සම්බන්ධයෙන් අවසන් තීරණයක් ගැනීමට ශ්‍රී ලංකා බලධාරීන් තවමත් කටයුතු කර නැත.

John Keells CG Auto