විකට නලු හල්ලොලුවගේ තිර පිටපත අධිකරණයේ දිග හැරෙයි!

ජනාධිපතිවරයා හා රජය අපහසුතාවට පත් කිරීමේ අරමුණක් ජාතික ලොතරැයි මණ්ඩලයේ හිටපු ක්‍රියාකාරි අධ්‍යක්ෂ සැකකාර තුසිත හල්ලොලුවට තිබී ඇති බව ඔහුගේ වාහනයට වෙඩි තැබීමේ සිද්ධිය සම්බන්ධයෙන් සිදුකරන විමර්ශනවලදී පෙනීයන වන බව කොළඹ අපරාධ කොට්ඨාසය ඊයේ (අගෝ. 28) කොළඹ අතිරේක මහේස්ත්‍රාත් ලහිරු සිල්වා වෙත දැන්වීය.

තමන්ගේ වාහනයට කිසියම් පිරිසක් වෙඩි තැබූ බවට ඔහු ප්‍රකාශ කර ඇති නමුත් එය පදනම් විරහිත ප්‍රකාශයක් බවත් යම් අයකුට ඔහුට වෙඩි තැබීමට අවශ්‍ය වූයේ නම් එසේ කිරීමට එම පුද්ගලයන්ට ඕනෑ තරම් අවස්ථාව තිබූ බව එම සිද්ධියට අදාළ සී.සී.ටී.වී. දර්ශන පරීක්ෂා කිරීමේදී පෙනී යන බවද විමර්ශන නිලධාරීහු අධිකරණය හමුවේ පැවැසූහ.

විමර්ශනයේදී අනාවරණය වන කරුණු කාරණා අනුව සංවිධානාත්මක අපරාධකරුවන් පිරිසක් යොදාගෙන ඔහු විසින් ම ඔහුගේ වාහනයට වෙඩි තබාගෙන ඇති බව පැහැදිලිව පෙනෙන්නට තිබෙන බවද එම නිලධාරීහු අධිකරණයට පෙන්වා දුන්හ.

එම වෙඩි තැබීමේ සිද්ධිය සම්බන්ධයෙන් මේ වන විට සැකකරුවන් දසදෙනෙකු අත්අඩංගුවට ගෙන රක්ෂිත බන්ධනාගාරගත කර ඇති බවත් තම වාහනයට කිසියම් පිරිසක් නාරාහෙන්පිට ප්‍රදේශයේදී වෙඩි තැබූ බවට ව්‍යාජ පැමිණිල්ලක් සිදුකිරීමේ චෝදනාව සම්බන්ධයෙන් සැකකාර තුසිත හල්ලොලුව අත්අඩංගුවට ගෙන අධිකරණයට ඉදිරිපත් කළ බවද එම නිලධාරීහු පැවැසූහ.

එම වෙඩි තැබීමේ සිද්ධිය සැකකාර තුසිත හල්ලොලුව විසින් ම නිර්මාණය කළ එකක් බවට කරුණු අනාවරණය වීමෙන් අනතුරුව ඔහු කොළඹ අපරාධ කොට්ඨාසය වෙත කැඳවා ප්‍රකාශයක් ලබාගත් බව ද නිලධාරීහු අධිකරණය හමුවේ පැවැසීය.

සිද්ධිය සම්බන්ධයෙන් අධිකරණයට කරුණු වාර්තා කිරීමෙන් අනතුරුව සැකකාර තුසිත හල්ලොලුව සතු ජංගම දුරකතනය කොළඹ අපරාධ කොට්ඨාසය භාරයට පත්කරන ලෙසට අධිකරණය මඟින් ඔහුට නියෝගයක් නිකුත් කර තිබියදී එම දුරකථනය සිද්ධිය වූ අවස්ථාවේදී විනාශ වී ඇති බව පවසමින් ඔහු වෙනත් සිම්පතක් සහිත දුරකතනයක් අපරාධ කොට්ඨාසයට ඉදිරිපත් කළ බව ද පැවසූ නිලධාරීන් සිද්ධිය සම්බන්ධයෙන් වැඩිදුරටත් කරුණු දක්වමින් අධිකරණය හමුවේ කියා සිටියේ, එසේ විනාශ වූ බව පැවැසූ දුරකථනයෙන් ඔහු දුරකතන සංවාදවල යෙදී ඇති බව ය.

සිද්ධිය සම්බන්ධයෙන් තවදුරටත් විමර්ශන සිදු කරන බැවින් සැකකරුට ඇප ලබා නොදෙන ලෙසට විමර්ශන නිලධාරීන් කළ කරුණු දැක්වීම් සැලකිල්ලට ගත් මහේස්ත්‍රාත්වරයා ඔහු සැප්තැම්බර් මස 4 දින දක්වා තවදුරටත් රක්ෂිත බන්ධනාගාරගත කළේ ය.