‘ශෂීන්ද්‍රට නින්ද යන්නෙ නෑ’ - අධිකරණයේදී ඇප ඉල්ලයි!

හිටපු රාජ්‍ය අමාත්‍ය ශෂීන්ද්‍ර රාජපක්ෂ අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් පසුගියදා අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාරගත කළේය.

එහිදී සැකකාර හිටපු රාජ්‍ය අමාත්‍ය ශෂීන්ද්‍ර රාජපක්ෂ වෙනුවෙන් පෙනීසිටි නීතිඥවරයා ඇප ඉල්ලීමක් සිදුකරමින් පවසා සිටියේ,

“ස්වාමීනී මෙම සිද්ධියට අදාළ ගොඩනැගිල්ල 2022 පැවති අරගලයෙන් ගිනි තැබීමට ලක් කරලා විනාශ වෙලා තියෙනපි මේ ඉඩම මහවැලි අධිකාරියට අයත් ඉඩමක් මගේ සේවාදායකයා මේ ඉඩමේ අයිතිකරු නෙවෙයි. විනාශ වූ අදාළ ගොඩනැගිල්ලට මනෝජ් ඒකනායක නැමැති පුද්ගලයෙක් තමයි වන්දි මුදල් ලබාගෙන තිබෙන්නේ.

අල්ලස් කොමිසම ඊට මගේ සේවාදායකයා කුමන්ත්‍රණය කළ බව චෝදනා කරමින් අත්අඩංගුවට ගත්තා. සිද්ධියට අදාළ ප්‍රධාන සැකකරුවන් එළියේ සිටියදී තමයි මාගේ සේවාදායකයා අත්අඩංගුවට ගෙන තිබෙන්නේ.ස්වාමීනී මෙම සිද්ධියට අදාළ සියලුම සැකකරුවන් පිළිබඳව විමර්ශනය කළ යුතුයි.

එමෙන්ම මගේ සේවාදායකයා නින්ද නොයන රෝගයකින් පෙළෙනවා. ඉන් ඔහුගේ ජිවීතයට මරණීය තර්ජන ඇති වීමේ අවදානමක් තිබෙනවා. ඔක්තෝබර් මාසයේ ඔහු නීතී විද්‍යාලයේ පළමු වසරේ විභාගය සඳහා ද මුහුණ දීමට සිටින බැවින් සුදුසු ඇපයක් මත මාගේ සේවාදායකයා මුදා හරින ලෙස මම අධිකරණයෙන් ඉල්ලා සිටිනවා.”

අල්ලස් කොමිසමේ නිලධාරීන් හා විත්තියේ නීතිඥවරු ඉදිරිපත් කළ කරුණු සලකා බැලීමෙන් අනතුරුව කොළඹ ප්‍රධාන මහෙස්ත්‍රාත් තනූජා ලක්මාලී ජයතුංග මහත්මිය අත්අඩංගුවට ගෙන රක්ෂිත බන්ධනාගාරගත කර සිටි ශෂීන්ද්‍ර රාජපක්ෂ තවදුරටත් ලබන (26) වනදා දක්වා රක්ෂිත බන්ධනාගාරගත කරන ලෙස නියම කළාය.