රනිල් ඇල්ලූ 'අසාධාරණය' කියන්න තලතා ජීඑල් රුවන් ඇතුළු පිරිස තානාපති නිවාස වෙත!

හිටපු ජනාධිපති රනිල් වික්‍රමසිංහ මහතා අත්අඩංගුවට ගැනීම සම්බන්ධයෙන් විපක්ෂයේ දේශපාලන පක්ෂ කොළඹ සිටින රාජ්‍ය තාන්ත්‍රික ප්‍රජාව දැනුවත් කිරීමේ ක්‍රියාවලියක් ආරම්භ කර ඇති බව විශ්වාස කටයුතු ආරංචි මාර්ගයක් පවසයි.

එක්සත් ජාතික පක්ෂයේ මහලේකම් තලතා අතුකෝරළ, හිටපු විදේශ කටයුතු අමාත්‍ය මහාචාර්ය ජී.එල්. පීරිස් සහ හිටපු රාජ්‍ය අමාත්‍ය රුවන් විජේවර්ධන යන මහත්ම මහත්මීන්ගෙන් සමන්විත විපක්ෂ නියෝජිත පිරිසක් මේ වන විටත් එක්සත් ජනපදය, චීනය සහ ඉන්දියාව යන රටවල තානාපති කාර්යාල ප්‍රධානීන් හමුවී වික්‍රමසිංහ මහතාගේ අත්අඩංගුවට ගැනීම පිළිබඳව කරුණු පැහැදිලි කර තිබේ.

මේ වන විට රිමාන්ඩ් භාරයේ පසුවන වික්‍රමසිංහ මහතා අද (26) දින කොළඹ කොටුව මහේස්ත්‍රාත් අධිකරණය වෙත ඉදිරිපත් කිරීමට නියමිතව ඇත. විපක්ෂය පෙන්වා දෙන්නේ 'සුළු චෝදනා' ලෙස ඔවුන් හඳුන්වන කරුණු මත වික්‍රමසිංහ මහතා අත්අඩංගුවට ගැනීම ප්‍රජාතන්ත්‍රවාදයට දැඩි හානිකර බලපෑමක් එල්ල කරන ක්‍රියාවක් බවයි.

ඉන්දීය කොන්ග්‍රස් පක්ෂයේ පාර්ලිමේන්තු මන්ත්‍රී ශෂී තරූර් මහතාද ඉරිදා දිනයේදී මෙම අත්අඩංගුවට ගැනීම සම්බන්ධයෙන් සිය කනස්සල්ල පළ කර ඇති අතර, "පළිගැනීමේ දේශපාලනයෙන්" වැළකී හිටපු ජනාධිපතිවරයාට ගෞරවයෙන් සලකන ලෙස ශ්‍රී ලංකා රජයෙන් ඉල්ලා සිටියේය. 'X' සමාජ මාධ්‍ය ජාලයේ සටහනක් තබමින් තරූර් මහතා ප්‍රකාශ කර ඇත්තේ රනිල් වික්‍රමසිංහ මහතාට එරෙහිව එල්ල වී ඇති චෝදනා "නොසැලකිය හැකි" ඒවා බව පෙනී යන බවත්, අත්අඩංගුවට ගැනීමෙන් ටික වේලාවකට පසු රෝහල් ගත කළ හිටපු ජනාධිපතිවරයාගේ සෞඛ්‍ය තත්ත්වය පිළිබඳව තමන් කනස්සල්ලට පත්වන බවත්ය.

ශ්‍රී ලංකාව සඳහා හිටපු නෝර්වීජියානු සාම නියෝජිත එරික් සෝල්හයිම් මහතාද, රඳවා සිටියදී හිටපු ජනාධිපති රනිල් වික්‍රමසිංහ මහතාගේ සෞඛ්‍ය තත්ත්වය පිළිබඳව අවධානය යොමු කරමින් ඔහුව වහාම නිදහස් කරන ලෙස ඉල්ලා ඇත. 'X' (කලින් ට්විටර්) හි සටහනක් තබමින් සෝල්හයිම් මහතා පවසා ඇත්තේ,

වික්‍රමසිංහ මහතාගේ වහාම නිදහස ඉල්ලා "ශ්‍රී ලංකාවේ, දකුණු ආසියාවේ සහ ලොව පුරා නායකයින්" සමඟ තමන්ද එක්වන බවයි. 2022 ආර්ථික හා දේශපාලන අර්බුදය අතරතුර "ශ්‍රී ලංකාව බේරා ගැනීමට නැගී සිටි" නායකයා ලෙස ඔහු වික්‍රමසිංහ මහතා හැඳින්වීය. වික්‍රමසිංහ මහතාට එරෙහි චෝදනා "කිසිදු පදනමක් නොමැති" බවට බැහැර කළ සෝල්හයිම් මහතා, එම චෝදනා සත්‍ය වුවද, යුරෝපයේ අපරාධමය හෝ පිළිගත නොහැකි හැසිරීමක් ලෙස නොසලකන බවද වැඩිදුරටත් සඳහන් කර තිබේ.