විල්පත්තු රක්ෂි­තයේ ඉස්සන් ගොවි­පො­ළක් හදන්න ඉඩම් දුන් පවි­ත්‍රාගේ ගැස­ට් පත්‍රය ඉව­තට!

විල්පත්තු ප්‍රදේශය ආශ්‍රිතව ඇති වෙඩිතලතිව් රක්ෂිත ප්‍රදේශයෙන් හෙක්ටයාර 168ක්, ඉස්සන් ගොවිපොළක් ඇති කිරීම සඳහා නිදහස් කරමින් ඉකුත් රජය සමයේ වනජීවී ඇමැතිවරිය ලෙස කටයුතු කළ පවිත්‍රා වන්නිආරච්චි මහත්මිය විසින් නිකුත් කළ ගැසට් නිවේදනය ඉවත් කර ගැනීමට රජය තීරණය කර ඇතැයි නීතිපතිවරයා ඊයේ (29) ශ්‍රේෂ්ඨාධිකරණයට දන්වා සිටියේය.

ඒ සම්බන්ධයෙන් වන කැබිනට් මණ්ඩල තීරණයක් මේ වන විට ගෙන ඇති බව ද දැනුම් දෙන ලදි.

එම ගැසට් නිවේදනය අභියෝගයට ලක් කරමින් ගොනු කළ මූලික අයිතිවාසිකම් පෙත්සම් දෙකක් කැඳවූ අවස්ථාවේදී නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් විවේකා සිරිවර්ධන මහත්මිය මේ බව දන්වා සිටියාය.

එස්. තුරෙයිරාජා, යසන්ත කෝදාගොඩ, ප්‍රියන්ත ප්‍රනාන්දු යන මහත්වරුන්ගෙන් සමන්විත ශ්‍රේෂ්ඨාධිකරණ විනිසුරු මඬුල්ල ඉදිරියේ මෙය කැඳවූ අවස්ථාවේදී මේ බැව් දැනුම් දෙන ලදි.

නීතිපතිවරයා වෙනුවෙන් එහිදී අධිකරණය හමුවේ පෙනී සිටි අතිරේක සොලිසිටර් ජනරාල් විවේකා සිරිවර්ධන මහත්මිය සඳහන් කළේ මෙම ගැසට් නිවේදනය සම්බන්ධයෙන් සමාලෝචනයක් කිරීමෙන් අනතුරුව එය ඉවත් කර ගැනීමට රජය තීරණය කර ඇති බවය.

ඒ අනුව 2024 මැයි 06 දිනැති එම ගැසට් නිවේදනය ඉවත් කිරීමට අදාළව කැබිනට් මණ්ඩල තීරණයක් ගෙන ඇති බව ද ඇය සඳහන් කළාය.

එහිදී පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ සංජීව ජයවර්ධන මහතා සඳහන් කළේ ගැසට් නිවේදනය ඉවත් කිරීම සම්බන්ධව තමන් සතුටට පත්වන බවය.

එහෙත් එම ගැසට් නිවේදනය ඉවත් කරන බව, Òවන සත්ත්ව සහ වෘක්ෂලතා ආඥා පනතÓ යටතේ ගැසට් මඟින් ප්‍රකාශයට පත් කළ යුතු බව ද ඒ මහතා පෙන්වා දුන්නේය.

ඒ අනුව කටයුතු කිරීමට එහිදී අතිරේක සොලිසිටර් ජනරාල්වරිය එහිදී එකඟත්වය පළ කළාය.

මෙම කරුණ සම්බන්ධව ප්‍රගතිය විමසීම සඳහා ඔක්තෝබර් මස 10 වැනිදා පෙත්සම නැවත කැඳවීමට විනිසුරු මඬුල්ල තීරණය කළහ. වනජීවී ආරක්ෂක සංගමය, පරිසර යුක්ති කේන්ද්‍රය ඇතුළු පිරිසක් මෙම පෙත්සම් ඉදිරිපත් කර තිබිණි.

එහි වගඋත්තරකරුවන් ලෙස හිටපු වනජීවී ඇමැතිවරිය ඇතුළු පිරිසක් නම් කර තිබිණි. විල්පත්තුවේ වෙඩිතලතිව් ජාතික රක්ෂිතයෙන් හෙක්ටයාර 168ක් ඉස්සන් වගාව සඳහා වෙන් කිරීමට අදාළ ගැසට් නිවේදනයක් ඉකුත් 2024 වසරේ මැයි 6 වැනිදා වනජීවී ඇමැතිවරිය වූ පවිත්‍රා වන්නිආරච්චි මහත්මිය ප්‍රකාශයට පත් කර තිබිණි.

එම ඉස්සන් ඇති කිරීමේ ව්‍යාපෘතිය නිසා එම රක්ෂිතයේ වන විනාශයක් මෙන්ම පරිසර පද්ධතියට හානි වන බවට පෙත්සම්කාර සංවිධාන මඟින් පැමිණිලි කර තිබිණි. එබැවින් පෙත්සම විභාගයට ගැනීමට අවසර දෙන ලෙස ද අදාළ ගැසට් නිවේදනය ක්‍රියාත්මක වීම වළක්වන ලෙස පෙත්සම්කාර සංවිධාන සිය පෙත්සම මඟින් අධිකරණයෙන් ඉල්ලා තිබිණි.

පෙත්සම් සම්බන්ධව මූලික කරුණු සලකා බලා පෙත්සම් විභාගයට අවසර දුන් ශ්‍රේෂ්ඨාධිකරණය අදාළ ගැසට් නිවේදනය ක්‍රියාත්මක වීම අත්හිටුවන අතුරු තහනම් නියෝගයක් මීට පෙර නිකුත් කළේය.

ජනාධිපති නීතිඥ සංජීව ජයවර්ධන මහතා සහ නීතිඥ ආචාර්ය රවීන්ද්‍රනාත් දාබරේ, නිල්ශාන්ත සිරිමාන්න යන මහත්වරු පෙත්සම්කාර පාර්ශ්ව වෙනුවෙන් පෙනී සිටියහ.