වාහන ආනයනය වේගයත්.. ඩොලර් සංචිත අවදානමේ.. වහා පියවරක් ගන්නැයි භාණ්ඩාගාරය දන්වයි..

වාහන ආනයනය සඳහා පනවා තිබූ තහනම ඉවත් කිරීමෙන් පසු වාහන ආනයනය ඉහළ යාම හේතුවෙන් විදේශ සංචිතවලට අහිතකර බලපෑමක් ඇති විය හැකි බවට මුදල් අමාත්‍යාංශය මහ බැංකුවට අනතුරු අඟවා තිබේ.

ඒ සම්බන්ධයෙන් පූර්ව ආරක්ෂක පියවර ගන්නා ලෙසද මුදල් අමාත්‍යාංශය මහ බැංකුවෙන් ඉල්ලා ඇත.

ජ්‍යෙෂ්ඨ මුදල් අමාත්‍යාංශ නිලධාරියෙකු පැවසුවේ වාහන ආනයන සීමා ඉවත් කිරීමෙන් පසු ගත වූ මාස පහ තුළ ඇමෙරිකානු ඩොලර් මිලියන 742ක වටිනාකමකින් යුත් ණයවර ලිපි (Letters of Credit) විවෘත කර ඇති බවයි.

මෙය ඇමෙරිකානු ඩොලර් බිලියනයක ඉලක්කයට සාපේක්ෂව සැලකිය යුතු වර්ධනයකි.

ඒ අනුව, ණයවර ලිපි විවෘත කිරීම සහ ආනයන කටයුතු අපේක්ෂා කළාට වඩා වේගයෙන් සිදුවී ඇති බැවින්, ආනයන ප්‍රවණතාව සමීපව අධ්‍යයනය කර කල්තියා අවශ්‍ය පිළියම් යොදන ලෙස මුදල් අමාත්‍යාංශය මහ බැංකුවට උපදෙස් දී තිබේ.

ඇමෙරිකානු ඩොලර් පිටතට ගලා යාම විදේශ විනිමය සංචිතවලට මෙන්ම විනිමය අනුපාතවලටද බරපතළ බලපෑමක් ඇති කළ හැකි බව මුදල් අමාත්‍යාංශය පෙන්වා දී ඇත. එහි ප්‍රතිඵලයක් ලෙස ඉන්ධන ඇතුළු අත්‍යවශ්‍ය ද්‍රව්‍ය ආනයනයටද බලපෑම් ඇතිවිය හැකිය.

දිගු කලක් ක්‍රියාත්මක වූ වාහන ආනයන තහනම මේ වසරේ පෙබරවාරි මාසයේදී ඉවත් කරන ලද අතර, මේ වන විට වාහන 18,000කට අධික ප්‍රමාණයක් මෙරටට ගෙන්වා ඇත. එමගින් රුපියල් බිලියන 220ක බදු ආදායමක් උපයා ඇත.

වාහන ආනයනයෙන් ලැබුණු ආදායම මේ වසරේ රේගු බදු ලෙස රුපියල් ට්‍රිලියනයක සැලකිය යුතු දායකත්වයක් ලබා දී තිබේ. මේ වසර සඳහා රේගු ආදායම් ඉලක්කය රුපියල් ට්‍රිලියන 2.1කි.