‘ඉරානයට යලි පහර දෙනවා..’- ට‍්‍රම්ප්

තම න්‍යෂ්ටික පහසුකම් නැවත පණගැන්වීමට දරන ඕනෑම උත්සාහයකට එක්සත් ජනපදය විසින් තවත් හමුදා ප්‍රහාරයක් එල්ල කරනු ඇති බව ඇමරිකානු ජනාධිපති ඩොනල්ඩ් ට්‍රම්ප් ඉරානයට දැඩි අනතුරු ඇඟවීමක් කරමින් ප්‍රකාශ කර ඇත.

හේග් හි පැවැත්වෙන නේටෝ සමුළුව අමතමින් ජනාධිපති ට්‍රම්ප්, ඊශ්‍රායල-ඉරාන ගැටුමෙන් පසු ඇති වූ නවතම සිදුවීම් පිළිබඳව අදහස් දැක්වීය.

සුළු සටන් විරාම උල්ලංඝනය කිරීම්වලින් පසුව, දෙපාර්ශවයම දැන් සටන් විරාමය පිළිපදින බව ඔහු තහවුරු කළේය. “මගේ ඉල්ලීම පරිදි ඊශ්‍රායල ප්‍රහාරක ජෙට් යානා ආපසු පැමිණියා. ඊශ්‍රායලය යුද්ධයෙන් පසුබැසීම ධනාත්මක ලකුණක්” ඔහු පැවසීය.

ට්‍රම්ප් ඉරානය තුළ එක්සත් ජනපදයේ ප්‍රධාන ජයග්‍රහණ ප්‍රකාශ කළ අතර, ෆෝර්ඩෝ න්‍යෂ්ටික බලාගාරය විනාශ කිරීම අවධාරණය කළේය. “දැන් එහි ඉතිරිව ඇත්තේ සුන්බුන් පමණයි. මෙම සටන් විරාමය ඉරානයටත් ජයග්‍රහණයක් – ඔවුන්ගේ රට බේරුණා” ඔහු වැඩිදුරටත් පැවසූ අතර, ඊශ්‍රායලයට ඉරාන මිසයිල ප්‍රහාරවලින් සිදු වූ හානියද සඳහන් කළේය.

එක්සත් ජනපද ජනාධිපතිවරයා අවධාරණය කළේ ඉරානයට නැවත යුරේනියම් බල ගැන්වීම් කිරීමට ඉඩ නොදිය යුතු බවයි. “ඉරානය යුරේනියම් බල ගැන්වීම් නැවත ආරම්භ කළහොත්, අපි නැවත ප්‍රහාර එල්ල කරන්නෙමු” ඔහු පැවසීය.

ඔහු සමග අදහස් දැක්වූ එක්සත් ජනපද රාජ්‍ය ලේකම් මාකෝ රුබියෝ, ට්‍රම්ප්ගේ පණිවිඩය යලි අවධාරණය කළේය. ඇමරිකානු ප්‍රහාර ඉරානයේ න්‍යෂ්ටික හැකියාවන්ට බරපතල ලෙස හානි සිදු කළ බවත්, තවදුරටත් තක්සේරු කිරීම් සිදුවෙමින් පවතින බවත් ඔහු පැවසීය.