ට‍්‍රම්ප් අඩියක් පස්සට ගනී.. ඉරානයට පහර දීම ගැන අදහස් දැක්වීම ප‍්‍රතික්‍ෂෙප කරයි.. චීන ගුවන් යානා තුනක් රෙඩාර් වසාගෙන ඉරානයට!

ඇමරිකානු ජනාධිපති ඩොනල්ඩ් ට්‍රම්ප් ඊශ්‍රායලය හා ඉරානය අතර පවතින ගැටුම්වලට ඇමරිකානු මැදිහත්වීම සම්බන්ධයෙන් අදහස් දැක්වීම ප්‍රතික්ෂේප කර ඇත.

ධවල මන්දිරයෙන් පිටත පැවති උත්සවයකින් අනතුරුව මාධ්‍යවේදීන් අමතමින්, ගැටුමට ඇමරිකාවේ ප්‍රවේශය ගැන අනාවැකි කීමට නොහැකි බව ඔහු පැවසීය.

“මට එහෙම කියන්න බෑ,” ඔහු කීවේය. “මම ඒක කරන්නත් පුළුවන්, මම ඒක නොකර ඉන්නත් පුළුවන්. මට කරන්න ඕන දේ කවුරුත් දන්නේ නැහැ. නමුත් මට මේක කියන්න පුළුවන්: ඉරානය ඉන්නේ කරදර ගොඩක් මැද සහ සාකච්ඡා කිරීමේ අවශ්‍යතාවෙන්.”

ට්‍රම්ප් ඉඟි කළේ ඉරාන සාකච්ඡාකරුවන් ධවල මන්දිරය වෙත පැමිණ සාකච්ඡා කිරීමට කැමැත්තෙන් සිටිය හැකි බවයි. ඉරාන ගුවන් ආරක්ෂක පද්ධති විනාශ වී යාමත් සමඟ ගැටුම කොපමණ කාලයක් පවතිනු ඇත්දැයි තමන්ට විශ්වාස නැති බව ද ඔහු පැවසීය.

“කොන්දේසි විරහිතව යටත් වෙන්න,” ට්‍රම්ප් අවධාරණය කළේය. “මගේ ඉවසීම නැති වෙලා ගිහින් තියෙන්නේ.”

ඉරානයේ න්‍යෂ්ටික වැඩසටහන සම්බන්ධයෙන් ඔවුන්ගේ “චේතනාව යහපත් එකක් නොවන” බව තමන් විශ්වාස කරන බවද ජනාධිපතිවරයා ප්‍රකාශ කළේය. කෙසේ වෙතත්, ට්‍රම්ප් සඳහන් කළේ තමා ඉරාන ජාතිකයින්ට බෙහෙවින් ඇලුම් කරන බවත්, තම වෘත්තීය ජීවිතය තුළ බොහෝ දෙනෙකු මුණගැසී ඇති බවත්ය.

මේ අතර, යුධෝපකරණ රැගත් චීන ගුවන් යානා තුනක් (බෝයි 747 වර්ගයේ භාණ්ඩ ප්‍රවාහන යානා), රේඩාර් පද්ධති මඟහැර ඉරානයට පැමිණි බවට පුවත් වාර්තා වෙමින් පවතී. මෙම වාර්තා ගැටුමේ කලාපීය සංකීර්ණත්වය තවදුරටත් ඉස්මතු කරයි.