ශ්‍රී ලංකාවේ ඊශ්‍රායල සංචාරකයින්ට ප්‍රහාර එල්ල කිරීම සඳහා පැවරී තිබුණේ ඇමරිකානු ජනාධිපති ඩොනල්ඩ් ට්‍රම්ප් ඝාතන කොන්ත්‍රාත්තුවත් ලබාගෙන සිටි බවට චෝදනා එල්ල වූ ඉරානයේ ඉස්ලාමීය විප්ලවවාදී ආරක්ෂක බළකාය හා සම්බන්ධකම් පවත්වන කුප්‍රකට කුලී ඝාතකයෙක්වන ෆර්ෂාඩ් ෂකේරිට බව එක්සත් ජනපද අධිකරණ දෙපාර්තමේන්තුව නිවේදනය කරයි.
එක්සත් ජනපද අධිකරණ දෙපාර්තමේන්තුවේ මාධ්‍ය නිවේදනයකට අනුව, ඉරානයේ ඉස්ලාමීය විප්ලවවාදී ආරක්ෂක බළකාය සමඟ සම්බන්ධකම් ඇති බවට චෝදනා සහිත ෂකේරි එම බලකායේ විවේචකයින් නිහඬ කිරීම සඳහා ඉරාන නිලධාරීන් විසින් සංවිධානය කරන ලද පුළුල් ජාත්‍යන්තර කුමන්ත්‍රණයක කොටස් කරුවෙකි. ශකේරි ට්‍රම්ප් මරා දැමීම සඳහා ඇමරිකානු ඩොලර් 300,000 කොන්ත්‍රාත්තුවක් ලබා දී තිබී ඇත. ඉරානය විදේශයන්හි මෙහෙයුම් කිරිම සඳහා වෙනත් පුද්ගලයින් සහ අපරාධ ජාලා මෙහෙයවමින් ඇති බව ශකේරිගේ කුමන්ත්‍රණයෙන් පැහැදිලිවන බව අධිකරණ දෙපාර්තමේන්තුව පවසයි. එම නිවේදනයේ දැක්වෙන ආකාරයට ශ්‍රී ලංකාවේ සංචාරයෙහි නියුතු ඊශ්‍රයාල ජාතිකයන් ඝාතනය සඳහා සැලකිය යුතු මුදලක් ලබා දී ඇත්තේත් ෆර්ෂාඩ් ෂකේරි විසිනි.
ජාත්‍යන්තර සීමාවන් නොතකා ඉරානය සිය පාලන තන්ත්‍රයේ විරුද්ධවාදීන් සහ එය සතුරු ලෙස සලකන අය ඉලක්ක කර ගැනීමට දරන උත්සාහයන් මෙම සිද්ධියෙන් ඉස්මතුවන බව පවස එෆ්බීඅයි අධ්‍යක්ෂ ක්‍රිස්ටෝපර් වේ ප්‍රකාශ කර ඇත්තේ එවැනි තර්ජනවලට එරෙහිව ඒජන්සිය සුපරීක්ෂාකාරීව සිටින බවය.
කවුද මේ ෆර්ෂාඩ් ෂකේරි
ෆර්ෂාඩ් ෂකේරි යනු 2008 වසරේදී අමෙරිකාවෙන් පිටුවහල් කරන ලද මේ වනවිට 51 හැවිරිදි ටෙහෙරානය පදනම් කරගත් ඇෆ්ගන් සම්භවයක් සහිත පුද්ගලයෙකි. ඔහු එක්සත් ජනපදයට සංක්‍රමණය වන්නේ කුඩා කාලයේදීමය. වයස අවුරුදු 20දී පමණ සොරකම් කිරීමේ වරදකට හසුව වසර 14 ක් දඬුවම් ලැබීමෙන් අනතුරුව ඔහු 2008 දී ඇමරිකාවෙන් පිටුවහල් කර තිබිණි. ලදී. මෑත මාසවලදී, ෂකේරි ඉරානයේ ඉස්ලාමීය විප්ලවවාදී ආරක්ෂක බළකායට සහය වීම සඳහා එක්සත් ජනපද සිරගෙවල්වලදී ඔහුට හමු වූ අපරාධ සහචරයින්ගේ ජාලයක් උත්තේජනය කිරීමට සම්බන්ධ වී තිබිණි. එක්සත් ජනපද අධිකරණ දෙපාර්තමේන්තුවට අනුව, ඔහු ඉරානයේ ඉස්ලාමීය විප්ලවවාදී ආරක්ෂක බළකාය වෙත උනන්දුවක් දක්වන පුද්ගලයින් හඳුනාගෙන ඔවුන් මගින් ඝාතන ඉලක්ක නිරීක්ෂණත් සහ ඝාතන සිදු කිරීම සඳහා ක්‍රියාකාරීන් ලබා දී ඇති බව වාර්තා වේ.
2008 දී ඔහු පිටුවහල් කළද ඇමරිකානු ආරක්ෂක අංශ ඔහු සම්බන්ධ නිරීක්ෂණ කටයුතු 2015 දක්වා යාවත්කාලීන කළේය. 2019 දී, ඔහුගේ ජාලයට සම්බන්ධ යැයි කියන අපරාධ ක්‍රියාකාරකම් මාලාවක් යළිත් ඉස්මතු වන්නේ හොරොයින් මත්ද්‍රව්‍ය සම්බන්ධයෙනි. හෙරොයින් විශාල ප්‍රමාණයක් අත්අඩංගුවට ගැනීම සම්බන්ධයෙන් විමර්ශන කටයුතු සඳහා ඔහු ශ්‍රී ලංකාවේ රඳවා තබා ගෙන තිබිණි. ලංකාව තුළ ප්‍රහාරයක් එල්ල කිරීමට සැලසුම් කිරීමේ වගකීම ඔහු පවරා ගන්නේ මේ පසුබිම මත බව ද වාර්තා වී ඇත.
