22 වැනි ආණ්ඩුක්‍රම ව්‍යවස්ථා සංශෝධනය ජනාධිපති නියෝගයෙන් ගැසට් මගින් ප්‍රකාශයට පත් කර තිබේ.
ඊයේ අධිකරණ ඇමති විජේදාස රාජපක්ෂ ප්‍රකාශ කළේ ජනාධිපතිවරණය නිමාවනතුරු 22වැනි ව්‍යවස්ථා සංශෝධනය ගැසට් නොකරන ලෙස තමන් අමාත්‍යාංශ ලේකම්වරයාට දැනුම් දුන් බවය.
ඔහු ඊයේ මෙසේ පැවසීය.
අපි 22වැනි ආණ්ඩුක්‍රම ව්‍යවස්ථා සංශෝධනය කියලා ගෙනාවේ ආණ්ඩුක්‍රම ව්‍යවස්ථාවේ 83වැනි ව්‍යවස්ථාවේ නිවැරදි නොවී තිබුණු වරදක් නිවැරදි කරන්න.”
“එම වරද තිබුණු නිසාම අධිකරණයේ නඩු කටයුතු තුනකට වැඩි ගණනක් පැවතුනා ඒ පිළිබඳව සැක මතුකරමින්. නමුත් අධිකරණය පැහැදිලි තීන්දු දීලත් තියනවා. ”
“නමුත් අනාගතයේ දී එවැනි සැකයක් ඇතිවීම වැළැක්වීම පිනිස තමයි මේ සංශෝධනය අපි ඉදිරිපත් කළේ . නමුත් ජනතාව තුළ මාධ්‍ය හරහා යම් කිසි සැකයක් අවිනිශ්ඡතභාවයක් මතුකරමින් තියනවා මෙය මැතිවරණ කල් දැමීම සඳහා කරන උපක්‍රමයකට යොදා ගනී කියලා. ”
“එවැනි සැක ශංකාවක් ජනතාව තුළ තිබෙන්න අවශ්‍ය නෑ මේ මැතිවරණ සමයේ. ඒ නිසා මම අපේ අධිකරණ අමාත්‍යංශයේ ලේකම්වරයාට උපදෙස් දුන්නා මෙය ගැසට් පත්‍රයේ පල කිරීම අත්හිටුවන්න කියලා. ”
අධිකරණ ඇමතිවරයා පැහැදිලි කළේය. කෙසේ වෙතත් අද ජානාධිපතිවරයාගේ නියෝගය මත 22 වැනි ආණ්ඩුක්‍රම ව්‍යවස්ථාව ගැසට් මගින් ප්‍රකාශ කර තිබේ.
