ඔක්තෝබර් 5 මැතිවරණ දිනයක් සම්බන්ධයෙන් සංචාරක හා ක්රීඩා අමාත්ය හරීන් ප්රනාන්දු විසින් කරන ලද ප්රකාශයන් මැතිවරණ කොමිසමේ (EC) සභාපති ආර්.එම්.ඒ.එල්. රත්නායක මහතා ඍජුවම ප්රතික්ෂේප කළේය.
මැතිවරණ කාලසටහන සැකසීමේ බලය ඇත්තේ කැබිනට් මණ්ඩලයට හෝ රජයට නොවන බව ප්රකාශ කළ ඒ මහතා “ජූලි 17 සිට මැතිවරණ දිනය තීරණය කිරීම සඳහා කොමිසමේ සාමාජිකයින් ස්වාධීනව රැස්වනු ඇත,” යනුවෙන් ප්රකාශ කළේය.
“කැබිනට් මණ්ඩලය හෝ ජනාධිපතිවරයා ඇතුළු කිසිදු බාහිර ආයතනයකින් අනුමැතිය ලබාගැනීමට බැඳීමකින් තොරව අපි දිනය ප්රසිද්ධියේ ප්රකාශ කරනවා’ යනුවෙන්ද රත්නායක මහතා කීය.
රත්නායක පැහැදිලි කළේ මැතිවරණය ආරම්භ කළ හැක්කේ සැප්තැම්බර් 17 න් පසුව පමණක් බවත්, ඉන් පසුව අනිවාර්යයෙන් සති හතරේ සිට හය දක්වා සූදානම් වීමේ කාල සීමාවක් තිබිය යුතු බවත්ය.
දිනය ප්රකාශයට පත් කිරීමෙන් පසු දින 17-21 අතර කාලය තුළ නාමයෝජනා දින නියම කෙරෙනු ඇති බව ඔහු වැඩිදුරටත් පැවසීය.
