![gossip lanka](https://blogger.googleusercontent.com/img/b/R29vZ2xl/AVvXsEiScPUV5NRAAG1dS6HFSP5H9Cwo106NjhjWoA_opwqRWAWtKEFe5l_mQUjvBsLZ11gPjiWvUP64AGdxsuuaNgN-4vHFP_C1kpg3kv9h9EpRmD2mi9LxZbz9slrG_LnTZQZoD-eVEEM1qpSfu7C23fxCeUsrac6tMGYJ2LAQa8iRKFARb5RxrC1IkVy0cSac/s320/nayana.jpg" width="320)
සෞදි අරාබියේ සංවිධානාත්මක කප්පම් කල්ලි සාමාජිකයන් පිරිසක් විසින් නීති විරෝධීව උපයාගත් සෞදි රියාල් කෝටි 180කට අධික මුදලක් ශ්‍රී ලංකාවේ බැංකු පද්ධතියට බැර කර ඇතැයි කියන බැංකු හා මූල්‍යායතන 60ක් සම්බන්ධයෙන් අධිකරණයට වාර්තාවක් ඉදිරිපත් කරන ලෙස කොළඹ ප්‍රධාන මහේස්ත්‍රාත් ප්‍රසන්න අල්විස් මහතා මෙරට ප්‍රධාන රාජ්‍ය හා පෞද්ගලික බැංකු හා මූල්‍යායතන 15කට නියෝග කළේය.
මෙලෙස නියෝග නිකුත් වූයේ මහජන බැංකුව, ජාතික ඉතිරිකිරීමේ බැංකුව, ලංකා බැංකුව, කොමර්ෂල් බැංකුව, අමානා බැංකුව, පෑන් ඒෂියා බැංකුව, ඩී එෆ් සී සී බැංකුව, හැටන් නැෂනල් බැංකුව ඇතුළු මෙරට ප්‍රධාන පෞද්ගල, රාජ්‍ය බැංකු සහ මුල්‍යායතන 15ක ප්‍රධාන මෙහෙයුම් කළමනාකරුවන් වෙතය.
මෙම සංවිධානාත්මක අපරාධ කල්ලි සාමාජිකයන් අදාළ මුදල් මෙරටට එවා ඇත්තේ මෙරට විවිධ ව්‍යාපාරිකයන්ට අයත් බැංකු ගිණුම්වලට වීම හේතුවෙන් එම බැංකු ගිණුම් හිමියන් කවුරුන්ද යන්න සම්බන්ධයෙන් ද විමර්ශනය කරන බව අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේය.
මෙම සිද්ධිය සම්බන්ධයෙන් සෞදි අරාබි රාජ්‍යයේ තානාපති කාර්යාලයේ අන්තර්ජාතික සහයෝගිතා චෝදනා ඉදිරිපත් කිරීමේ අංශයේ ප්‍රධානියා විසින් ශ්‍රී ලංකාවේ රාජ්‍ය ආරක්ෂක අමාත්‍යාංශය වෙත කරනු ලැබතිබූ පැමිණිල්ලකට අනුව පොලිස්පති නියමයෙන් අදාළ විමර්ශනය ආරම්භ කළ බව අපරාධ පරික්ෂණ දෙපාර්තමේන්තුවේ මූල්‍ය අපරාධ විමර්ශන අංශය අධිකරණයට කරුණු වාර්තා කර තිබිණි.
මේ වන විට සෞදි රාජ්‍යයේ රහස් පොලිසිය සිදුකරන ලද විමර්ශනයකට අනුව එරට මුදල් විශුද්ධිකරණය වැළැක්වීමේ පනතට අනුව අත්අඩංගුවට ගෙන එරට බන්ධනාගාර ගත කර සිටින ‘යූෂස් එයිඩ් කාල්ෆ් අලතාෆ් සහ ‘බසාම් නමැති සැකකරුවන්ගෙන් කරන ලද ප්‍රශ්න කිරීම්වලදී මෙම මුදල් ගනු-දෙනු සම්බන්ධයෙන් කරුණු අනාවරණය වී ඇති බවත් ඔවුන් එරට ප්‍රධාන පෙළේ සංවිධානාත්මක කප්පම් කල්ලියක ප්‍රබල සාමාජිකයන් බවත් එම පැමිණිල්ලේ සඳහන්ව තිබූ බව අපරාධ පරීක්ෂණ දෙපාර්තමේන්තුව අධිකරණයට කරුණු ඉදිරිපත් කර ඇත.
මේ වන විට සෞදි අරාබියේ බන්ධනාගාර ගත කර සිටින එම සැකකරුවන් එරට විවිධ ව්‍යාපාරිකයන්ගෙන් මහා පරිමාණයෙන් ලබාගත් කප්පම් මුදල් සෞදි රියාල් කෝටි 160කට අධික මුදලක් මෙරට බැංකු පද්ධතියට එවා ඇතැයි ද අපරාධ පරික්ෂණ දෙපාර්තමේන්තුව අධිකරණයට දැනුම් දුන්නේය.
ඒ අනුව අදාළ සැකකරුවන් නීතිවිරෝධීව උපයාගත් බව කියන එම සෞදි රියාල් 17,724,209.70ක මුදල මෙරට මුදල්වලින් රුපියල් කෝටි 180කට අධික බව ද අපරාධ පරීක්ෂණ දෙපාර්තමේන්තුව අධිකරණයට කරුණු ඉදිරිපත් කළේය.
ඉදිරිපත් වූ කරුණු සැලකිල්ලට ගත් අධිකරණය සිද්ධිය සම්බන්ධයෙන් වන බැංකු වාර්තා ඇතුළත් සවිස්තර වාර්තා අධිකරණය හමුවට ඉදිරිපත් කරන ලෙසට අදාළ බැංකු හා මුල්‍යායතනවලට නියෝග කරමින් නඩුව බහා තැබීය.
නිමන්ති රණසිංහ
– Dinamina
