ලංකාවේ ප්‍රධානම ගුවන්තොටුපල 03 පරිපාලනය අදානිට දෙන්න සූදානම්… ඉන්දීය මාධ්‍ය වාර්තා කරයි…..

ඉන්දියාවේ ප්‍රධානම ව්‍යාපාර සමාගමක් මෙන්ම නරෙන්ද්‍ර මෝදිගේ සමීපතම ව්‍යාපාරික සගයාගේ හිමිකාරිත්වය සහති  අදානි සමූහ ව්‍යාපාරය  ශ්‍රි ලංකාවේ  ප්‍රමුඛතම ජාත්‍යන්තර දොරටුව වන කොළඹ බණ්ඩාරනායක ජාත්‍යන්තර ගුවන්තොටුපළ ඇතුළුව දිවයිනේ ගුවන් තොටුපළ තුනක් කළමනාකරණය කිරීම සඳහා ශ්‍රී ලංකා බලධාරීන් සමඟ සාකච්ඡා කරමින් සිටින බව හින්දු පුවත්පත වාර්තා කරයි.

පිරිනමනු ලබන අනෙකුත් ගුවන් තොටුපළ වන්නේ කොළඹ රත්මලාන ගුවන් තොටුපළ සහ මත්තල ගුවන් තොටුපළ බව විදෙස් මාධ්‍ය කියයි.       කළමනාකරණ ක්‍රමවේද ක්‍රියාත්මකවන ආකාරය පිළිබඳව දෙපාර්ශවය අතර සාකච්ඡා කරමින් පවතින බවත් කළමනාකරණ කොන්ත්‍රාත්තු ද ඊට ඇතුළත් විය හැකි බවත් ශ්‍රී ලංකාවේ සංචාරක, ඉඩම්, ක්‍රීඩා සහ තරුණ කටයුතු පිළිබඳ අමාත්‍ය හරීන් ප්‍රනාන්දු සිකුරාදා ප්‍රකාශ කළ බව හින්දු    පුවත්පතේ ව්‍යාපාර අතිරේකය විශේෂ පුවතක් ලෙස පල කර තිබේ.

ගුවන් තොටුපල කළමනාකරණය සඳහා අදානි සමූහ ව්‍යාපාරය සමඟ වැඩ කිරීමට සැලසුම් කර ඇති බවට හරින් ප්‍රනාන්දු  මුම්බායි හි OTM සංචාරක ප්‍රදර්ශනයට සමගාමීව ව්‍යාපාරික ප්‍රජාව වෙතත් පවසා තිබේ.

ගුවන් තොටුපළ කළමනාකරණය කිරීම සඳහා පුද්ගලික හවුල්කරුවෙකු සම්බන්ධ කර ගැනීමේ සැලසුම සංචාරක ව්‍යාපාරයේ පුනර්ජීවනයක් මධ්‍යයේ  පැමිණෙන බව හින්දු පුවත්පත් වාර්තාවේ දැක්වේ.  වර්ෂ 2023 දී ශ්‍රී ලංකාවට විදේශීය සංචාරකයින් පැමිණීම මිලියන 1.48 දක්වා දෙගුණයක් වී ඇති බවත්,    මෙය රටේ ගුවන් තොටුපල යටිතල පහසුකම් මත පීඩනයක් ඇති කර ඇති කර ඇති නිසා  පහසුකම් පුළුල් කිරීමට සහ මගී අත්දැකීම වැඩිදියුණු කිරීමට පෞද්ගලික හවුල්කරුවෙකුගේ සහාය ශ්‍රි ලංකාව අපේක්ෂා කරන බවත් එම වාර්තාවේ ප්‍රකාශ වේ.

මේ  පිළිබඳ හින්දු පුවත්පත කළ ඊමේල් විමසුමකට අදානි සමූහය ප්‍රතිචාර දක්වා නැත.

අදානි සමූහ ව්‍යාපාරය මේ වනවිටත් ශ්‍රී ලංකාවේ වරාය සහ පුනර්ජනනීය බල ශක්ති ක්ෂේත්‍ර වෙත ප්‍රවේශ වී ඇති ඇත.   පසුගිය නොවැම්බරයේ දී සමූහය විසින් කොළඹ වරායේ බටහිර බහාලුම් පර්යන්ත ව්‍යාපෘතිය සඳහා එක්සත් ජනපද ජාත්‍යන්තර සංවර්ධන මූල්‍ය සංස්ථාවෙන් ඩොලර් මිලියන 553 ක අරමුදල් ලබා ගන්නා ලදී.  මෙයට එක්සත් ජනපදය සම්බන්ධ වන්නේ කලාපය තුළ චීන බලපෑම මැඩලීමේ පියවරක් වශයෙන් බව හින්දු පුවත්පත් වාර්තාව පෙන්වා දෙයි.

අදානි  සමූහය  දැනට ඉන්දියාව  තුළ ගුවන් තොටුපල අටක් කළමනාකරණය  කරන අතර, එය ඉන්දියාවේ මගී පදනමෙන් සියයට 23 කට සේවය කරයි. ඔවුන් ශ්‍රී ලංකාව තුළ  මෙම  ව්‍යාපාරික අවස්ථාවත් ගතහොත් එය ඉන්දියාවෙන් පිට ඔවුන්ගේ පළමු  ජාත්‍යාන්තර තොටුපල කළමනාකරණ අත්හදා බැලීම වේ.

-lankasara