ඒකට හේතුව තමයි ශ්‍රී ලංකාව කෘෂිකර්මයට පහුගිය වසර කිහිපය ඇතුළේ ඉතා අඩු බරක් යෙදවූ බව පේන්න තියෙන නිසා. ඒ නිසා කෘෂිකර්ම ව්‍යාපෘති ලංකාවේ දියත් වෙන්නේ ඉතා අකාර්යක්ෂම විදියට. කෘෂිකර්ම සම්බන්ධව මැති ඇමැතිවරු නම් කිහිප දෙනෙක් පත්වෙනවා. ඒ වගේම කෘෂිකර්මය සම්බන්ධව ආයතන සිය ගණනක් තියෙනවා.
සෑම ග්‍රාමසේවා කොට්ඨාසයකටම කෘෂිකර්ම පර්යේෂණ නිලධාරියෙක්ව පත්කරලා ඉවරයි. හැබැයි මේ සියල්ල අතරතුරේ ලංකාවේ කෘෂිකාර්මිකව කොච්චර දියුණු වෙලා තියෙනවද? අපි දන්නවා ලෝකෙ බොහෝ රටවල් කෘෂිකාර්මිකව දියුණු වෙලා තියෙනවා. ඉතියෝපියාව වගේ රටවල් අද වෙද්දී තමන්ගේ ආර්ථිකය ශක්තිමත් කරගන්න කෘෂිකර්මය පාවිච්චි කළා.
ඒකට හේතුව විදියට ඔවුන් කියන්නේ කෘෂිකාර්මික වශයෙන් තමන්ගේ ප්‍රදේශවල වගා කළ හැකි බෝග හඳුන්වා දෙමින්, ඒ සඳහා ක්‍රමවේද සකස් කරමින් ඔවුන් තමන්ගේ කෘෂිකර්මය නගාසිටුවලා තියෙනවා. ලෝකෙ වතුර බින්දුවක්වත් නැති, මහපොළොවෙන් වතුර එන්නේ නැති රටවල් පවා අද කෘෂිකර්මික වශයෙන් දියුණු වෙලා තියෙනවා.
නමුත් අද වෙද්දී ලංකාව මොන මට්ටමකද කෘෂිකාර්මික අංශයෙන් ඉන්නේ? මේ ගැන කතාකරද්දී අපට එක පාරටම මතක් වෙන්නේ වෙන මොනවත් නෙවෙයි, ගෝඨාභය රාජපක්ෂ හිටපු ජනාධිතිතුමා පොහොර සම්බන්ධයෙන් ගත්ත තීරණය.
මේ තීරණය ඉතා ආන්දෝලනාත්මක එකක්. මේ සඳහා බොහෝ දෙනෙක් වගකිව යුතුයි. මේ තීරණය මේ දක්වා වැඩිදියුණු කරගන්න බොහෝ දෙනෙක් කටයුතු සිද්ධ කළා. ඒ වගේම පොහොර නිසා මහපොළොව විනාශ වීම නවත්වන්න විශාල ව්‍යාපෘති දියත් කරපු සමහර භික්ෂුන්වහන්සේලා අද ඉන්නවද නැද්ද කියලවත් හොයාගන්න නෑ. හැබැයි ලංකාවේ කෘෂිකර්මය තිබුණු තැනිනුත් පහළට වැටුණා.
ඒ අස්සේ පොහොර නැව් ගෙනාවා, ඒවාට සල්ලි ගෙව්වා. ඒ හරහා අපේ ආර්ථිකය තව තවත් වල්මත් වුණා. එතකොට අපේ නිෂ්පාදනයනුත් ඉතා අඩු වෙන්න පටන් ගත්තා. නිෂ්පාදනයන් නිසා අපි ලබාගත්ත ආදායමත් අපට නැති වුණා.
ඒ අස්සේ තවත් ප්‍රවෘත්තියක් එළියට ඇවිල්ලා තියෙනවා. ඒ තමයි රජය නැනෝ නයිට්‍රජන් දියර පොහොර ආනයනයේදී සැපයුම්කරුට රුපියල් හාරකෝටි අනූඅට ලක්ෂයක මුදලක් ගෙවලාය කියන එක. මේක ගණන් බලලා හරියටම කිව්වොත්, රුපියල් හාරකෝටි අනූඅට ලක්ෂ හතළිස් හයදහස් හාරසිය හයක මුදලක් මේ විදියට ගෙවලා, මේ වර්ෂයේ ජනවාරි මස 30 වැනිදා වන විටත් අය කරගෙන නොතිබූ බව විගණන කාර්යාලය ප්‍රකාශ කරනවා.
නැනෝ නයිට්‍රජන් දියර පොහොර බෝතල් 100,224ක් 2021 ඔක්තෝබර් මස 18 වැනි දින ආනයනය කිරීම සඳහා සැපයුම්කරු වෙත බෝතලයකට ඇ.ඩො. 12.45 බැගින් රුපියල් විසිපන් කෝටි තිස්තුන් ලක්ෂ එක්දහස් එකසිය විසි හයක මුදලක් ගෙවා තිබුණු බව කියනවා. පසුව බෝතලයක මිල ඇ.ඩො. 10 දක්වා අඩුකරගැනීමට කටයුතු කරලා තියෙනවා.
ඒ කියන්නේ ඇ.ඩො. 2.45ක් අඩුකර ගැනීමක් සිදුකරන්න මේගොල්ලෝ සමත් වෙලා තියෙනවා. ඒ අනුව සැපයුම්කරුට වැඩිපුර ගෙවා ඇති මුදල් අයකර ගෙන නොතිබුණු අතර, සී/ස. කොළඹ කොමර්ෂල් පොහොර සමාගමේ අවසන් ගිණුම් තුළ එම වටිනාකම් ලැබිය යුතු මුදලක් ලෙස ගිණුම්ගත කර නොතිබූ බවද විගණන වාර්තාවේ සඳහන් වෙනවා.
කෝප් කමිටු, කෝපා කමිටු පත්කර ගනිමින් අපි මොකක්ද කළේ කියන එක දැන් අපට ආයෙත් ප්‍රශ්න කරන්න සිද්ධ වෙනවා. මේකෙ තියෙන ඉතා කනගාටුදායකම සිද්ධිය වෙන්නේ 2021 – 2023 කාලය ඇතුළත අපි අතිශය අවාසනාවන්ත ලෙස අපේ ආර්ථිකය බිඳවැටුණේ ඩොලර් හිඟවීම නිසා. එක වෙලාවක් තිබුණා අපේ මහ බැංකුවට ඩොලර් සතයක්වත් නැතිව ගිය.
ඩොලර්වලින් ගෙවාගන්න බැරි නිසා අපට තෙල් නැතිවුණා. එන තෙල් නැවට ඩොලර් හොයලා ගෙවන ගානට අපි පත්වුණා. එහෙම තත්ත්වයක් යටතෙත් මේ විදියට අපට ඇයි මුදල් අයකර ගන්න බැරිවුණේ? ඇ.ඩො. 12.45ක මුදලකට නැනෝ නයිට්‍රජන් මිලිලීටර් 500 බෝතලයක් මිලදී ගැනීමට තීරණය කරලා තිබුණේ කවුද? මේ පිළිබඳ අදාළ පොහොර සමාගමේ කළමනාකාරීත්වය විසින් අමාත්‍ය මණ්ඩලයේ අනුමැතිය මත රටේ හදිසි අවශ්‍යතාව හේතුකොටගෙන නැනෝ නයිට්‍රජන් දියර පොහොර ආනයනය කිරීමට කෘෂිකර්ම අමාත්‍යාංශය තීරණය කළ බව සඳහන් කරලා තියෙනවා.
රටේ හදිසි අවශ්‍යතාවක් නිර්මාණය වුණේ ඇත්තටම ඔබට මතක ඇති මේ පොහොර සම්බන්ධව රටේ ඇතිවෙච්ච ප්‍රශ්නය නිසා. කාබනික පොහොර ව්‍යාපෘති දියත් කරන්න පටන් ගත්තා. කාබනික පොහොර අවශ්‍යයි කියලා කිව්වා. ලංකාවට එතෙක් ගෙන්වපු රසායනික පොහොර නතර කළා.
රසායනික පොහොර නැවැත්වීමට දැඩි තීරණයක් ගත්තා, කරන්න බැරි නම් බලහත්කාරයෙන් හරි කරවන්න කියලා අපේ හිටපු ජනාධිපතිතුමා කිව්වා. එතුමා කරන්න බැරි නම් බලහත්කාරයෙන් හරි කරවන්න කියලා කරගත්ත හරියද මේ කියලා අපට මේ මොහොතේ ප්‍රශ්න කරන්න හිතෙනවා.
කොහොම නමුත් මේ වෙනකොට වැඩිපුර ගෙවලා තියෙන මුදල මහා භාණ්ඩාගාරය වෙත ගෙවිය යුතු මුදලක් ලෙස ගණන් හදලා තියෙනවා. මෙහි වාණිජමය ගනුදෙනුවක් සිදු නොවූ බව සමාගම විසින් විගණනයට සඳහන් කරලත් තියෙනවා.
මේ ගනුදෙනුව සිදුවන සමයේ කෘෂිකර්ම අමාත්‍යවරයා ලෙස මහින්දානන්ද අලුත්ගමගේ මහතාත්, රාජ්‍ය අමාත්‍යවරයා ලෙස ශෂීන්ද්‍ර රාජපක්ෂ මහතාත් කටයුතු කළ බවත් විවිධ වෙබ් අඩවිවල සඳහන්ව ඇති බව දකින්න ලැබුණා.
එතුමන්ලා තවමත් මේ ආණ්ඩුවේත් ලොකු පුටුවල ඉන්නා නිසාත්, තනතුරු තාන්නමාන්න තියෙනා නිසාත් උන්දැලාගේ ඇස් පේනවා යැයි, කන් ඇහෙනවා යැයි අපි විශ්වාස කරන නිසාත් මේ මොහොතේදී අපි අහන්නේ රටට ලැබෙන්න තියෙන සල්ලි ටික දැන් කෝ? මේවා ගෙව්වේ ගෙදරින් ගෙනල්ලද? සාක්කුවෙන් අරගෙනද? තමන්ගේ ආර්ථිකයෙන්, තමන් හරිහම්බ කරපු එකෙන් ගෙවලා, එකතු කරගන්න බැරිව ගියානම් කමක් නෑ මහත්වරුනි, අපට දුකක් නෑ.
හැබැයි ඔබතුමාලා මේ ගෙවලා තියෙන්නේ කන්න බොන්න නැතුව ඉතුරුකරලා තියෙන සොච්චම් මුදල්වලින් යන්තම් ගැටගහගන්න රටක මිනිස්සුන්ගේ සල්ලි ටික කියන එක අමතක කරන්න එපා.
ජීවන පහන් තිළිණ
mawratanews
