හතළිහේ ප්‍රියමාලි විසිහයේ අප්පච්චි එක්ක අට පාරක් රට ගිහින්!

ප්‍රකෝටිපතියන් රවටා රුපියල් බිලියන ගණනක් වංචා කළ තිකෝ සමූහ ව්‍යාපාරයේ හිමිකාරිය තිලිණි ප්‍රියමාලි සිය අනියම් පුරුෂයා සමග සුඛෝපභෝගී විදෙස් සංචාර 08ක යෙදී ඇතැයි අපරාධ පරීක්ෂණ දෙපාර්තමේන්තුව අධිකරණයට ඊයේ (18) දන්වා සිටියේය.

40 හැවිරිදි තිලිණි ප්‍රියමාලිගේ 26 හැවිරිදි අනියම් පුරුෂයා වන දිසානායක මුදියන්සේලාගේ ඉසුරු ශම්මික බණ්ඩාර කොළඹ කොටුව වැඩබලන මහෙස්ත්‍රාත් ශිලනි පෙරේරා හමුවට ඉදිරිපත් කරමින් අපරාධ පරීක්ෂණ දෙපාර්තමේන්තුවේ නිලධාරීන් එලෙස දන්වා සිටියේය.

මෙම සැකකාර ඉසුරු බණ්ඩාර නමැත්තා තිලිණි ප්‍රියමාලිගේ ව්‍යාපාරවල අධ්‍යක්ෂවරයකු ලෙස කටයුතු කරමින් අවස්ථා කිහිපයකදී සැකකාරියගෙන් ලබාගත් රුපියල් කෝටි 08ක මුදලක් ඩොලර් බවට පත් කර තිබෙන බව විමර්ශනවලදී අනාවරණය වූයේ යැයි ද අපරාධ පරීක්ෂණ දෙපාර්තමේන්තුව අධිකරණය වෙත වාර්තාවක් ඉදිරිපත් කරමින් දන්වා සිටියේය.

ඇමෙරිකන් ඩොලර් 60000ක් ඔස්ට්‍රේලියානු ඩොලර් ලක්ෂයක් සහ රත්රන් කිලෝවක් වංචා කරන ලදැයි කොළඹ බ්‍රිස්ටල් වීදියේ විදෙස් මුදල් හුවමාරු මධ්‍යස්ථානයක් පවත්වාගෙන යන අබ්දුල් හසන් කමල් හසන් කළ පැමිණිල්ලකට අනුව සැකකාර ඉසුරු බණ්ඩාර අත්අඩංගුවට ගත් බවද පොලිසිය අධිකරණයට දැනුම් දුන්නේය.

තිලිණි ප්‍රියමාලි නමැති සැකකාරියට පැමිණිලිකාර කමල් හසන් හඳුන්වා දී ඇත්තේ ද සැකකරු විසින් බවත්, සැකකාරිය සිදු කර ඇතැයි කියන මහා පරිමාණ වංචාවන්ට ඔහුද ආධාර අනුබල දී ඇතැයිද පොලිසිය දන්වා සිටියේය.

මෙම සැකකරු මෑතකදී රුපියල් ලක්ෂ 300කට වාහනයක් විකුණා ඇතැයි දන්වා සිටි පොලිසිය වංචා කරන ලදැයි කියන රත්රන්වලින් සැලකිය යුතු කොටසක් සැකකරු සන්තකයේ පවතින බවද දන්වා සිටියේය.

සැකකරු 2019 වසරේ දී මුහුණු පොත හරහා තිලිණි ප්‍රියමාලි සමග ප්‍රේම සබඳතාවක් ඇති කරගෙන තිබෙන බව දන්වා සිටි පොලිසිය තිකෝ සමූහ ව්‍යාපාරයේ හිමිකාරිය වන තිලිණි ප්‍රියමාලි සමග සැකකරු සිදු කරන ලද ගනුදෙනු සම්බන්ධයෙන් පුළුල් විමර්ශනයක් පවත්වන බවද දන්වා සිටියේය.

මේ අතර, ඔහු පෙනී සිට ඇත්තේ ඇගේ සැමියා ලෙසිණි බවත්, එසේම ඇයත් සිය සැමියා ලෙස හඳුන්වා දී ඇත්තේ ඔහුව බව අපරාධ පරීක්ෂණ දෙපාර්තමේන්තු තොරතුරු වලින් වාර්තා වේ.

තිළිණි ඔහු අමතා ඇත්තේ “අප්පච්චි” ලෙසින් බවද පැවසේ.

මෙම වංචාවන් සම්බන්ධයෙන් සංකීර්ණ විමර්ශනයක් සිදු කරන බැවින් සැකකරු රිමාන්ඩ් බාරයේ තබන ලෙස අපරාධ පරීක්ෂණ දෙපාර්තමේන්තුවේ නිලධාරීන් අධිකරණයෙන් ඉල්ලා සිටියේය.

මෙම සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව සංකීර්ණ විමර්ශනයක් පවත්වන බැවින් සැකකරු අද (19) තෙක් රිමාන්ඩ් භාරයේ තබන ලෙස මහෙස්ත්‍රාත්වරිය නියම කළේය.

මෙම සැකකරු සන්තකයේ තිබෙන බව කියන ‘රෙක්ස්ටන්’ වර්ගයේ ජීප් රථය කිසිදු පැවරීමක් සිදු නොකරන ලෙසට නියෝගයක් ද මහෙස්ත්‍රාත්වරිය නිකුත් කළාය.

මෙම නඩුව අද දින යළි කැඳවීමට නියමිත අතර ඒ අනුව රිමාන්ඩ් බාරයේ සිටින තිලිණි ප්‍රියමාලි නමැති සැකකාරිය කොළඹ කොටුව මහෙස්ත්‍රාත් අධිකරණය වෙත අද ඉදිරිපත් කිරීමටද නියමිතය.