චීනයේ නිෂ්පාදිත ප්‍රහාරක නෞකාවක් වන මෙය කාම්බෝජ සහ මැලේසියානු නාවික හමුදා සමග සිදුකළ යුද අභ්‍යාසයකින් පසු පාකිස්තානය වෙත පළමුවරට යන අවස්ථාවේදී මෙරටට පැමිණීමට නියමිත බව වාර්තා වෙයි.
නෞකාව මලයාසියාවේ ලුමුට් වරායේ සිට පාකිස්තානය වෙත යන අතරතුර සේවා සඳහා බංග්ලාදේශ චැත්‍රෝග්‍රාම් වරාය වෙත පිවිසිමට අවසර ඉල්ලුව ද බංග්ලාදේශ රජය ඊට අවසර ලබානොදීම නෞකාව ශ්‍රී ලංකාවට පැමිණීමට හේතුවී තිබේ.
බංග්ලාදේශ අග්‍රාමාත්‍ය ෂෙයික් හසීනා මහත්මිය ඉදිරියේදී ඉන්දියාවේ සංචාරයක යෙදෙමින් සංවර්ධන ව්‍යාපෘති කිහිපයක් ඇරඹීමට සූදානම්ව සිටීම, පාකිස්තාන නෞකාවට බංග්ලාදේශය අවසරය ලබානොදීමට හේතුව බව ඉන්දීය මාධ්‍ය වාර්තා කරයි.
ඒ අනුව මෙම ප්‍රහාරාත්මක මිසයිල යුද නෞකාව අගෝස්තු 12 වනදා සිට 15 වනදා දක්වා කොළඹ වරාය වෙත පැමිණ සේවා ලබාගැනීමට නියමිතය.
ඉන්දිය සයුරේ භූ දේශපාලනය හා ශ්‍රී ලංකාවේ ඉන්දු – චීන සහයෝගීතාව පිළිබඳ නව කතාබහක් මෙලෙස ඇතිවී තිබෙන පසුබිමක ඉතිහාසයේ පළමු වරට අමෙරිකානු නාවික හමුදා නෞකාවක් නඩත්තු කටයුතු සඳහා ඉන්දියාව වෙත පැමිණ තිබේ.
ඉන්දියාවේ චෙන්නායි හි කට්ටුප්පල්ලි වරාය වෙත එලෙස පැමිණ ඇත්තේ චාල්ස් ඩ්‍රෘ නමැති නෞකාවය.
ඉන්දු – එක්සත් ජනපද උපායමාර්ගික හවුල්කාරීත්වය යටතේ මෙම නෞකාව නඩත්තු කිරීම සිදු කෙරෙයි.
ඒ අනුව චාල්ස් ඩ්‍රෘ නෞකාව පසුගිය ඉරිදා චෙන්නායි, කට්ටුප්පල්ලි වරාය වෙත පැමිණ ඇති අතර එය දින 11ක් එම වරායේ නැංගුරම්ලා තිබෙන බව වාර්තා වෙයි.
ඉන්දියානු සාගරයේ ඩියේගෝ ගාර්ෂියා දූපතේ සහ සිංගප්පුරුව තුළ මේ වනවිටත් අමෙරිකානු නාවික හමුදා නෞකා නඩත්තු කටයුත් සිදුකරන අතර ඒ අනුව චෙන්නායි කට්ටුප්පල්ලි වරාය අමෙරිකානු නාවික හමුදා නෞකා නඩත්තු කටයුතු කරන නවතම ස්ථානය වනු ඇත.
– Aruna
