නැව ගැන චීනයෙන් ආණ්ඩුවට හදිසි යෝජනාවක්!

කලාපීය දේශපාලන මතභේදයකට හේතුවී තිබෙන චීන Yuan Wang 5 නැව පිළිබඳව චීන බලධාරීන් විසින් ශ්‍රී ලංකා රජයේ ඉහළ පෙළේ නියෝජිතයින් සමඟ හදිසි සාකච්ඡාවක් ඉල්ලා තිබෙනවා. ඒ නෞකාවේ මෙරට සංචාරය කල්දමන්නැයි ශ්‍රී ලංකා රජය සිදුකළ ඉල්ලීමත් සමඟ යි.

අදාළ ගැටලුව පිළිබඳව සාකච්ඡා කිරීම සඳහා මෙරට චීන තානාපති කාර්යාලය විසින් අදාළ ඉල්ලීම සිදුකර ඇති බව විදෙස් මාධ්‍ය වාර්තා කළේය. චීන අභ්‍යවකාශ හා චන්ද්‍රිකා නිරීක්ෂණ සඳහා බව කියන Yuan Wang 5 නෞකාව ලබන 11 වැනිදා හම්බන්තොට වරායට ළඟාවීමට නියමිතව තිබුණා.

නෞකාවේ එම සංචාරය, කලාපයේ ආරක්ෂාවට දැඩි තර්ජනයක් බව සඳහන් කළ ඉන්දීය රජය ඒ පිළිබඳව සිය කනස්සල්ල පළකළා. අදාළ නෞකාවේ මෙරට සංචාරය සඳහා ශ්‍රී ලංකා රජය විසින් අවසර ලබාදී තිබුණ ද උද්ගතව ඇති තත්ත්වය හමුවේ නෞකාව පැමිණෙන දිනය කල්දමන ලෙස විදේශ කටයුතු අමාත්‍යංශය චීන රජයෙන් ඉල්ලා තිබුණා.

නැවේ ගමන පිළිබඳව ඇතිව තිබෙන මෙම ගැටලුකාරී තත්ත්වය පිළිබඳව අවධානය යොමු කිරීමේ අරමුණින් චීන තානාපති කාර්යාලය ශ්‍රී ලංකා බලධාරීන් සමග හදිසි සාකච්ඡාවක් ඉල්ලා ඇති බවයි කියන්නේ.