"මම ගැහුවොත් ඔය කෑගහන අයගේ රෙදි ගැලවෙනවා... මට පහරදුන්නේ ජීවත් වෙන්න ඔක්සිජන් ඕන නෑ කියපු ඇමති"- සනත් නිශාන්තට කනේ පාරක් දෙමින් නිමල් ලංසාගෙන් විශේෂ ප්‍රකාශයක් (VIDEO)

අමාත්‍යාංශයේ ප්‍රශ්න ගැටලු සම්බන්ධයෙන් ලිඛිත වාර්තාවක් ජනාධිපතිවරයාට බාරදුන් බව ග්‍රාමීය මාර්ග සහ අවශේෂ යටිතල පහසුකම් රාජ්‍ය අමාත්‍ය නිමල් ලන්සා පවසයි. ඔහු මෙසේ පැවසුවේ රටේ පවතින තත්වය පිළිබඳ සභාව කල්තබන විවාදයට අද (23) පාර්ලිමේන්තුවේදී එකතු වෙමිනි.

ජනාධිපතිවරයා තමාගේ පැමිණිල්ල ගැන සාධාරණ පරීක්ෂණයක් පවත්වනු ඇතැයි බලාපොරොත්තු වන බව පැවසූ රාජ්‍ය අමාත්‍යවරයා තමාගේ ප්‍රශ්නය විසඳිය හැක්කේ ජනාධිපතිවරයාට පමණක් බව ද සඳහන් කළේය. මෙනිසා එම වාර්තාවේ කරුණු තමා මේ සභාවේ පැවසීමට බලාපොරොත්තු නොවන බව ද ලංසා කීවේය.

“අද රටක් විදියට අපි ඉන්නේ විශාල ආර්ථික ප්‍රශ්නයක. මේ තත්වය ඇති වුණේ කොවිඩ් වසංගතය නිසායි. අපි විපක්ෂයට දොස් කියලා විපක්ෂය අපිට දොස් කියලා මේ ප්‍රශ්නය විසඳෙන්නේ නැහැ. අද රටේ තියෙන්නෙ ඩොලර් ප්‍රශ්නයක්.අපි ඒක පිළිගන්න ඕන.

මේ තත්වය ඇති වුණේ කොවිඩ් නිසයි. ආණ්ඩුව විපක්ෂය කවුරුත් එකතුවෙලා මේ ප්‍රශ්නයට විසඳුම් සෙවිය යුතුයි. අපේ පෞද්ගලික ප්‍රශ්න මෙතන කතා කතාකරල වැඩක් නෑ. ආර්ථික ප්‍රශ්නය ගැන මේ රජයට විතරක් ඇඟිල්ල දිගු කිරීම වැරදියි.

අපි මෙතනදී පක්ෂ පාට ජාති භේද අමතක කළ යුතුයි. හැම ආණ්ඩුවක්ම බලයට ආවම කරලා තියෙන්නේ කලින් ආණ්ඩුවට දොස් කියන එක. ආදායම් උපයන වැඩපිළිවෙළකට රට යා යුතුයි. එකිනෙකාට චෝදනා කරලා මේ ප්‍රශ්න විසඳන්න බැහැ.

අපි වාද භේද ප්‍රශ්න ඔක්කොම අමතක කරමු. සත්‍ය රටට කතා කරලා වැඩපිළිවෙළකට එමු.

රට වැටී ඇති තත්ත්වයට මේ රට පාලනය කළ සියලු දෙනා වගකිව යුතුයි. ආණ්ඩුව ශක්තිමත් නම් මිනිස්සු ශක්තිමත් වෙනවා. ඒ නිසා අප කළ යුත්තේ ආණ්ඩුව ශක්තිමත් කිරීමයි. මිනිස්සුන්ට නොයෙකුත් ඉල්ලීම් ඉදිරිපත් කරන්න පුළුවන්. නමුත් ඒව සාධාරණ වෙන්න ඕන. ආණ්ඩුවකට සල්ලි ගස්වලින් කඩන්න බැහැ. ජනතාවගෙන් බදු ගන්න බැරි නම් රටකට සල්ලි කෝ.

මට යම් යම් ප්‍රශ්න ඇති වෙලා තියෙනවා. මේවා මගේ විතරක් නොවෙයි රටේත් ප්‍රශ්න. සමහර වැල් ගහ වටා එතෙනවා. නමුත් සමහර වැල් ගහ ආරක්ෂා කරන්නේ නැහැ. ගහ විනාශ කරනවා. මට පහුගිය ටිකේ නින්දා අපහස කළ අපේ පැත්තෙ ඉන්න අයට මම කියන්නේ එක දෙයයි. මටත් ප්‍රහාරය එල්ල කරන්න පුළුවන්. නමුත් මම ඒ තත්ත්වයට යන්නේ නැහැ.

මොකද ජනතාව කිව්වා මට එහෙම කරන්න එපා කියලා. මම ඒ අයට ප්‍රති පහර එල්ල කළොත් මීට වඩා තත්වය දරුණු වේවි. ආර්ථිකය ගොඩනැගීම සඳහා යම් කතිකාවතක් ඇති කර ගැනීමට එක්වන්න කියලා සමගි ජන බලවේගයට ජනතා විමුක්ති පෙරමුණට මම ආරාධනා කරනවා.”