පාර්ලිමේන්තුව තුළ ඔළුගෙඩි මාරුවකින් ආණ්ඩුව වෙනස් කිරීමේ හැකියාව මේ වන විට සජිත් ප්‍රේමදාස නායකතුමාට පවතින බව සමඟි ජන බලවේගයේ පාර්ලිමේන්තු මන්ත්‍රී හේෂා විතානගේ මහතා පැවසුවේය.
ඒ, අද (19) කොළඹදී පැවති මාධ්‍ය හමුවකදීය.
ආණ්ඩුවේ ප්‍රබල කැබිනට් ඇමතිවරු ආණ්ඩුව පෙරළා දමන්න අවශ්‍ය සැලසුම් සකස් කරමින් සිටින බවයි මන්ත්‍රීවරයා පැවසුවේ.
එවැනි බල පෙරළියකට මෙය අවස්ථාව නොවන අතර රට ගොඩනැගීමට නම් ආණ්ඩුවට කියන්නේ මැතිවරණයක් තියා ජනතාවට තමන්ගේ නායකයා තෝරාගැනීමට අවස්ථාව දෙන ලෙස යැයි හෙතෙම සඳහන් කළේය.
තවදුරටත් ජනතාව රවටමින් ආණ්ඩුව පවත්වාගෙන යා නොහැකි තරම් නරක තැනකට ආණ්ඩුව පත්ව සිටින බවයි මන්ත්‍රීවරයා කියාසිටියේ.
පල්ලිවල බෝම්බ අටවමින් එන ප්‍රශ්නවලට උත්තර සෙවීමට තවදුරටත් ආණ්ඩුව උත්සහ කරන්නේ රාජපක්ෂ මහත්වරු ගල් ගසා එලවන දවස වැඩි ඈතක නොවන බවද හේෂා විතානගේ මහතා අවධාරණය කරන ලදී.
