චම්පිකගේ නඩුවට රජය ලක්‍ෂ ගාණක් වියදම් කර සාක්ෂි කරුවෙන් ජර්මනියෙන් ගෙනේ...
හිටපු අමාත්‍ය පාඨලී චම්පික රණවක මහතාට එරෙහිව කොළඹ මහාධිකරණයේ විභාග වන නඩුවකට අදාළව සාක්ෂිකරුවෙකු සම්බන්ධයෙන් සිදුව ඇතැයි කියන නීති විරෝධී ක්‍රියාමාර්ග, රාජ්‍ය මුදල් අයථා ලෙස වියදම් කිරීම සහ සාක්ෂිකරුවන්ට අයුතු මැදිහත්වීම් සිදුකිරීම පිළිබඳව පූර්ණ විමර්ශනයක් පවත්වන ලෙස ඉල්ලා එක්සත් ජනරජ පෙරමුණ විසින් අදාළ බලධාරීන් වෙත විශේෂ පැමිණිලි දෙකක් භාරදී තිබේ.
අපරාධයක වින්දිතයන් සහ සාක්ෂිකරුවන් ආරක්ෂා කිරීමේ ජාතික අධිකාරිය වෙත සහ නීතිපති දෙපාර්තමේන්තුව වෙත ඉකුත් 21 වැනිදා මෙම පැමිණිලි ඉදිරිපත් කර ඇත.
කොළඹ මහාධිකරණය හමුවේ විභාග වන නඩුවට අදාළව ඉකුත් ඔක්තෝබර් 19 වැනිදා අධිකරණයේදී ලබාදුන් සාක්ෂියක් පදනම් කරගනිමින් මෙම පැමිණිල්ල ඉදිරිපත් කර තිබේ.
එම නඩුව සඳහා සාක්ෂිකරුවෙකු ජර්මනියේ සිට ශ්‍රී ලංකාවට කැඳවාගෙන ඒම වෙනුවෙන් රුපියල් හාරලක්ෂ පනස්දහසක පමණ ගුවන් ගමන් ගාස්තු ඇතුළු අනෙකුත් වියදම් රජයේ මුදලින් දරා ඇති බවත්, එම මුදල් වැය කිරීම සහ සම්බන්ධීකරණ කටයුතු සිදුකර ඇති ආකාරය අතිශය සැකකටයුතු බවත් පැමිණිල්ල මගින් පෙන්වා දී ඇත.
අපරාධයක වින්දිතයන් සහ සාක්ෂිකරුවන් ආරක්ෂා කිරීමේ පනතේ විධිවිධාන අනිසි ලෙස භාවිත කරමින් මෙම ක්‍රියාවලිය සිදුකර ඇති බවට චෝදනා කරන එක්සත් ජනරජ පෙරමුණ, විදේශගතව සිටින සාක්ෂිකරුවන්ගෙන් සාක්ෂි ලබාගැනීම සඳහා නීතියෙන් සලසා ඇති නිසි ක්‍රමවේදයන් මෙහිදී අනුගමනය කර ඇත්දැයි විමර්ශනය කරන ලෙස ඉල්ලා සිටියි.
එසේම, රාජ්‍ය මුදල් වැය කිරීමේදී මූල්‍ය රෙගුලාසි සහ නීතිමය රාමුවට අනුකූලව කටයුතු කර තිබේද යන්නත්, මෙම අනුග්‍රහයන් සහ මැදිහත්වීම් හරහා අදාළ සාක්ෂිකරුගේ ස්වාධීනත්වයට හෝ විත්තිකරුට හිමි සාධාරණ නඩු විභාගයකට කිසියම් බලපෑමක් එල්ල වී තිබේද යන්නත් පිළිබඳව විධිමත් සොයා බැලීමක් අත්‍යවශ්‍ය බව එම පැමිණිල්ලේ සඳහන් වේ.
මේ පිළිබඳව ස්වාධීන පරීක්ෂණයක් පවත්වා රජයේ මුදල් භාවිතය සම්බන්ධයෙන් විශේෂ විගණනයක් සිදුකරන ලෙසත්, යම් හෙයකින් නීති උල්ලංඝනයක් සිදුව ඇති බව අනාවරණය වුවහොත් ඊට වගකිවයුතු පුද්ගලයන්ට එරෙහිව නීත්‍යානුකූල පියවර ගන්නා ලෙසත් අදාළ පැමිණිල්ල මගින් වැඩිදුරටත් ඉල්ලා ඇත.
