කුඩු කන්ටේනර් මෙහෙයුමේදී රන්මල් රාජකාරිය පැහැර හැර ඇතැයි හෙලිවේ... පොලිපති නියමයෙන් අපරාධ පරීක්‍ෂණයක්!
කොළඹ වරායේ බහාලුමක සඟවා තිබූ මත්ද්‍රව්‍ය තොගයක් පිළිබඳ බුද්ධි තොරතුරු ලැබී තිබියදීත් ඒ සම්බන්ධයෙන් නිසි ක්‍රියාමාර්ග නොගෙන රාජකාරිය පැහැර හරිමින් නොසැලකිලිමත් ලෙස කටයුතු කළ බව කියන ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතා ඇතුළු නිලධාරීන්ට එරෙහිව අපරාධ පරීක්ෂණ දෙපාර්තමේන්තුව මඟින් විධිමත් අපරාධ විමර්ශනයක් ආරම්භ කර ඇත.
පසුගිය අගෝස්තු මස 31 වැනිදා කොළඹ වරායේ බහාලුමක තිබී මත්ද්‍රව්‍ය තොගයක් සොයා ගැනීමේ සිදුවීමට අදාළව, පොලිස්පතිවරයාගේ නියෝග පරිදි පොලිස් විශේෂ විමර්ශන ඒකකය විසින් සිදු කරන ලද අභ්‍යන්තර පරීක්ෂණයකදී මෙම තොරතුරු අනාවරණය වී තිබේ.
නීතිවිරෝධී මත්ද්‍රව්‍ය තොගයක් අඩංගු බහාලුම් දෙකක් ශ්‍රී ලංකාවට ආනයනය කර කොළඹ වරාය තුළ රඳවා ඇති බවට ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතා වෙත ඉකුත් අගෝස්තු 14 වැනිදා තොරතුරක් ලැබී ඇත. එම තොරතුර එදිනම පොලිස් මත්ද්‍රව්‍ය නාශක කාර්යාංශය වෙත දැනුම් දීමට පියවර ගෙන තිබුණද, ඒ පිළිබඳව නිසි පසු විපරමක් හෝ කඩිනම් නීතිමය පියවර ගැනීමක් සිදු කර නොමැත.
කෙසේ වෙතත්, අගෝස්තු 22 වැනිදා මධ්‍යම අපරාධ විමර්ශන කාර්යාංශයේ උප පොලිස් පරීක්ෂක ඒකනායක මහතා වෙතද එම මත්ද්‍රව්‍ය තොගය පිළිබඳ වෙනම තොරතුරක් ලැබී තිබේ. ඒ අනුව වහා ක්‍රියාත්මක වූ එම නිලධාරියා අදාළ පියවර ගනිමින් අගෝස්තු 31 වැනිදා කොළඹ වරාය වෙත ගොස් රේගු නිලධාරීන්ගේද සහාය ඇතිව බහාලුම පරීක්ෂා කර මත්ද්‍රව්‍ය තොගය අත්අඩංගුවට ගැනීමට සමත් විය.
එම අවස්ථාවේදී පොලිස් මත්ද්‍රව්‍ය නාශක කාර්යාංශයේ නිලධාරීන් පිරිසක්ද එම ස්ථානයට පැමිණ ඇතත්, මත්ද්‍රව්‍ය තොගය අනාවරණය කර ගැනීමේ මූලික මෙහෙයුම ක්‍රියාත්මක කර ඇත්තේ මධ්‍යම අපරාධ විමර්ශන කාර්යාංශය විසිනි.
ඒ අනුව, ලැබුණු බුද්ධි තොරතුර සම්බන්ධයෙන් කඩිනම් පියවර නොගෙන ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතා ඇතුළු නිලධාරීන් බරපතළ ලෙස රාජකාරිය පැහැර හැර නොසැලකිලිමත් ලෙස කටයුතු කර ඇති බව පොලිස් විශේෂ විමර්ශන ඒකකය මඟින් තහවුරු කරගෙන ඇත.
එබැවින් අදාළ නිලධාරීන්ට එරෙහිව දෙපාර්තමේන්තු විනය ක්‍රියාමාර්ගවලට අමතරව අපරාධ විමර්ශනයක්ද සිදු කිරීම සුදුසු බවට එම ඒකකය නිර්දේශ කර තිබේ.
මෙම නිලධාරීන් දැක්වූ නොසැලකිල්ල සහ රාජකාරිය පැහැර හැරීම කිසියම් පාර්ශ්වයකට වාසි සහගත තත්ත්වයක් ඇති කරදීමේ අරමුණින් සිදු කළ එකක්ද යන්න පිළිබඳව සොයා බැලීමට පොලිස්පතිවරයා විසින් අපරාධ පරීක්ෂණ දෙපාර්තමේන්තුව වෙත නියෝග කර ඇත.
එකී විමර්ශනයෙන් අනතුරුව අදාළ පොලිස් නිලධාරීන්ට එරෙහිව අපරාධ චෝදනා ගොනු කිරීමට නියමිත බව පොලිස් මාධ්‍ය කොට්ඨාසය වැඩිදුරටත් සඳහන් කරයි.
මේ පුවත තව අයට බලන්න
