මෙරට විශාලම දළ ඇතා ‘මහසෙන්’ අතුරුදන්!
ශ්‍රී ලංකාවේ ජීවත්වන වනසතුන් අතුරින් විශාලතම දළ යුගල හිමි හස්තියා ලෙස සැලකෙන ‘මහසෙන්’ නමැති දළ ඇතා මේ වන විට අතුරුදන්ව ඇතැයි විපක්ෂ නායක සජිත් ප්‍රේමදාස මහතා පාර්ලිමේන්තුව අමතමින් අනාවරණය කලේය.
මරදන්කඩවල ප්‍රදේශය සිය ප්‍රධාන නිජබිම කරගනිමින් සැරිසැරූ මහසෙන් ඇතා, කලින් කලට රිටිගල, කන්තලේ, කවුඩුල්ල, මින්නේරිය සහ සෝමාවතිය ඇතුළු රක්ෂිත වනාන්තර කලාප ඔස්සේ සංක්‍රමණය වෙමින් ජීවත් වූ බව විපක්ෂ නායකවරයා සභාව හමුවේ පැහැදිලි කළේය.
මෑතකදී අවාසනාවන්ත ලෙස මියගිය කාවන්තිස්ස හස්තියාටත් වඩා විශාල වූ අලංකාර දළ යුගලක් මහසෙන් හස්තියා සතුව පවතින බව පෙන්වා දුන් සජිත් ප්‍රේමදාස මහතා, ජාතික උරුමයක් බඳු මෙවැනි අගනා සත්ත්වයෙකු පිළිබඳව කිසිදු හෝඩුවාවක් නොමැතිව අතුරුදන්ව තිබීම සම්බන්ධයෙන් සිය බලවත් කනගාටුව සහ සැකය පළ කළේය.
මෙරට වනාන්තරවල ඉතිරිව සිටින සීමිත දළ ඇතුන්ගේ ජීවිත දළ ජාවාරම්කරුවන්ගෙන් සහ මිනිස් ක්‍රියාකාරකම්වලින් ආරක්ෂා කරගැනීම සඳහා කඩිනම් වැඩපිළිවෙළක් ක්‍රියාත්මක කිරීමේ අවශ්‍යතාව විපක්ෂ නායකවරයා මෙහිදී පෙන්වා දුන්නේය.
ඒ වෙනුවෙන් සිවිල් ආරක්ෂක බලකාය, පොලිස් විශේෂ කාර්ය බලකාය මෙන්ම ත්‍රිවිධ හමුදාවේ ද පූර්ණ දායකත්වය ලබාගෙන ඇතුන් ගැවසෙන කලාප ආවරණය වන පරිදි විධිමත් ආරක්ෂක හා නිරීක්ෂණ යාන්ත්‍රණයක් ස්ථාපිත කරන ලෙස හෙතෙම රජයෙන් ඉල්ලා සිටියේය.
