අනුර යටතේ රටයි, ජනාධිපතිකමයි, ආණ්ඩුවයි හෑල්ලුවෙලා ඉවරයි - ජොන්ස්ටන්
වත්මන් රජය මැතිවරණ පැවැත්වීමට දැඩි බියක් දක්වන බවත්, අනුර කුමාර දිසානායක මහතාගේ පාලනය යටතේ ජනාධිපති ධුරය මෙන්ම මුළු රටම හෑල්ලුවට ලක්ව ඇති බවත් හිටපු අමාත්ය ජොන්ස්ටන් ප්රනාන්දු මහතා පවසයි.
ජන හමුවක් අමතමින් ඒ මහතා මේ බව ප්රකාශ කළේය.
රජයට 75%ක ජනමතයක් පවතින බවට කෙරෙන ප්රකාශ අසත්ය බවත්, අවම වශයෙන් සමුපකාර මැතිවරණයක්වත් ජයග්රහණය කිරීමට නොහැකි තත්ත්වයකට රජය පත්ව ඇති බවත් ඔහු පෙන්වා දුන්නේය.
රජය බලයට පත්වීමට පෙර ලබාදුන් පොරොන්දු ඉටු නොකරමින් මෙරට ගොවි ජනතාව, ගුරුවරුන්, මහාචාර්යවරුන්, නීතිඥයන් මෙන්ම රාජ්ය සේවකයන් ද ඇතුළු සියලු ක්ෂේත්ර නියෝජනය කරන පිරිස් රවටා ඇති බවට හිටපු අමාත්යවරයා චෝදනා කළේය.
"ලස්සන රටක්, පෝසත් රටක්" කරන බව පවසා බලයට පත් වූ රජය අද වන විට ජනතාව හිඟමනට ඇද දමා ඇති බව ඔහු වැඩිදුරටත් පැවසීය.
වී කිලෝවක් සඳහා රුපියල් 154ක සහතික මිලක් ලබා දෙන බවට පොරොන්දු වුවද, අද වන විට පොළොන්නරුව සහ කුරුණෑගල වැනි දිස්ත්රික්කවල වී කිලෝවක් රුපියල් 80-85 වැනි ඉතා අඩු මිලකට අලෙවි කිරීමට ගොවීන්ට සිදුව ඇති බව ඔහු පෙන්වා දුන්නේය. තමන් වෙළඳ අමාත්යවරයාව සිටි සමයේ වී ගබඩා දියුණු කර ගොවියාට සාධාරණ මිලක් ලබා දුන් ආකාරය ද ඔහු මෙහිදී සිහිපත් කළේය.
රටේ සෞඛ්ය ක්ෂේත්රය ද දැඩි අර්බුදයකට ලක්ව ඇති බවත්, ඖෂධ හිඟය සහ වෛද්යවරුන් මර්දනය කිරීම හේතුවෙන් රෝගීන් දැඩි දුෂ්කරතාවයට පත්ව ඇති බවත් ඔහු පැවසීය. එසේම, ස්වාධීන යැයි පවසන ආයතනවලට සහ පොලිසියට රජයට හිතවත් පුද්ගලයන් පත් කර ගනිමින් එම ආයතනවල ස්වාධීනත්වය විනාශ කරමින් පවතින බවට ද ඔහු චෝදනා කළේය.
රජයේ මැතිවරණ ප්රකාශනයේ නොතිබූ ව්යවස්ථා සංශෝධන ගෙන ඒමට උත්සාහ කිරීම සහ ලාල් කාන්ත වැනි ජ්යෙෂ්ඨ නායකයන් මැතිවරණවලින් ඉවත් වීමට තීරණය කිරීම හරහා රජය තුළ පවතින අභ්යන්තර අර්බුදය පැහැදිලි වන බව ද ජොන්ස්ටන් ප්රනාන්දු මහතා මෙහිදී වැඩිදුරටත් අවධාරණය කළේය.
