විනිසුරු වයස ගැන කට වහගන්නැයි කී ප්රබලයා කවුදැයි ලාල් විජේනායක හෙලි කරයි...
අධිකරණ විනිසුරුවරුන්ගේ විශ්රාම වයස දීර්ඝ කිරීමට රජය ගෙන ඇති තීරණය සම්බන්ධයෙන් විවේචන එල්ල නොකර නිහඬව සිටින ලෙස කෘෂිකර්ම අමාත්ය කේ.ඩී. ලාල් කාන්ත මහතා තමන්ගෙන් ඉල්ලා සිටි බව ජාතික ජන බලවේගයේ නායකත්ව සභාවේ සහ විධායක සභාවේ සාමාජික, ජ්යෙෂ්ඨ නීතිඥ ලාල් විජේනායක මහතා අනාවරණය කරයි.
Daily Mirror පුවත්පත සමඟ පැවැති සම්මුඛ සාකච්ඡාවකදී ඒ මහතා මේ බව සඳහන් කර ඇත.
දශක පහකට වැඩි කාලයක් තිස්සේ අධිකරණයේ ස්වාධීනත්වය වෙනුවෙන් පෙනී සිටි අයෙකු ලෙස තමන්ට මෙම කරුණ සම්බන්ධයෙන් නිහඬව සිටිය නොහැකි බව ලාල් විජේනායක මහතා පවසයි.
අමාත්ය ලාල් කාන්ත මහතා තමන්ට දුරකථනයෙන් අමතා මෙම ඉල්ලීම කළ බවත්, පසුව තමන් ඒ පිළිබඳව සිය ස්ථාවරය පැහැදිලි කරමින් අමාත්යවරයා වෙත ලිපියක් යොමු කළ බවත් ඔහු සඳහන් කළේය.
එම ලිපියේ පිටපත් ජනාධිපති අනුර කුමාර දිසානායක මහතාට සහ ජාතික ජන බලවේගයේ ලේකම් වෛද්ය නිහාල් අබේසිංහ මහතාට ද යොමු කර තිබේ.
තමන් මෙම තීරණයට විරුද්ධ වන්නේ ප්රතිපත්තිමය කරුණු මත මිස ජාතික ජන බලවේගයේ නායකත්වය සමඟ පවතින පෞද්ගලික අමනාපයක් නිසා නොවන බව ද විජේනායක මහතා අවධාරණය කළේය.
"ශිෂ්ට සම්පන්න සමාජයක ජීවත් වීමට නම් නීතියේ ආධිපත්යය තිබිය යුතුයි. නීතියේ ආධිපත්යය සුරැකෙන්නේ අධිකරණයේ ස්වාධීනත්වය පවතින්නේ නම් පමණයි," යනුවෙන් ඔහු පෙන්වා දුන්නේය.
විනිසුරුවරුන්ගේ සේවා කොන්දේසිවලට බලපාන මෙවැනි තීරණ මගින් අනාගත රජයන්ට අධිකරණය හැසිරවීමට අවස්ථාව ලැබිය හැකි බව ද ඔහු පවසයි.
වසර 50ක් පමණ ලංකා සමසමාජ පක්ෂය සමඟ කටයුතු කර ඇති තමන්, ප්රධාන තීරණ ගැනීමට පෙර පුළුල් සාකච්ඡා පවත්වන ක්රමවේදයකට හුරු වී සිටින බවත්, ජාතික ජන බලවේගය තුළ එවැනි විනිවිදභාවයකින් යුත් තීරණ ගැනීමේ ක්රියාවලියක් තමන් නොදකින බවත් ඔහු වැඩිදුරටත් සඳහන් කළේය.
"තීරණ කොහේ හෝ තැනක ගන්නා බව පෙනෙන්නට තිබුණත්, එම තීරණ ගන්නේ කොතැනද යන්න පැහැදිලි නැහැ. ගැටලුව පවතින්නේ එතැනයි," යනුවෙන් ද ලාල් විජේනායක මහතා ප්රකාශ කර ඇත.
