22 මෙච්චර හොදනම් ඇයි කලබලේ.. කලින් නොකීවෙ ඇයි..- සාලිය පීරිස්
22 වන ආණ්ඩුක්රම ව්යවස්ථා සංශෝධනය සම්බන්ධයෙන් ජනාධිපති නීතිඥ සාලිය පීරිස් මහතා කොළඹදී පැවති නීතිඥ හමුවකදී දැඩි විවේචනයක් එල්ල කළේය. මෙම හමුවේදී ඔහු පෙන්වා දුන්නේ, මෙම සංශෝධනය සැබවින්ම යහපත් අරමුණකින් ගෙන එන්නක් නම් එය මීට මාස හයකට පමණ පෙර ප්රකාශයට පත් කිරීමට රජයට හැකියාව තිබූ බවයි.
ආණ්ඩුව පවසන කරුණු ඒ අයුරින්ම පිළිගැනීමට පෙර ඒ පිළිබඳව ගැඹුරින් කල්පනා කරන ලෙස ඔහු මෙහිදී මහජනතාවගෙන් ඉල්ලා සිටියේය. අධිකරණ පද්ධතියේ විශාල වෙනසක් සිදු කරන බව පෙන්වීමට රජය උත්සාහ කළද, පවතින ප්රායෝගික තත්ත්වය ඊට වඩා වෙනස් බව ඔහු පෙන්වා දුන්නේය.
යෝජිත සංශෝධනය මගින් අභියාචනාධිකරණ විනිසුරුවරුන් සංඛ්යාව තවත් පස් දෙනෙකුගෙන් වැඩි කිරීමට යෝජනා වී ඇති බවත්, එහෙත් දැනටමත් අභියාචනාධිකරණයේ විනිසුරු පුරප්පාඩු හතරක් පවතින බවත් සාලිය පීරිස් මහතා අනාවරණය කළේය.
පවතින පුරප්පාඩු පිරවීමට කටයුතු නොකර විනිසුරුවරුන් සංඛ්යාව වැඩි කිරීමට උත්සාහ කිරීමේ සද්භාවය පිළිබඳව ඔහු මෙහිදී ප්රශ්න කළේය.
එසේම, මහාධිකරණ විනිසුරුවරුන් සංඛ්යාව 120 දක්වා ඉහළ නැංවීමට රජය සූදානම් වන බවත්, වත්මන් නීතිය යටතේ විනිසුරුවරුන් 110 දෙනෙකු පත් කිරීමට අවසර තිබියදී දැනට සේවයේ යෙදී සිටින්නේ 93 දෙනෙකු පමණක් බවත් ඔහු සඳහන් කළේය.
"දැනට පවතින පුරප්පාඩු පවා සම්පූර්ණ නොකර, අලුත් සංශෝධන මගින් සංඛ්යාවන් වැඩි කර පෙන්වීමට උත්සාහ කරන්නේ රජය අධිකරණ ක්ෂේත්රයේ ලොකු විප්ලවයක් කරන බව පෙන්වීමට පමණයි," යැයි ජනාධිපති නීතිඥවරයා වැඩිදුරටත් අවධාරණය කළේය.
මෙම නීතිඥ හමුව සඳහා ක්ෂේත්රයේ ප්රවීණයන් රැසක් එක්ව සිටි අතර එහිදී ව්යවස්ථා සංශෝධනයේ නීතිමය බලපෑම පිළිබඳව දීර්ඝ වශයෙන් සාකච්ඡා කෙරිණි.
