විජේදාසට, පුත් රඛිතට තවත් ලෙඩක්... අපරාධවලින් දේපල උපයලාදැයි සොයන්න කියයි
හිටපු අධිකරණ අමාත්ය, ජනාධිපති නීතිඥ විජයදාස රාජපක්ෂ සහ ඔහුගේ පුත් නීතිඥ රඛිත රාජපක්ෂ යන මහත්වරුන් ඇතුළු පිරිසකගේ වත්කම් පිළිබඳව වහාම විමර්ශනයක් පවත්වන ලෙස ඉල්ලා අල්ලස, දූෂණය සහ නාස්තියට එරෙහි පුරවැසි බලය සංවිධානය අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කර තිබේ.
අපරාධයකින් උත්පාදිත දේපළ පිළිබඳ විමර්ශන කොට්ඨාසය වෙත මෙම පැමිණිල්ල ඉදිරිපත් කරමින් එම සංවිධානය ඉල්ලා සිටින්නේ, අදාළ පුද්ගලයන් සතු දේපළ සහ බැංකු ගිණුම් උපයාගත් ආකාරය පිළිබඳව පුළුල් පරීක්ෂණයක් සිදුකරන ලෙසයි.
මෙම පැමිණිල්ල ඉදිරිපත් වන්නේ, සංවිධානාත්මක අපරාධ කල්ලි නායක නඳුන් චින්තක වික්රමරත්න හෙවත් ‘හරක් කටා’ නමැත්තාට රැඳවුම් භාරයේ සිටියදී සහන සැලසීම සඳහා රුපියල් කෝටි 12ක අල්ලසක් ලබාගැනීමේ සිද්ධියට අදාළව රඛිත රාජපක්ෂ මහතා මේ වන විට රක්ෂිත බන්ධනාගාරගත කර සිටින පසුබිමකය.
ඩුබායි රාජ්යයේදී සිදුකළ බව කියන මෙම අල්ලස් ගනුදෙනුව සම්බන්ධයෙන් අල්ලස් හෝ දූෂණ විමර්ශන කොමිෂන් සභාව විසින් රඛිත රාජපක්ෂ ඇතුළු සැකකරුවන් තිදෙනෙකු අත්අඩංගුවට ගනු ලැබීය.
මෙම සිද්ධියේ වඩාත්ම ආන්දෝලනාත්මක කරුණ වන්නේ, අදාළ අල්ලස් සාකච්ඡා නිමවා සැකකරුවන් ඩුබායි සිට යළි දිවයිනට පැමිණි ගුවන් යානයේදීම හිටපු අධිකරණ අමාත්ය විජයදාස රාජපක්ෂ මහතා ද පැමිණ ඇති බවට අල්ලස් කොමිසම අධිකරණය හමුවේ කරුණු අනාවරණය කිරීමයි. එම සංචාරය සඳහා හිටපු අමාත්යවරයාගේ සම්බන්ධතාවය පිළිබඳව ද විමර්ශනයක් පවත්වන බව කොමිසම අවධාරණය කර තිබේ.
අල්ලස හා දූෂණයට එරෙහි පුරවැසි බලය සංවිධානය පෙන්වා දෙන්නේ, ඉහළ පෙළේ දේශපාලනඥයන් සහ නීති ක්ෂේත්රයේ පුද්ගලයන් මෙවැනි බරපතළ අපරාධ චෝදනාවලට ලක්වීම රටේ නීතියේ ආධිපත්යයට දැඩි තර්ජනයක් බවයි.
එබැවින්, ඔවුන් සතු සියලුම චංචල සහ නිශ්චල දේපළ පිළිබඳව විනිවිදභාවයකින් යුත් විමර්ශනයක් පවත්වා, ඒවා නීති විරෝධී ලෙස උපයාගත් දේපළ ද යන්න තහවුරු කරගත යුතු බව එම සංවිධානය සිය පැමිණිල්ල මගින් වැඩිදුරටත් අවධාරණය කර ඇත.
මේ පුවත තව අයට බලන්න
