![Gossip Lanka](https://blogger.googleusercontent.com/img/b/R29vZ2xl/AVvXsEg02eRUfksMWUV-GnxKqzs69wfVrjvq57XWXmtUItM-9CiGBC7v8lNsizQILHlZNPO2g3Vuo7PHDVopP4nXuteLD1QquSg7JiquiZAVPpvFxjjshTVI0Jf7FzRkvbcBhNw7B5i1Y21DlhMVUWumWdURb41Z0NPJehRaheW2GSzUQLyFtIQBgWkmYDXjh5w/s1600/noha-clz.gif"")
යුද්ධයෙන් හෝ ආක්රමණයෙන් හෝමූස් කිසි විටෙක නැවත විවෘත නොවේ - ඉරානය
ඇමරිකා එක්සත් ජනපදයේ කිසිදු ආක්රමණශීලී ක්රියාවක් හමුවේ හෝමුස් සමුද්ර සන්ධිය යළි විවෘත කිරීමට ඉරානය සූදානම් නැති බවත්, එය විවෘත කළ හැක්කේ ඇමරිකාව ජාත්යන්තර නීතියට සහ අත්සන් කරන ලද ගිවිසුම්වලට ගරු කරන්නේ නම් පමණක් බවත් ඉරාන හමුදාව අවධාරණය කරයි.
ඉරාන හමුදා ප්රකාශක බ්රිගේඩියර් ජෙනරාල් මොහොමඩ් අක්රමි-නියා ප්රකාශ කළේ, ඇමරිකානු ජනාධිපතිවරයා ජාත්යන්තර නීතියට සහ අනෙකුත් ජාතීන්ගේ අයිතිවාසිකම්වලට ගරු කිරීමට ඉගෙන ගත යුතු බවයි. යුද්ධය, සතුරුකම් හෝ ආක්රමණශීලී ක්රියා මගින් මෙම උපායමාර්ගික මුහුදු මාර්ගය විවෘත කරවා ගැනීමට ඇමරිකාව දරන උත්සාහය කිසිසේත් සාර්ථක නොවන බව ඔහු වැඩිදුරටත් සඳහන් කළේය.
පසුගිය පෙබරවාරි 28 වනදා ඇමරිකාව සහ ඊශ්රායලය එක්ව ඉරානයට එරෙහිව දියත් කළ ආක්රමණශීලී ක්රියාවලින් පසු ඇති වූ ගැටුම්කාරී තත්ත්වය සමනය කර ගැනීම සඳහා පසුගිය මාසයේදී දෙපාර්ශ්වය අතර අවබෝධතා ගිවිසුමක් අත්සන් කෙරිණි. එම අතුරු ගිවිසුම යටතේ දින 60ක කාලයක් සඳහා ගාස්තු රහිතව නෞකා ගමනාගමනයට ඉඩ දීමට ඉරානය එකඟ වී තිබුණි. ඒ අනුව ඉරානය විසින් නෞකා සඳහා විශේෂ මුහුදු මාර්ගයක් ද හඳුන්වා දී තිබූ අතර, නීතිවිරෝධී මාර්ග භාවිත නොකරන ලෙසට ද අනතුරු අඟවා තිබුණි.
කෙසේ වෙතත්, ඇමරිකාව එම එකඟතාවන් කඩ කරමින් නීතිවිරෝධී මාර්ගයක් ඔස්සේ නෞකා මෙහෙයවීමට උත්සාහ කිරීම හේතුවෙන් මෙම මුහුදු තීරය වසා දැමීමට ඉරානය පියවර ගෙන ඇත. ඇමරිකාව සිය පොරොන්දු කඩ කරමින් වංචනික ලෙස නව මාර්ගයක් සකස් කිරීමට උත්සාහ කළ බවට ද හමුදා ප්රකාශකවරයා මෙහිදී චෝදනා කළේය.
"ඉරාන ජාතියේ අයිතිවාසිකම් වෙනුවෙන් අපගේ සන්නද්ධ හමුදාවන් අවසන් හුස්ම දක්වා පෙනී සිටිනවා. අවබෝධතා ගිවිසුමට පිටින් සිදු කරන ඕනෑම ක්රියාවකට ඉරාන ඉස්ලාමීය ජනරජය දැඩි ප්රතිචාර දක්වනවා," යැයි ඔහු පැවසීය.
විදේශීය ආක්රමණ හමුවේ ඉරාන ජනතාව දැක්වූ සහයෝගය අගය කළ ප්රකාශකවරයා, දිවි පිදූ ඉරාන විප්ලවීය නායක අයතුල්ලා සෙයියඩ් අලි කමේනි වෙනුවෙන් පැවැති අවමංගල්ය උත්සවයට මිලියන සංඛ්යාත ජනතාවක් සහභාගී වීම ඉතිහාසගත සිදුවීමක් බව ද සිහිපත් කළේය. සතුරන් ඉරාන ඉස්ලාමීය පාලනය බිඳ දැමීමට උත්සාහ කළ ද, ජනතාවගේ කැපවීම සහ එකමුතුකම හමුවේ එම කුමන්ත්රණ සියල්ල පරාජය වූ බව ද ඔහු වැඩිදුරටත් ප්රකාශ කළේය.
මේ පුවත තව අයට බලන්න
