අවම බලය යොදා මීගමු බන්ධනාගාර තත්වය පාලනය කලා - බන්ධනාගාර කොමසාරිස්
මීගමුව බන්ධනාගාරය තුළ අද (06) උදෑසන යළිත් හටගත් දරුණු නොසන්සුන්කාරී තත්ත්වය පාලනය කිරීම සඳහා බන්ධනාගාර නිලධාරීන් විසින් අවම බලය භාවිතා කර ඇති බව බන්ධනාගාර කොමසාරිස් (මාධ්ය ප්රකාශක) ඒ.සී. ගජනායක මහතා පවසයි.
ඊයේ දින ඇති වූ නොසන්සුන්තාව පාලනය කර තිබුණ ද, අද උදෑසන රැඳවියන්ට උදේ ආහාරය ලබා දීමට ගිය අවස්ථාවේදී රැඳවියන් පිරිසක් යළිත් කලහකාරී ලෙස හැසිරී තිබේ. එහිදී ඔවුන් බන්ධනාගාර නිලධාරීන්ට පහර දී ඇති අතර, බන්ධනාගාරයේ ප්රධාන දොරටුව කඩා දැමීමට ද උත්සාහ කර ඇත.
මෙම තත්ත්වය පාලනය කිරීමට නිලධාරීන් ගත් උත්සාහයේදී ඇති වූ ගැටුම්වලින් බන්ධනාගාර නිලධාරීන් මෙන්ම රැඳවියන් කිහිපදෙනෙකු ද ජීවිතක්ෂයට පත්ව ඇති බවත් ඔහු පැවසීය.
තුවාල ලැබූ නිලධාරීන් සහ රැඳවියන් පිරිසක් මේ වන විට රෝහල්ගත කර ඇති අතර, බන්ධනාගාරයේ ප්රධාන දොරටුව අසල තත්ත්වය මේ වන විට පාලනය කර ඇති බව ගජනායක මහතා වැඩිදුරටත් සඳහන් කළේය. කෙසේ වෙතත්, බන්ධනාගාරය තුළ තවමත් යම් උණුසුම්කාරී වාතාවරණයක් පවතින බව ද ඔහු පැවසීය.
මේ අතර, කාන්තා අංශයේ රැඳවියන් පිරිසක් ද බන්ධනාගාර වහලය මත නැග විරෝධතාවයක නිරත වෙමින් චෝදනා කර ඇත්තේ රැඳවියන් පිරිසක් මියගොස් ඇති බවත් කුඩා දරුවන්ට ආහාර නොමැති බවත්ය.
කෙසේ වෙතත්, මෙම ගැටුම මත්ද්රව්ය හා සම්බන්ධ කල්ලි දෙකක් අතර ඇති වූවක් බවත්, එය කාන්තා අංශයට සෘජුව බලපා නොමැති බවත් බන්ධනාගාර බලධාරීන් පෙන්වා දෙයි.
මීගමුව බන්ධනාගාරයේ රැඳවියන් 2,400කට අධික පිරිසක් රඳවා සිටින අතර, එය එහි නියමිත ධාරිතාවට වඩා බෙහෙවින් වැඩි අගයකි. පවතින තත්ත්වය සැලකිල්ලට ගෙන රැඳවියන් පිරිසක් දුම්බර ඇතුළු දිවයිනේ අනෙකුත් බන්ධනාගාර වෙත මාරු කර යැවීමට ද මේ වන විට කටයුතු යොදා ඇත.
මේ පුවත තව අයට බලන්න
