මීගමුවෙන් ගෙනා රැදවියන්ට දිනකට තෙවරක් දරුණු පහර දීම්... බොහෝ දෙනෙකුට නැගිටින්නත් බෑ - CPRP

මීගමුව බන්ධනාගාරයේ සිට වැලිකඩ බන්ධනාගාරයේ Y.O. සිර මැදිරිය වෙත මාරු කර යැවූ රැඳවියන් 150කට අධික පිරිසක් ක්‍රමවත් සහ අමානුෂික වධහිංසාවලට ලක්වෙමින් සිටින බවට බන්ධනාගාර රැඳවියන්ගේ අයිතිවාසිකම් සුරැකීමේ කමිටුව (CPRP) අනාවරණය කරයි.

එම කමිටුව නිකුත් කළ වාර්තාවකට අනුව, මෙම රැඳවියන්ට දිනකට තෙවරක් (උදෑසන, දහවල් සහ රාත්‍රී) බන්ධනාගාර නිලධාරීන් විසින් සංවිධානාත්මකව පහර දෙනු ලබයි.

ශ්‍රී ලංකා මානව හිමිකම් කොමිෂන් සභාව වෙත පැමිණිලි කිරීම හේතුවෙන්, ඊට පළිගැනීමක් ලෙස බන්ධනාගාර නිලධාරීන් මෙම වධහිංසා පමුණුවන බව වාර්තා වේ.

මෙම අඛණ්ඩ පහරදීම් හේතුවෙන් බොහෝ රැඳවියන් ඇවිදීමට හෝ නැගී සිටීමට පවා නොහැකි තරම් බරපතල ලෙස තුවාල ලබා ඇති බව එම වාර්තාවේ සඳහන් වේ.

නීතිඥ සේනක පෙරේරා, සුරේන් ඩී. පෙරේරා, ධනුෂ්ක ද සිල්වා, මනුෂිකා කූරේ සහ මාධව ඉරියගම යන නීතිඥ කණ්ඩායම වැලිකඩ බන්ධනාගාරයට ගොස් මෙම රැඳවියන් පරීක්ෂා කර ඇති අතර, එහිදී ඔවුන්ගේ සිරුරුවල පැහැදිලි තුවාල නිරීක්ෂණය කර තිබේ.

කෙසේ වෙතත්, නීතිඥවරුන්ට රැඳවියන් සමඟ රහසිගතව සාකච්ඡා කිරීමට බන්ධනාගාර නිලධාරීන් ඉඩ ලබා දී නොමැති අතර, ඔවුන් අසල රැඳී සිටිමින් රැඳවියන් බිය ගැන්වීමට කටයුතු කර ඇත.මෙය නීතිඥ-සේවාදායක රහස්‍යභාවය උල්ලංඝනය කිරීමක් බව නීතිඥවරු පෙන්වා දෙති.

වැලිකඩ බන්ධනාගාර අධිකාරීවරයා මෙම සිද්ධිය සම්බන්ධයෙන් වන නිල පැමිණිල්ල භාර ගැනීම පවා ප්‍රතික්ෂේප කර ඇති බව ද සඳහන් වේ.

මේ අතර, බන්ධනාගාර බලධාරීන් තොරතුරු වසන් කරමින් සිටින බවත්, පසුගිය පැය 48 තුළ පවුල් 10කට අධික සංඛ්‍යාවක් තම ඥාතීන් සිටින ස්ථානයක් සොයා ගැනීමට නොහැකිව අසරණ වී ඇති බවත් CPRP පවසයි.

ඇතැම් පවුල් තම ඥාතීන් සිටින ස්ථානය සොයා ගත්තද, ඔවුන් බැලීමට බන්ධනාගාර බලධාරීන් අවසර ලබා නොදෙන බවට ද චෝදනා එල්ල වේ.

පවතින බරපතල තත්ත්වය සැලකිල්ලට ගෙන, අධිකරණ අමාත්‍ය හර්ෂණ නානායක්කාර මහතා මේ සඳහා වහාම මැදිහත් විය යුතු බවත්, තුවාල ලැබූ රැඳවියන් සඳහා ස්වාධීන වෛද්‍ය කණ්ඩායමක සහාය ඇතිව වහාම ප්‍රතිකාර ලබා දීමට පියවර ගත යුතු බවත් බන්ධනාගාර රැඳවියන්ගේ අයිතිවාසිකම් සුරැකීමේ කමිටුව වැඩිදුරටත් අවධාරණය කරයි.