කතානායක පත් කල කමිටුවෙන්ම කතානායකට එරෙහි දුෂණ චෝදනා 10ක්!

වත්මන් කතානායකවරයා විසින් සිදු කර ඇති බව කියන බරපතල මූල්‍ය අවභාවිතයන් සහ පරිපාලන දූෂණ 10ක් ඇතුළත් විමර්ශන වාර්තාවක් පිවිතුරු හෙළ උරුමයේ නායක, හිටපු අමාත්‍ය උදය ගම්මන්පිල මහතා විසින් අනාවරණය කර තිබේ.

ඔහු පෙන්වා දුන්නේ කතානායකවරයා විසින්ම පත් කරන ලද විමර්ශන කමිටුවක් මගින් මෙම කරුණු හෙලි වී ඇති බවයි.

උදය ගම්මන්පිල මහතා විසින් හෙළිදරව් කරන ලද ප්‍රධාන චෝදනා 10 මෙසේය.

    1. නිල නිවාස දෙකක් පරිහරණය කිරීම: රජය විසින් ලබා දී ඇති නිල නිවසට අමතරව, ලොරිස් මාවතේ පිහිටි තවත් රජයේ නිවසක් නීති විරෝධී ලෙස පරිහරණය කිරීම.

    2. නිල නිවස පර්යේෂණ මධ්‍යස්ථානයක් කිරීම: කතානායක නිල නිවස 'පාර්ලිමේන්තු පර්යේෂණ මධ්‍යස්ථානයක්' ලෙස පත් කිරීමට කැබිනට් අනුමැතියකින් තොරව නීති විරෝධී තීරණයක් ගැනීම.

    3. පෞද්ගලික නඩත්තු කටයුතු සඳහා පාර්ලිමේන්තු සේවකයින් යෙදවීම: ලොරිස් මාවතේ පිහිටි නිවසේ වායුසමීකරණ යන්ත්‍ර අලුත්වැඩියාව වැනි පෞද්ගලික කටයුතු සඳහා පාර්ලිමේන්තු කාර්ය මණ්ඩලය යොදා ගැනීම.

    4. භාවිතා නොකරන නිවසකට සේවකයින් පත් කිරීම: තමන් පදිංචි නැතැයි පවසන නිල නිවස සඳහා සේවකයින් 8 දෙනෙකු පත් කර ඔවුන් වෙනුවෙන් මසකට රුපියල් 786,000ක වැටුප් රජයේ මුදලින් ගෙවීම.

    5. වයස් සීමාව ඉක්මවූවන් සේවයට ගැනීම: නිල නිවසේ සේවය සඳහා අවුරුදු 73ක සහ 68ක පුද්ගලයින් දෙදෙනෙකු නීති විරෝධී ලෙස බඳවා ගැනීම.

    6. නිලධාරීන් නොමඟ යැවීම: නිල නිවස රැස්වීම් සඳහා භාවිතා නොකරන බව පැවසුවද, එහි විවිධ රැස්වීම් පැවැත්වූ බවට නිලධාරීන් සාක්ෂි ලබා දී තිබීම.

    7. භාණ්ඩ අවභාවිතය: නිල නිවසට අයත් ඇඳ ඇතිරිලි, කොට්ට උර වැනි භාණ්ඩ පෞද්ගලික පරිහරණය සඳහා වෙනත් ස්ථාන කරා රැගෙන යාම.

    8. අනවසර මාධ්‍ය ඒකකයක් පවත්වාගෙන යාම: කතානායකවරයා සඳහා නීත්‍යානුකූලව හිමි නොවන පෞද්ගලික මාධ්‍ය ඒකකයක් ස්ථාපිත කර ඒ සඳහා රජයේ උපකරණ මිලදී ගැනීම.

    9. වාහන අවභාවිතය: අදාළ අනවසර මාධ්‍ය ඒකකය සඳහා පාර්ලිමේන්තුවට අයත් NC 4923 දරන වෑන් රථය වෙන් කරවා ගැනීම.

    10. ඉන්ධන දීමනා ද්විත්වයක් ලබා ගැනීම: පොළොන්නරුව දිස්ත්‍රික් මන්ත්‍රීවරයෙකු ලෙස හිමිවන ඉන්ධන දීමනාව සහ කතානායකවරයා ලෙස හිමිවන ඉන්ධන දීමනාව යන දෙකම එකවර ලබා ගනිමින් රජයේ මුදල් අවභාවිත කිරීම.

මෙම දූෂණ ක්‍රියාවලිය සම්බන්ධයෙන් අල්ලස් හෝ දූෂණ විමර්ශන කොමිෂන් සභාවට පැමිණිලි කිරීමට කටයුතු කරන බවත්, කතානායකවරයා වැනි වගකිවයුතු තනතුරක සිටින පුද්ගලයෙකු මෙලෙස මහජන මුදල් අවභාවිත කිරීම බරපතල තත්ත්වයක් බවත් උදය ගම්මන්පිල මහතා වැඩිදුරටත් අවධාරණය කළේය.