ලීසිං ක්‍රමයට හාල් දීලා ණය ගෙව්වෙ නැත්තම් බත් මුට්ටිය උස්සයි! – නාමල් කියයි..

ආණ්ඩුවට ජනතාවට දිය හැකි උපරිම සහනය රජයේ සේවකයන්ට හාල් කිලෝ 20ක් ණයට දීම පමණක් බවත්, එම ණය නොගෙව්වහොත් අවසානයේ බත් මුට්ටිය පවා රැගෙන යාමට සිදු වනු ඇති බවත් ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ පවසයි.

පුත්තලමේ පැවැති ජන හමුවක් අමතමින් මන්ත්‍රීවරයා සඳහන් කළේ, වත්මන් පාලකයන්ට ගෙවල්වලට පැන බත් මුට්ටිය උස්සා පුරුදු ඉතිහාසයක් තිබුණු  බවය.

පසුගියදා ජනාධිපතිවරයා පාර්ලිමේන්තුවට පැමිණි අවස්ථාවේදී ජනතාව මුහුණ දෙන දැවෙන ප්‍රශ්න පිළිබඳව සාකච්ඡා කරනු ඇතැයි තමන් බලාපොරොත්තු වූ බව ද ඔහු කීය. ජීවන වියදම අඩු කිරීම, ගොවීන්ගේ පොහොර ප්‍රශ්නය, වී මිල මෙන්ම ආර්ථික අර්බුදය හමුවේ වැසී යන කර්මාන්තශාලා පිළිබඳ වැඩපිළිවෙළක් එහිදී ඉදිරිපත් වනු ඇතැයි අපේක්ෂා කළ ද, ජනාධිපතිවරයා එහිදී පොලිස් මාධ්‍ය ප්‍රකාශකවරයාගේ රාජකාරිය ඉටු කළ බවට මන්ත්‍රීවරයා චෝදනා කළේය.

වැඩ බැරි ආණ්ඩුව තමන්ගේ නොහැකියාව වසා ගැනීමට මර්දනය දියත් කරන බව පෙන්වා දුන් නාමල් රාජපක්ෂ, බාල ගල් අඟුරු ගෙන්වීම, ඉහළ මිලට තෙල් මිලදී ගැනීම, පිටරටින් හාල් ගෙන්වා දේශීය වී මිල කප්පාදු කිරීම සහ වරායෙන් අතුරුදන් වූ කන්ටේනර් 323 පිළිබඳව වහාම පරීක්ෂණ පැවැත්විය යුතු බව අවධාරණය කළේය.

ආණ්ඩුවේ දූෂිත ක්‍රියාකලාපය හේතුවෙන් විදුලි බිල මෙන්ම පෙට්‍රල් සහ ඩීසල් මිල දිනෙන් දින ඉහළ යන බවත්, අත්‍යවශ්‍ය භාණ්ඩ හා ආහාර ද්‍රව්‍යවල මිල දරාගත නොහැකි මට්ටමකට පත්ව ඇති බවත් ඔහු පැවසීය. ලක්ෂ 12කට කාර් දෙන බව පවසා සහ දියුණු රටක් හදන බව පවසා බලයට පැමිණි පිරිස, අද වන විට ජාතීන් අතර අසමඟිය ඇති කරමින්, බුද්ධි අංශ හා ජාතික ආරක්ෂාව දුර්වල කරමින් සිටින බවට ද මන්ත්‍රීවරයා චෝදනා එල්ල කළේය.

ධීවර ජනතාව මුහුණ දෙන ඉන්ධන අර්බුදයට හෝ මාදැල් ධීවරයන්ගේ ගැටලුවලට වත්මන් පාලනය සතුව කිසිදු විකල්පයක් හෝ සැලැස්මක් නොමැති බව ද නාමල් රාජපක්ෂ මන්ත්‍රීවරයා වැඩිදුරටත් ප්‍රකාශ කළේය. ඔහු කීවේ වැඩ බැරි ආණ්ඩුව බලයට පත්වීම සදහා බොරු කියා බලයේ සිටීම වෙනුවෙන් ඊටත් වඩා බොරු කියමින් සිටින බවය. බොරුවට ආයුෂ කෙටි බව ද හෙතෙම කීවේය.