Taxi රථ රියදුරා කොල්ලකෑ සැකකරුවන් සියලුදෙනා අත්අඩංගුවට

සමාජ මාධ්‍ය ඔස්සේ වේගයෙන් පැතිර ගිය Taxi රථ රියදුරෙකු කොල්ලකෑමේ සිද්ධියට සම්බන්ධ සියලු සැකකරුවන් අත්අඩංගුවට ගෙන ඇති බව පොලිසිය පවසයි. වැලිකඩ පොලිස් බලප්‍රදේශයේ සිදුවූ මෙම සිද්ධියේදී පුද්ගලයන් තිදෙනෙකු තරුණ රියදුරාට තර්ජනය කරමින්, වාහනය තුළදීම ඔහුගේ ගෙලෙන් අල්ලා පහරදීමට උත්සාහ කර තිබුණි.

වාර්තා වන අන්දමට, තම ජීවිතය ආරක්ෂා කර ගැනීම සඳහා රියදුරා සන්සුන්ව කටයුතු කරමින් සැකකරුවන් සමඟ කතාබස් කර තත්ත්වය පාලනය කිරීමට උත්සාහ දරා ඇත.

කෙසේවෙතත්, සැකකරුවන් ඔහුගේ ATM කාඩ්පත බලහත්කාරයෙන් ලබාගෙන, එමඟින් රුපියල් 38,000ක් මුදල් ලබාගෙන පලාගොස් තිබේ.

ඩෑෂ් කැමරා සහ අනෙකුත් වීඩියෝ දර්ශන සමාජ මාධ්‍ය ඔස්සේ ප්‍රචාරය වීමත් සමඟ මහජනතාව අතර දැඩි කතාබහක් ඇති වූ අතර, ඒ අනුව පොලිසිය වහාම විමර්ශනයක් ආරම්භ කර ඇත.

වැලිකඩ පොලිසිය සහ බොරැල්ල පොලිසිය එක්ව සිදුකළ මෙහෙයුමකදී ප්‍රධාන සැකකරු සහ ඔහුගේ සහායකයන් පැය කිහිපයක් ඇතුළත අත්අඩංගුවට ගෙන තිබේ.

මූලික පොලිස් ප්‍රශ්න කිරීම්වලදී අනාවරණය වී ඇත්තේ, සැකකරුවන් මත්ද්‍රව්‍යවලට ඇබ්බැහි වූ පුද්ගලයන් වන අතර, එම ඇබ්බැහිය පවත්වාගෙන යාම සඳහා මීට පෙරද මීට සමාන අපරාධවල නිරත වී ඇති බවයි.