ආර්ථිකයේ පූර්ණ බිද වැටීමක් ඉතා ආසන්නයි..- රනිල් විශේෂ ප‍්‍රකාශයක

එක්සත් ජාතික පක්ෂයේ කෘත්‍යාධිකාරී මණ්ඩලයේ විශේෂ හමුවක් අමතමින් හිටපු ජනාධිපති රනිල් වික්‍රමසිංහ මහතා වත්මන් දේශපාලන හා ආර්ථික ගමනාගමනය පිළිබඳ විවේචනාත්මක අනාවරණයක නිරත විය.  කොළඹ, මල් පාර පිහිටි ඒ මහතාගේ නිල දේශපාලන කාර්යාල පරිශ්‍රයේදී මෙම සාකච්ඡාව පවත්වා ඇති අතර, එහිදී ඒ මහතා පෙන්වා දුන්නේ පවතින රාජ්‍ය ප්‍රතිපත්ති හේතුවෙන් මෙරට මූල්‍ය ස්ථාවරත්වය දැඩි අවදානමකට ලක්ව ඇති බවයි. 

වත්මන් පාලන යාන්ත්‍රණයේ දුර්වලතා හේතුවෙන් ආසන්න අනාගතයේදීම ආර්ථිකයේ පූර්ණ බිඳවැටීමක් සිදුවීම වැළැක්විය නොහැකි වනු ඇති බවත්, එහි බරපතළ ප්‍රතිඵල පොදු මහජනතාවට අත්විඳීමට සිදුවනු ඇති බවත් හිටපු ජනාධිපතිවරයා එහිදී අවධාරණය කළේය.

ආර්ථික ක්ෂේත්‍රයේ පවතින මෙම අස්ථාවරත්වයට අමතරව රටේ සමාජීය හා සංස්කෘතික පදනමට එල්ල වී ඇති බලපෑම් පිළිබඳව ද දේශපාලන අධිකාරියේ අවධානය යොමු කළ රනිල් වික්‍රමසිංහ මහතා, වත්මන් පාලනය විසින් දේශීය අනන්‍යතාවයේ ප්‍රධාන කුළුණු ද්විත්වයක් ඉලක්ක කරගෙන ඇති බවට චෝදනා කළේය. 

මෙරට ඓතිහාසික හා සංස්කෘතික උරුමය සුරක්ෂිත කරන මහා සංඝරත්නය මෙන්ම දේශයේ ස්වෛරීභාවය වෙනුවෙන් කැපවූ රණවිරු ප්‍රජාව පීඩාවට පත් කරමින්, ඔවුන් සතු සමාජීය වටිනාකම් සහ බලය ක්‍රමයෙන් ක්ෂය කර දැමීමේ සූක්ෂ්ම වැඩපිළිවෙළක් වර්තමාන රාජ්‍ය පාලනය තුළ ක්‍රියාත්මක වන බව ඒ මහතා වැඩිදුරටත් ප්‍රකාශ කර සිටියේය.