භාණ්ඩාගාර නිලධාරිගේ මරණය ගැන ගම්මන්පිලගෙන් ප‍්‍රශ්ණ කරයි

මහා භාණ්ඩාගාරයේ මුදල් ගනුදෙනුවකට අදාළව වැඩ තහනමට ලක්ව සිටියදී සැකකටයුතු ලෙස මියගිය මුදල් අමාත්‍යාංශයේ නිලධාරී රංග නිශාන්ත මහතාගේ මරණය සම්බන්ධයෙන් හිටපු පාර්ලිමේන්තු මන්ත්‍රී නීතිඥ උදය ගම්මන්පිල මහතා සිදු කළ ප්‍රකාශයක් පිළිබඳව ඔහුගෙන් ප්‍රකාශයක් සටහන් කර ගැනීමට පොලිසිය පියවර ගනිමින් සිටී.

පොලිස් මාධ්‍ය ප්‍රකාශක සහකාර පොලිස් අධිකාරී එෆ්. යූ. වුට්ලර් මහතා ප්‍රවෘත්ති සාකච්ඡාවකදී සඳහන් කළේ, ගම්මන්පිල මහතා විසින් සිදු කරන ලද මෙම ප්‍රකාශයන් අසත්‍ය බවත් ඒවා විමර්ශන නොමග යවන සුළු මට්ටමක පවතින්නේ නම් ඒ සම්බන්ධයෙන් නීතිමය පියවර ගන්නා බවත්ය.

පිවිතුරු හෙළ උරුමයේ නායක උදය ගම්මන්පිල මහතා පසුගියදා ප්‍රකාශ කර තිබුණේ, මෙම මරණය සම්බන්ධයෙන් එල්ල වන සැකය ආණ්ඩුව දෙසට යොමු වී ඇති බවයි.

ඇඟිලි සලකුණු වාර්තාව ලැබීමටත් පෙර පොලිස් මාධ්‍ය ප්‍රකාශකවරයා මෙය සියදිවි හානි කර ගැනීමක් ලෙස ප්‍රකාශ කිරීම හරහා පරීක්ෂණ මණ්ඩලයට කිසියම් ප්‍රබලයෙකුගේ බලපෑමක් එල්ල වී ඇති බවට සාධාරණ සැකයක් මතු වන බව ද ඔහු පවසා තිබුණි. මියගිය නිලධාරියාගේ බිරිඳ විසින් මරණය සැක සහිත බවට කළ පැමිණිල්ල සහ පරිපූර්ණ පශ්චාත් මරණ පරීක්ෂණයක් සිදු නොවීම වැනි කරුණු පහක් පදනම් කර ගනිමින් තමන් පශ්චාත් මරණ පරීක්ෂණ වාර්තාව ප්‍රතික්ෂේප කරන බව ද ගම්මන්පිල මහතා වැඩිදුරටත් සඳහන් කළේය.

කෙසේ වෙතත්, පොලිස් මාධ්‍ය ප්‍රකාශකවරයා අවධාරණය කළේ මියගිය නිලධාරියාගේ බිරිඳ පොලිසියට විරුද්ධව මරණය සැක සහිත බවට කළ ප්‍රකාශය අසත්‍යයක් බවයි.

මෙම පරස්පර ප්‍රකාශයන් සම්බන්ධයෙන් විමර්ශන නිලධාරීන් ඉදිරියේදී නීතිඥ උදය ගම්මන්පිල මහතාගෙන් ප්‍රකාශයක් ලබා ගැනීමට නියමිත අතර, අනතුරුව ඔහුව කුලියාපිටිය අධිකරණයේ පවත්වන මරණ පරීක්ෂණය සඳහා සාක්ෂි දීමට කැඳවීමට ද නියමිතව ඇත.

විශේෂඥ වෛද්‍ය මණ්ඩලය විසින් ස්ථානීය පරීක්ෂණයක් සහ පශ්චාත් මරණ පරීක්ෂණයක් සිදු කිරීමෙන් පසුව මෙම මරණය තමා විසින්ම සිදු කරගත් තුවාල හේතුවෙන් සිදු වූවක් බවට නිගමනය කර ඇති බව පොලිසිය පවසයි.

මේ පුවත තව අයට බලන්න